唔知點解, 仲有3日就去旅行, 但我一D興奮的感覺都冇! 雖然好鍾意去旅行, 每次都好期待, 但今次我感覺同以前唔同, 全完冇就黎去旅行的"未出發先興奮"感覺......
可能係因為:
(1) 舊年暑假去旅行的不愉快經歷, 孖寶超級扭計, 尤其細佬, 天氣熱, 大量出汗後, 就會發忟憎, 繼而埋怨你點解帶佢黎呢個地方, 佢唔想黎, 係媽媽迫佢黎!
(2) 都係以往的不愉快經歷, 孖寶去到公眾地方好百厭, 玩到癲咗, 搞到媽媽超級尷尬!
(3) 每次旅行都好似好快去完, 又要返香港繼續返工, 但係每日係公司又唔見D時間過得咁快喎, 快樂總係短暫, 令人好希虛!
(4) 雖然今年8個月之內去咗3次旅行, 但係去完今次之後, 就要等足一年, 到下年暑假先至再有得去旅行, 好唔開心!
由於太多心理重擔, 所以今次去旅行全完冇興奮的感覺! 為咗唔想嘥咗個旅行, 錢已經俾咗, 假又請咗, 唔可以俾自己咁頽, 所以我列出以下3點激勵一下自己 (順便同老公Share):
(1) 首先, 預咗佢兩個每日都會發幾次癲, 我地只係須要保持冷靜, 深呼吸!
(2) 唔好覺得帶佢地去旅行, 要成日照顧佢兩個, 係一種負累!
(3) 自己都要Enjoy, 唔好只係就晒佢地!
後記@2018.08.03
昨晚陪逸逸瞓覺，突然覺得呢5年過得好快，5年前，逸逸仲係BB，逸逸特別痴我，初生頭半年，晚晚喊3個鐘，我就抱住佢，唱歌仔俾佢聽，而家，逸逸已經係一個小男孩，再過5年，佢可能已經唔痴我喇！所以，要好好珍惜同佢地兩個的親子時光，而去旅行就可以24小時同佢地係埋一齊，所以要好好珍惜！
沒有留言:
張貼留言