南九州親子之旅2018 - Day 7

2018.08.10 (星期五)

今日仍然係陽光猛烈, 天氣酷熱!

今日去Harmony Land (Sanrio主題樂園, 有我最鍾意的Little Twin Stars), 玩埋今日, 我地今次的旅程就完結, 聽日基本上係冇行程, 只係揸4個鐘返宮崎機場, 然後搭飛機返香港。

早上8:30, 又落返去酒店地下間日式餐廳, 職員好似認得我地, 而我地亦自動波坐返尋日個窗口位, 又係食返果D野, 都係食到好飽。

早上10:15到咗Harmony Land, 近正門個停車場Full晒, 要泊下面個停車場, 然後行樓梯上去正門, 排隊買飛, 外國人出示Passport, 每位有500円Discount (折後2,400円, 一家四口玩全日唔駛10,000円, Good啦!)

入到場, 唔算好多人, 但唔係好搵到邊度有機動遊戲設施, 只係見到有人排過山車, 唔算太多人, 但唔知點解, 等咗好耐, 應該超過30分鐘, 原來架過山車都幾刺激, 哥哥玩完又話有少少暈, 慘慘豬!

個樣睇唔出好刺激的過山車

之後, 跟住地圖, 行咗上山, 山頂上面有好多適合小朋友的機動遊戲: 咖啡杯、旋轉木馬、兒童版摩天輪、兒童版過山車、真‧摩天輪、空中快艇, etc. 由於哥哥有D唔舒服, 爸爸陪佢入餐廳涼吓冷氣, 休息一吓, 細佬仔叫我同佢去玩咖啡杯, err...... 媽媽驚暈喎, 你唔好轉得咁犀利! 不過, 小朋友又點會咁順攤丫? 個咖啡杯一開動, 佢就狂轉, OMG, 媽媽不行了! 你轉到我都唔舒服, 就冇人再陪你玩架喇!

細佬, 唔好再轉喇!

玩完咖啡杯, 見到老公拖住哥哥係餐廳出黎, 哥哥又爆喊完, 原來佢見到細佬有得玩, 自己冇得玩, 覺得好唔公平, 好唔開心! 佢唔單止要玩, 仲要細佬冇得玩, 咁佢先至覺得公平, 先至開心! 細佬當然唔會睬佢啦! 有得玩, 點可以唔玩呀? 爸爸好努力咁安慰哥哥, 但佢仍然係好唔開心, 同佢去玩兒童版摩天輪, 佢喊住黎玩囉! 之後又玩咗旋轉木馬、空中快艇(排咗超過30分鐘, 其實唔多人排, 只係工作人員人手不足) 、真‧摩天輪(冇人排隊, 原來個車廂入面係冇冷氣der~)。

 喊住黎玩!

 強顏歡笑

 等咗超級耐

冇冷氣, 唔怪之得冇人排隊

下午1點左右, 行返樓梯落山, 去搵餐廳食野, 經過廣場, 見到有parade, 企係度睇咗一陣, 見佢就黎做完, 快D走喇! 一陣散場好多人湧去餐廳食野。

入到餐廳, 冇乜人, 搵咗個窗邊死角位, 拎本畫簿出黎俾孖寶填顏色, 我同老公出去排隊買野食, 我地算早黎, 排第5-6個, 之後見到越黎越多人入黎, 條龍排到好長, 雖然都算早排隊, 但都係等好耐, 日本人做野, 係好慢條斯理, 你急佢唔急既!  感覺排咗超過20分鐘, 買咗2碗牛肉飯(好好味), 一碗炸雞飯(中伏! 又係老公)。

下午2點食完飯, 行出餐廳, 見到門口有人玩緊個爆谷機, 好得意 (部機即時整爆谷, 第一次見! 唔好意思!) 我見咁好玩, 即時俾220円孖寶, 等佢地玩吓(以前細個跟阿爸去旅行, 佢孤寒到死, 乜都冇得試, 冇得玩, 得個睇字, 我唔想孖寶好似我當年咁囉!) 入咗錢, 要揀爆谷的味道, 由於唔識睇日文, 就揀返頭先對父女揀個味啦! 部機會輸送袋未整好的爆谷入去裏面, 然後, 就聽到部機入面噼嚦啪啦咁既聲, 應該係爆緊! 等咗2分鐘左右, 終於有袋脹卜卜的爆谷跌出黎, 原來好熱架, 孖寶拎唔到, 等媽媽拎啦! 今日的飯後甜品係爆谷!

一直都想搵坐船仔係邊度(係室內的, 但唔知道座Building), 老公話係山下面, 嘩! 烈日當空, 行樓梯落去, 都幾攞命! 但係點解冇人行既呢?! 一陣點上返黎呢? 是但啦! 都行咗一半喇! 行行吓, 老公見到, 原來有火車落山架! 我相信老公心入面已經講緊粗口, 因為頭先老公話不如搭咗火車先, 我話一陣臨走先搭啦! 原來架火車係載人上落山架! 老公冇埋怨我, 佢只係話, 點解樂園唔貼張告示話俾人聽有火車搭, 或者索性封咗條落山的樓梯啦! 我惟有安慰大家, 做吓運動, 幫助消化呀!

好在唔算行咗好耐, 大概10分鐘, 我地落到山腳, 原來呢度就只有一個遊戲, 就係坐船仔, 咁啱有架火車落客, 好多人呀! 我地要行快D呀! 等咗2班船, 到我地, 好熱, 就算有得遮蔭都係流晒大汗, 我拆咗包爆谷俾孖寶食, err...... 點解淡茂茂, 冇味既?! Anyway, 只要係爆谷, 孖寶就會搶住食, 上咗船繼續食, 好快就食晒。架船初段係露天, 行得好慢, 行咗一陣, 先至入到室內, 有冷氣, 叫做涼返D, 入面全部都係Sanrio公仔, 載歌載舞! 小朋友睇到應該好開心, 但我地去過廸廸尼小小世界N次, 就覺得冇乜特別!

有我最鍾意的Little Twin Stars

玩完船仔, 去火車站搭火車上山, 準備走人, 經過Souvenir舖頭, 我同老公講, 我要入去睇吓有冇Little Twin Stars, 都有, 但好少, 少過屋企樓下千色店間Sanrio, 本來想買對Twin Stars夾, 但太多人, 唔想排隊, 唔買喇! 原來哥哥太攰, 係外面個花槽瞓咗一陣, 老公去停車場攞車, 細佬不停咁問: 而家可以做咩呀? 點解冇野做? (怨聲載道, 又係阿媽唔啱, 帶咗你黎, 呢個世界!)

哥哥暈咗!

下午3點離開樂園, 上返車, 今日的行程完結, 今晚唔去Youme, 去吓路邊D餐廳食, 老公話平時經過果間Royal Host都幾出名, 可以一試。經過油站, 又要入油, 因為聽日要揸4個鐘頭車返去宮崎機場。

上車後, 輪到細佬暈咗!

下午4點, 經過二卜刂, 去咗N次日本, 都未去過人地日本IKEA, 我話想去參觀吓, 泊好車, 一家四口上去睇吓, 第一層係賣家用品, 老公最Like, 睇咗好耐, 見到個洗手液樽(講咗N年, 都冇買到), 決定買一個, 揀咗黃色, 好貴氣! 孖寶玩Cushion都玩得一餐, 笑到卡卡聲。第二層係賣家俬, 算喇! 唔行喇! 俾錢, 走人!

之後, 經過DAISO, 老公話想去行吓, 佢要買封箱膠紙同尼龍繩(綁返佢盒Gundam喎, 真係執條襪帶!) 既然黎到100円店, 我都唔執書, 緊係睇吓有冇Twin Stars用品啦! 老公搵到包Twin Stars濕紙巾同專用蓋俾我, 我搵到個飯袋(米老鼠, 是但啦!), 同埋買咗個粉色硅土杯墊, 哥哥見到個杯墊, 佢話: 點解好似放大咗既維他命C咁既? 又係喎! 三母子捧腹大笑!

下午5:45, 老公行去Autobacs, 我同孖寶係車度等佢, 老公買唔到野。

晚上6:30, 去Royal Host食飯。叫咗一個燒牛扒炒飯底, 一個蟹扁意粉, 2個都轉SET, 有餐湯同飲品(自己出去斟, 可以添飲)。今餐盛惠4,500幾円, 係旅程中最貴一餐, 因為係最後一餐晚餐, 緊係要食好D啦! 不過, 我覺得最好味都係Day 2餐Lunch。

食咗一半先至記得影相

個麵同D汁都唔錯, 但隻蟹好似只係用黎裝飾咁, 我完全食唔到!

食完飯都未天黑

晚上7:30, 返酒店之前, 係街口間便利店買咗包Aerial粟米脆片(我地全家的Favorite!) 返到酒店, 老公去3/F屠房做豬隻浸溫泉, 我陪孖寶去Playground玩, 今次冇人玩, 得佢2個玩, 佢地玩得好開心! 返上房, 同孖寶沖涼, 食零食, 執野(聽日要返香港, 所以要努力執喼! 同埋我發覺個大喼擺唔晒D野, 要將D污糟衫擺落去老公裝Gundam個箱度, 順便做cushion, 保護佢個Gundam盒!)

 Playground

Our Favorite!

Day 7 完