南九州親子之旅2018 - Day 1

2018.08.04 (星期六)

今次搭HK Airlines, 早上11點起飛前往宮崎。

由於對呢間航空公司冇乜好感(之前有幾次中伏), 所以今次都要打醒十二分精神。

我地一家四口未夠7點已經起晒身, 食完早餐, 最後一次檢查行李(上次唔記得帶孖寶支牙膏, 今次一定要記得帶), 早上8點, 工人姐姐幫我地影咗張全家福, 出發喇!

今次都係揸車去青衣機鐵站, 8:45到達, 泊車(日泊$80), 推埋D行李, 落去搭機場快線 (之前用KK Day買咗來回車票, 用QR Code入閘, 小童免費)

早上9:20到達機場, 去Counter Check-in, 好多人, 排咗30分鐘。今次check in一切順利, 老公2日前上網check in, mark晒位, book咗2份兒童餐, 全部都冇問題, 地勤冇話班機會delay (簡直係奇蹟!)

媽媽安排今日著父子裝

入咗一間精品店睇咗一陣, 10點, 都係入閘先喇! 可能因為暑假關係, 都幾多人! 排隊過X-ray, 過Immigration, 都用咗20分鐘, 然後就要搭無人駕駛去211號閘口 (上次搭尊貴的CX就唔駛, 可以就咁行去閘口)。去到閘口, 已經10:35, 原來已經可以登機(好似己經Final Call)! 一家四口係閘口前面影返張打咭相, 上機lu...... (冇人排隊)

上咗機, 唔Full, 仲有大把位, 早知我地一家四口霸2個窗口位啦! 今次又係爸爸同孖寶坐, 媽媽隔住條走廊, 坐係2個日本女士隔離。

由於實在太多飛機排隊起飛, 所以等咗好耐, 大概11:20起飛, 機長廣播話飛行時間大約2小時50分鐘, 唔駛3個鐘, Very Good! 熄咗安全帶燈號冇幾耐, 空姐就派兒童餐, 今次的兒童餐係肉醬長通粉, 孖寶都肯食, 不過, 都係食咗一半就話飽, 食唔晒! 之後就係正式派餐, 我地坐得後, 所以唔駛等好耐, 我同老公都揀咗日式豬肉飯, 味道正常, 多汁, 可以撈飯食, 仲有冷麵、餐包, 甜品係百福豆腐花, 都食得幾飽。

正常飛機餐, 都算係幾有良心架喇!

食飽飽, 填埋入境表格, 瞓咗一陣, 原來仲有差不多30分鐘就落機。孖寶一人一部pad, 打機睇戲, 全程冇扭計, 好乖, 飛機係下午3:10降落宮崎機場, 個機場好細, 排隊過關, 拎埋行李都係3:35。今次又係要打電話去租車公司, 叫佢地派Shuttle過黎接我地, 不過, 今次機場有旅客Counter, 可以叫機場職員幫我地打電話。3:50到咗租車公司(其實只係機場轉個彎就到), 又係我負責辦手續同俾錢, 老公就睇住孖寶, 幫我影相, check 車, 搬行李上車。

 一眼睇晒的機場, 睇相以為係Subway

填一大堆資料先至可以租車, 仲要你睇安全駕駛Video

行程的第一站係西松屋, 因為要買玩具(旅行禮物)俾孖寶, 等佢地可以係旅行呢8日入面玩。下午4:30到咗西松屋, 唔算大, 但唔多人(起碼冇大劣人先啦!), 行得好C服, 不過, 真係冇咩睇得啱, 只係買咗D毛巾仔, 餐具俾孖寶, 孖寶都揀咗好耐, 唔知買咩玩具, 哥哥見返上次部電話(佢漏咗係東京機場), 不過, 佢好似唔想買返, 佢想買第二樣野, 最後, 係爸爸的引導之下, 佢2個揀咗變形機械人(媽媽話哥哥個機械人咪同Poli一樣, (佢以前好鍾意, 而家已經唔like), 佢話: 唔同架! 係唔一樣! 媽媽即時回應: 係既! 係既! 係唔一樣!)

離開西松屋, 下午5:30先去酒店check in, 因為今晚7:50係花火大會, 酒店附近會封路, 都係早D返去, 順便睇吓附近咩情況。我地呢2晚都會住係宮崎Green Rich Hotel (グリーンリッチホテル宮崎),   要開名因為間酒店同我地係網上睇到的comments同相片有好大的落差!!!

首先, 25,800円住2晚, 唔算貴, 都係budget hotel, 唔應該有期望, 但佢收我對孖寶的早餐錢, OK! 佢2個5歲, 係小學生以下, 但個職員死都話我2個要計小學生價錢(每人每日900円, 我無啦啦要俾多3600円, 無論我點同佢講, 佢都唔明, OK! 我費是嘥氣, 豪俾你!) 計埋泊車費, 加加埋埋超過30,000円, 咁既價錢, 我可以有其他更好的酒店選擇囉!

然後上房, 架lift門打開, 我以為自己返咗舊屎香港D七層徒置區, 露天走廊, 生锈鐵門, 鐵籠露天樓梯, 仲好似有個機房係隔離, 好嘈, 入到房, 好up dup, 開咗房燈, 好似好D, 入去個浴室睇吓, 嘩! 果陣味! 我記得係10年前去北海道住果間B&B個浴室陣渠味, 救命呀! 我今晚點係度沖涼呀?! 冇眼睇! 至於間房, 希望張床單同被舖係乾淨架啦! 因為我見到間房每一寸表面, 包括電視, 枱面, 茶几, 都係塵! 救命呀! 點解間野係Jalan個總評分會有4分? 仲要住2晚, 今次真係中咗好大個伏, 我好想喊!

 酒店外觀都已經唔係太吸引

去西松屋買咗一人一份旅行禮物

由於距離花火大會仲有一段時間, 老公提意去行吓AEON MALL, 但由於孖寶+老公都好似俾張床痴住咗咁, 孖寶掛住玩新玩具, 老公就機不離手, 搞到6:20先至離開酒店, 睇怕老公都冇心想去睇花火架喇! (我心入面同自己講, 算啦! 舊年去名古屋都睇咗, 一生人可以睇到一次, 已經好幸運架喇!)

晚上6:45到咗AEON MALL, 泊好架車, 落一層已經見到龍貓專門店, 好想睇吓有冇飯盒袋同2019 Diary, um...... 係冇既! 老公就去咗模型店Hobby Zone睇模型, 係龍貓店出返黎, 過咗2個舖位, 我見到我最鍾意的 -- 森林家族專門店呀! 我二話不說衝咗入去, 老公你睇住2個仔先! 嘩! 好多款式, 仲俾我搵到個噴水池 (我搵咗你好多年喇! 連Amazon JP都搵唔到你, 我以為我一世都搵唔到你架喇! 好滾動! 係唔係應該買2個呢?!) 之後, 又俾我見到搖搖板同熱狗車(其實香港有, 不過我樓下千色店冇囉!), 仲有南瓜車呀! (我係Amazon見過, 係最新出的童話系列, 香港未有架!) 雖然講咗好多次, 但都要再講, 佢D大屋真係好平好平, 係香港的半價, 可惜屋企冇位擺......

收穫豐富(Only me, hoho!), 晚上7:30, 好肚餓, 食飯喇! (花火大會...... 我地註定係有緣無份架喇!) AEON MALL的G/F一定有食街, 不過, 呢間AEON MALL, 好大, 好似有幾座buildings咁, 我地都搵咗好耐先至搵到條食街, 黎到日本緊係要食日本野啦! 孖寶好like大蝦天婦羅, OK, 叫一個冷麵+天婦羅, 一個刺身丼, 一個滑蛋吉豬飯, 食到好飽, 好似叫多咗, 食完飯已經8:20, 我同老公講, 花火大會去到9點, 老公話, 咁仲可以返去, 睇吓睇唔睇到喎!

就係去呢間食

原來係妄想, 因為周圍都封路, 好塞車, 本來10分鐘的車程, 行咗30分鐘, 去到酒店附近條街, 離遠見到仲放緊煙花, 不過, 俾前面D建築物阻住, 由於D車塞到停咗, 我提議帶孖寶行前D, 睇吓河邊有冇位睇得清楚D, 原來超多人, 冇可能行到去河邊, 我地三母子企咗係路口條燈柱前面, 得我一個人欣賞花火, 由於周圍勁多人, 天氣又熱, 孖寶睇咗3分鐘就嚷著要走, 我惟有whatsapp老公, 睇吓佢係邊, 原來佢都差不多轉到入黎酒店條橫街, 我地三母子係路口上返車, 返酒店。

三母子企係呢條燈柱前面睇花火, 

上年名古屋就坐係河邊睇... 唉! 算吧啦!

老公話原來都睇唔到花火, 早知係AEON MALL買埋生果同飲品先, 唔駛急住走啦! 我話咁不如你去街口間Family Mart買啦! 於是我帶孖寶上房沖涼先, 老公行去買野!

今晚9點返到酒店, 唔算太夜, 但都係唔知點解, 搞到成12點先至瞓!

今晚瞓得好差, 瞓吓醒吓, 可能因為"生保"床, 瞓唔著, 加上細佬成晚不停踢開張被, 又兜巴車我塊面, 我成晚好似冇瞓過咁!

買俾孖寶的開學用品

我的戰利品! YEAH!

Day 1 完