南九州親子之旅2018 - Day 3

2018.08.06 (星期一)

今日仍然係陽光普照, 天氣酷熱!

早上8:30又去返尋日個天台餐廳食早餐, 仍然都係果D野食, 尋日發現原來哥哥鍾意食豉油撈凍豆腐, 今日特登畢一舊俾佢食(佢成舊食晒), 另外, 我尋日食咗條炸番薯(面層好似我地中國人過年食果D糖冬瓜咁), 今朝夾俾佢2個試吓, 佢地超like, 仲話要食多幾條!

食完早餐, 差不多10點check out, 終於都bye bye呢間全完唔掂的酒店喇! 我地今日的行程係去睇火山, 浸足湯, 坐汽車渡輪去鹿兒島, 係酒店游水。鹿兒島間酒店雖然係Jalan個評分都唔錯, 但中過一次伏, 好驚今晚間酒店都係中伏, 唔敢太大期望!

我地揸車去湯之平展望所睇火山, 要揸2.5小時, 我以為係睇對面岸的霧島火山, 但老公話係睇櫻島火山呀! 啊! 由於要揸咁耐車, 好悶, 我地10:30經過一間超級市場, 入咗去買雪糕食, 超市隔離係一片太陽花田, 不過, 可能已經過咗最靚的時間(太陽花好似係6-7月盛放), 一家四口自拍, 都睇唔到後面的太陽花(只係一片雜草), 走lu......

今日好好天呀! 最啱曬襪!

太陽花海呀! err......

中午12:30左右到達湯之平展望所下面個停車場, 一落車, 成地都係火山灰, 要慢慢行, 但孖寶就特登踢起晒D火山灰囉! 上到展望台, 冇冷氣, 好熱, 同埋其實唔係好知邊個係火山, 估計係爆到爛晒果座山掛(憑我所如無幾的地理知識)。孖寶對呢D自然景觀, 無乜興趣, 成日話要走! 由於真係好熱, 又冇野睇, 所以都係走喇! 臨走係舊石碑前面影咗張全家福, 叫做到此一遊啦!

下午1點揸車去櫻島旅客中心, 參觀展覽廳, 之後去睇咗一套介紹櫻島火山的短片。然後行去旅客中心對面個公園浸足湯, 哥哥有過一次經驗, 今次知道唔駛除褲, 只係除鞋除襪, 所有浸足湯的都係香港人, D香港人講野好大聲(唔好成日話D大劣人冇文化, 香港人出到去都好冇文化, 影衰晒我地), 佢地好嘈, 所以都唔想浸咁耐, 加上天氣咁熱先黎浸腳, 就好似大熱天時著羽絨行街咁。浸咗10分鐘, 抹腳, 著返鞋襪, 行出D睇吓海景喇! 不過, 呢個時候, 哥哥話唔舒服, 想嘔, 吓? 係唔係中暑呀? 可能太熱, 又冇乜飲水! 爸爸抱住哥哥, 我地離開喇!

 爸爸講解火山的形成, 孖寶好留心聽!

爸爸頭頂噴煙呀!

唔該晒對面個哥哥仔幫我地影相, 佢好似係台灣人

下午2點返上車, 哥哥話好D, 冇想嘔喇! 由於荒山野嶺, 都唔知有咩食, 好在車上有麵包, 香蕉同零食, 就這樣, 媽媽捱過去了! 2:20到咗渡輪碼頭, 好多車, 要排隊, 今次唔駛落車買飛, 去到收費亭, 個職員望一望車入面有幾多人, 就即刻講得出要俾幾多錢。上到船, 泊好車, 我同孖寶行上去乘客艙, 因為好熱, 要涼吓冷氣, 老公唔知搞乜, 等咗佢好耐都唔見佢上黎! 由於船程只係15分鐘, 冇買蝦條餵海鷗, 情願餵飽自己好過, 一家四口繼續食零食。

汽車渡輪碼頭

孖寶第二次搭汽車渡輪

下午2:50到咗鹿兒島, 我地先去酒店check in, check in 前係酒店對面間7-eleven買咗一盒冷麵(細佬話好想食), 一條珍寶腸, 一條腸仔。去到酒店, 老公泊車, 我同孖寶入去大堂, 我去check in 先, 個大堂唔算豪華, 但堅係酒店, 同前兩晚住果間賓館相差好遠。

我地book酒店時request咗high floor and seaview, 入到房, 嘩! 好靚呀! 雖然兩張床都唔算大, 今晚瞓覺可能有D迫, 但個seaview簡直係無敵呀! 今次冇中伏喇! (終於都放心晒!) 然後拿拿林拎返頭先買D野出黎食, 好肚餓呀! 3:30都未食午餐, 想餓死人咩?!

無敵Seaview, 望到正櫻島火山

食飽飽, 抖一陣, 下午4:10換泳衣落去酒店2樓游水, 泳池唔算大, 不過唔多人, OK啦! 但唔知點解, 一落到去就吹大風, 收晒太陽, 係水入面都尚算OK, 上水就好凍! 而且, 我發現泳池入面有小強, 好驚呀! 已經唔想游喇! 只係想盡快離開! 陪孖寶浸咗一陣水, 一家四口急急腳走去隔離浸溫泉池, 好溫暖, 好C服呀! 但係呢個時候, 爸爸叫我去換衫先, 之後再出黎同孖寶換衫...啊... 下午5點返房同孖寶沖涼, 老公洗咗一大堆泳衣同毛巾(洗到手軟, 佢話下次唔好游, err... 但我安排咗Day 6 去城島高原遊樂場玩水喎!)

下午5:45出發去Bic Camera, 係加插行程, 老公之前search咗, 不過, 可能因為放工時間, 一開車已經超塞車, 孖寶因為放電過度, 上車即瞓, 本來10分鐘車程, 行咗30分鐘, 而且, 去到先至發現間Bic C好似係火車站入面, 車站周邊的停車場係有料架, 同埋都幾貴吓, 30分鐘要200円, 老公見到咁既價錢, 心灰意冷, 我話咁不如去返AEON MALL啦! 其實AEON MALL係酒店南面, 我地而家係酒店北面, 要行返回頭路, 所以又用咗30分鐘去返酒店, 繼續向南行, 由於已經差不多7點, 去AEON MALL 已經冇乜意思, 我地決定求其搵個商場, 入去食飯。

去咗間唔知咩商場, 有鞋賣(老公知我想黎買jelly beans同涼鞋, 就呢度啦!) 老公叫我落車睇吓野先(孖寶仲未瞓醒), 不過, 個商場真係好細, 有間好大的書店(日文唔識睇), 冇喇! 睇咗一間賣鞋同一間賣衫的舖頭, 冇野啱! 老公叫醒咗孖寶, 帶埋佢2個入黎商場搵我。我地上咗2樓, 原來有機打, 孖寶一人玩咗一舖Mario (已下令嚴禁雙打, 因為輸咗果個會爆喊)。打完機, 見到水牌話樓上有日本餐廳, 即管上去睇吓, 上到去, 喂, 停車場黎架喎! 再行前D, 真係有間日本餐廳, 好似食放題, 但都有Set食, 雖然貴貴地, 是但啦! 就呢間啦!

入到餐廳, D燈光好暗, 好浪漫, 有大玻璃睇到出面的夜景, 我地坐卡位, 唔係窗口隔離, 但都可以睇到出面的夜景。我同老公叫咗每人一Set, 一個天婦羅Set, 一個刺身Set (因為唔肚餓, 同孖寶Share食都夠)。原來個Set都幾多野食、有沙律、前菜、幾碟小菜、主菜、湯、飯、蒸蛋, 只係冇甜品啫!

豐富晚餐

食完飯, 去超市買飲品同水果, 哥哥嚷著要買花火黎玩(佢今日下午係7-eleven見到有), 係超市都有花火賣, 但老公話唔好買住, 返到酒店附近先買, 佢話驚太夜玩唔到, 唔買住! 結果, 由商場返酒店一路上, 我大大話話落咗車3次, 續間便利店睇吓有冇花火賣, 原來係冇既! 最後咪又係去返酒店對面間7-eleven買, 點解頭先唔係超市買埋呢? 又多選擇, 又平D!

由於已經晚上9點, 我話唔知可唔可以係露台玩呢? 不過, 講完自己個心都虛虛地, 應該係唔可以的! 老公話試吓囉! 我地熄咗房燈, 熄埋冷氣, 閂埋露台度門, 一家四口企係露台, 由細佬試坃第一條花火, 嘩! 都幾大煙, 會唔會俾隔離房發現, 投訴我地? 老公話D煙都冇飄去隔離, 不過, 玩咗3支之後, 房入面個電話就響起, 大鑊! 正當我推開露台門, 想入去接電話之際, 有人拍門, 然後我發覺成間房都係煙, 打開門, 連走廊都係煙! 今次好大鑊! 原來個天花板個煙霧偵測器著咗燈, 酒店經理話: We need to call the Fire Department, please don't play here, don't play around here, you need to go near the ocean! 搞咗一大輪, 開返窗等D煙散去, 酒店搵CF上黎拆咗個煙霧偵測器, 冇事喇! 但細佬已經驚到唔敢再玩。

爸爸話落下面公園玩, 吓? 經理話要near the ocean喎, 但爸爸同細佬講, 公園隔離咪係ocean囉! 一家四口落咗公園, 有街燈, 好光猛, 但細佬不停話驚黑, 想返上去, 其實細佬同媽媽一樣, 我地都係好守規舉的人, 俾人鬧完, 已經驚到唔敢再玩! 我最明白細佬呢刻的心情(因為我的心情都係一樣), 我話我同細佬返上去先, 爸爸你同哥哥繼續玩啦!

哥哥好Like玩花火

爸爸同哥哥玩咗20分鐘左右, 都返上黎喇! 爸爸話玩到手軟, 玩唔晒, 掉咗! 哥哥話好好玩, 可憐的細佬, 只係玩咗頭一支火花, 就冇再玩, 仲要帶住猶有餘悸的心情瞓覺, 慘慘豬, 都係爸媽唔好!

發生咗一件咁"七"的事件(同我幼稚園果時叫錯咗老師做媽咪一樣咁"七"), 我都冇乜心機, 都係瞓先喇! 希望聽日check out時, 酒店唔會收我地extra charge啦!

Day 3 完