然兄逸弟: 南九州親子之旅2018

2018.08.07 (星期二)

今日仍然係非常好天, 非常熱, 好在今日的兩個行桯都係內室 -- 鹿兒島水族館同埋人吉鐵道博物館。

早上8:30左右落去食早餐, 廳餐環境舒服, 我地坐窗口位, 有自然光透入黎。早餐選擇都算OK, 由於係酒店級數, 所以有廚師即場煎蛋同煎西多士(好好味, 但個包索晒油, 唔可以食太多)、牛角包、凍豆腐, 由於每日都唔知有冇得食午餐, 我仍然係狂隊包, 隊飽晒自己先!

就係天花板呢個煙霧偵測器

早上9:40 check out, 好在冇收我地extra charge! 揸車去水族館, 10:05到達, 泊車係停車場, 行過對面水族館正門買飛, 好曬, 天氣熱到跟本唔可以留係戶外超過5分鐘! 買完飛, 第一時間叫孖寶去廁所, 因為一陣10:30有海豚表演, 孖寶想去睇隔離個展覽廳, 唔好喇! 要入去霸定位先, 一陣好多人架!

係觀眾席搵咗個唔會濕身但又唔太遠的有利位置

坐咗15分鐘, 期間見到D海豚游黎游去, 好貪玩, 衝上岸然後"扇"返落水。10:30表演開始, 不過, 原來唔係表演, 係不停咁講解海豚的生理結構同習性等等, 講咗一大輪, 終於都有海豚表演喇! 個水池唔算大, 5條海豚一齊表演, 真係好驚佢地"撻"咗出黎! 一路睇一路替佢地擔心!

好驚佢地"撻"咗出黎

整個環節大概20分鐘(海豚好似表演咗5分鐘左右, 講野就講咗15分鐘咁耐), 之後我地行去對面的展覽廳, 有鯨鯊(但就冇沖繩個海之美水族館咁大條, 咁壯觀), 細佬好有興趣, 拉住我隻手, 睇完一個又一個的水族箱, 至於哥哥就冇乜耐性, 扯住爸爸隻手, 成日想行去前面。

大約中午12點, 我地離開水族館, bye bye鹿兒島喇! 下一個景點係人吉鐵道博物館, 行IC(老公話唔係IC, IC係Interchange咁解, 應該係講行高速公路)都要揸1.5個鐘車, 中途要入油(今次D油都用得幾快, 可能因為成日上車開大冷氣, 天氣太熱喇!) 下午1:30左右去到人吉鐵道博物館, 老公泊架車係博物館對面個波子機場的停車場(應該係唔可以既! 但老公話之佢!) 過馬路行去對面博物館, 老公見到個門口咁細, 吓? 就係呢度嗱? 係呀! 就係呢度架咋! 入到去, 孖寶即時見到架小火車, 我話: 係呀! 就係特登黎呢度玩呢架小火車囉!

我去一去洗手間, 出到黎見到爸爸同孖寶坐咗係"候車室", 原來架小火車就黎開喇! 老公話: 阿媽你快D買飛, 呢個時候, 有個售票員走埋黎同我收錢, 單程每人100円, 我地一家四口來回, 盛惠800円, 孖寶二話不說已經跳咗上小火車喇! 火車開動, 山洞個門自動打開, 原來係出返去頭先個正門隔離, 然後就係一條直路, 沿途好多人同我地揮手, 唔駛1分鐘, 小火車已經到站, 所有人都落晒車, 得我地一家四口, 然後就係自己掉返轉個身黎坐, 小火車司機由車尾走返黎車頭, 小火車又開動喇! 唔駛1分鐘, 已經返到去我地上車的地方, hoho, 不過, 我同老公都覺得幾好玩, 幾得意!

成個火車博物館都係小朋友, 呢度似Playroom多過博物館, 細佬同我發現咗一條秘密通道, 條通道其實係通去外面個花園, 佢叫埋哥哥一齊玩, 我話太熱, 我同佢地玩咗一次就叫佢地自己玩喇! 佢地來回咗幾次, 玩到流晒大汗。之後上咗2樓睇吓係咩黎, 原來係休息室, 外面係露天軌道單車, 但天氣太熱, 爸爸叫佢兩個唔好玩喇!

秘密通道

下午2:30離開, 好肚餓呀! 要搵飯食! 老公話附近有AEON, 去到AEON, 原來係一間百貨公司, 冇餐廳, 好在停車場對面有幾間餐廳, 我地入咗其中一間, 叫咗一個烏冬壽司SET, 一個冷麵天婦羅壽司SET, 今餐好平, 唔過2,000円, 份量都唔少, 食物質素都OK!

食飽飽, 下午3:10, 又繼續上路, 我地今晚住熊本, 所以要繼續行高速, 又係要揸1.5個鐘先至到, 由於尋日係鹿兒島去唔到Bic Camera, 老公話熊本都有, 於是決定去咗Bic Camera先, 然後再去AEON MALL食晚飯。孖寶上車冇幾耐就瞓咗, 我飯氣攻心, 都瞓咗一陣, 經過道之駅, 老公落車買咗杯雪杯一齊食。差不多去到Bic Camera, 見到路邊有Shoe Plaza, 老公知我想搵Jelly Beans同涼鞋, 叫我自己落車睇吓, 原來係冇既, 好失望, 上返車。

下午4:50到咗熊本的Bic Camera, 外面睇, 嘩! 好大啊! 叫醒孖寶, 俾佢地一人食一條蕉先。入到去, 都真係幾大喎! 老公想睇電器, 我冇乜興趣, 我一心係想睇吓有冇森林家族(雖然Day 1已經買咗好多喇!)。賣玩具的地方唔算大, 但都有森林家族同孖寶最愛的Tomy火車同車仔, D森林家族好似陳列品咁, 個盒俾太陽曬到甩晒色, 同埋冇乜選擇(我想要既都冇!), 但真係平過出面, 架熱狗車賣緊2,600円(我Day 1係專門店買, 折咗連稅都要3,400円), 雖然買唔到森林家族, 但俾我搵到一千零一盒的Little Twin Stars 3D Puzzle (1,380円), 老公買咗大量的車仔, 孖寶每人揀咗1架特價火車(又係旅行禮物), 我醒起上網有優惠券, 但要出示Passport(我拿拿林返去車度拎), 優惠券有得免稅同7%OFF, YEAH!

好似好大間啊!

孖寶啱啱瞓醒, 食條蕉先落車

大家都有收穫, 好開心啊!

下午6:15離開, 去AEON MALL喇! 由於之前係宮崎AEON MALL的Cecil McBee睇中咗條半截裙, 想睇吓呢度有冇, 老公叫我去睇啦! 佢睇住孖寶! um...... 咁我唔客氣喇! 原來呢間AEON冇, 但行行吓, 俾我見到有間Oriental Traffic (雖然佢D鞋全部都係Made in China, 但設計就充滿日系感), 門口有對涼鞋, 係我想搵的拖鞋款, 鞋面係米色布, 打咗個蝴蝶做裝飾, 係你喇! 我搵咗你好耐啊! 最重要係, 全店50% OFF, 對鞋3,450円咋(即係HKD250咋), 同埋有我著開的M碼, 我叫店員俾我試吓, 好靚啊! 唔好諗咁多喇! 買啦!

Whatsapp老公, 孖寶係Playground玩緊, 換我睇住孖寶, 老公又去Hobby Zone睇野。晚上8點, 要食飯喇! 冇咩選擇, 去返我地成日去果間"五縠", 叫咗2個SET+1個兒童餐, 有得揀玩具, 孖寶一人揀咗一個玩具。食完飯去Baskin Robbins買雪糕做飯後甜品, 孖寶排住隊輪流食, 好搞笑! (我拍咗Video)。原來已經9點, 商場要閂門喇! 好在AEON超市果邊未閂門, 我地拿拿林去買D飲品同水果, 返酒店喇!