然兄逸弟: 南九州親子之旅2018

2018.08.08 (星期三)

今日仍然係非常好天! 旅程已經過咗一半喇! 而我地亦由南九州去咗中九州, 今日會由熊本一直向東行, 早上去阿蘇牧場, 下午去阿蘇火山, 夜晚去別府, 會係別府住3晚, 住返上次間亀之井酒店(因為價錢合理, 又有3張床, 日式早餐可以同孖寶Share食, 唔駛另外收費, 最重要係 -- 孖寶好鍾意玩酒店3/F個兒童Playground, 但其實個Playground係俾BB玩囉!)

今日都係差不多8:30左右落去食早餐, 食早餐的地方好Decent, 我地坐係窗口位, 可以睇到熊本城, 不過, 成個餐廳都係香港人, 唔似旅行團, 我估係遊學團, 因為每個family都有2個小朋友, 且而講野好大聲, 次次見親有香港人地方, 都好嘈, 香港人, 唔該唔好成人話大劣人, 只係50步笑100步, 我地仲成日鬧孖寶係公眾場所講野大聲, 原來, 其他香港父母, 係唔理D仔女講野有幾大聲, 由得佢地架! 我地算好好家教!

食完早餐, 爸爸同孖寶出去外面個平台行吓, 順便影吓熊本城(其實維修緊, 搭晒棚, 冇野好影!)。9:15返上房, 執埋D行李, 10點check out, 走lu...(已經係第2次黎熊本, 但每次都係路過瞓一晚, 真係諗唔到熊本有咩啱孖寶玩, 唔好同我講, 去探熊本熊, 孖寶話: 見到隻熊就好嬲, 想打佢! wakaka......)

老公去停車場揸返架車過黎, 原來唔記得拎雪櫃入面罐咖啡, 我去Reception拎返條房匙, 上房幫老公拎返, 返到落大堂, 發覺原來成袋洗咗未乾的底衫褲漏咗係大堂張凳, 好在因為拎咖啡, 先至發現, 老公仲話我: 乜唔係你一直拎住既咩? 喂! 大佬呀! 我要去check out, 咪擺低袋衫同D喼係大堂先囉! (你拎喼果時都見唔到袋衫, 係唔係你眼大睇過龍呢?!)

早上11:10到咗阿蘇牧場, 今次呢個牧場比起舊年暑假去果個名古屋牧場, 乾淨企埋好多, 因為舊年的不愉快經歷(細佬整完雪糕之後, 發脾四!), 所以今次事前冇報名參加牧場的體驗班, 一心諗住兜個圈, 餵吓羊咁, 等到就揸埋牛奶, that's all!

牧場入場費每位350位(大小同價), 入到去, 所有人都行晒去一間屋仔度, 我地都跟住行過去, 隔住個窗望入去, 見到好似係體驗班的課室, 我問: 咁參唔參加體驗班呀? 11:45有芝士製作體驗, 老公話: 參加啦! 於是去Counter報名交費用, 然後見到隔離有架拖拉機卡車, 可以遊牧場一圈, 都好喎, 咁鬼曬, 坐車C服好多! 坐車好似每位200円, 卡車11:30出發, 遊一圈約15分鐘, 啱啱好趕得切返黎整芝士。

早上11:45, 我地係課室門外排隊等上堂, 今次整芝士的方法, 同上次去北海道整的方法, 係完全唔同, 老師一輪咀講咗15分鐘, 我地一家四口呆晒, 然後就開始整, 老師每人派咗一舊舊好似芝士咁既物體, 都已經由牛奶變咗固體, 仲有咩整呀? 佢叫我地切片, 好薄, OK! 切完, 就加D滾水落去, 然後用2支木棒搓佢, 搓到變返一舊野...... 啊...... 最後就係雙手浸係一盤冰水入面, 然後徒手拎起滾水入面舊野, 好似扭毛巾咁, 幫舊野搾水, 老師叫我地試吓搣開舊野, 睇吓有冇拉絲的效果, 係有既, 然後老師話叫我地食咗佢...... 吓? 食咗佢? err...... 老公搣咗少少出黎俾孖寶食, 我都食咗少少, um...... 咸咸地, 質感有D似水牛芝士, 應該都係芝士黎! 成功喇! 老師再叫我地用手指點D滾水黎lam吓...... err...... are u kidding?! okok...... D水好咸架! 原來係煲滾咗的鹽水黎! 老師話舊"芝士"要留低, 佢會放入保冷袋, 一陣再黎拎, OK!

我地的製成品, 睇見都......

整完芝士, 我地去咗餵羊仔, 孖寶好鍾意(佢地以前好驚), 想搵騎馬的地方, 睇住個地圖, 明明係果度, 結果係冇既, 搵唔到! 下午1點搾牛奶, 12:45開始賣飛(搾一次奶300円), 由於時間差不多, 媽媽仆到去排隊, 買完飛, 仲要等好耐, 有好多日本人已經排晒係度等, 但係烈日當空, 就算擔遮都係好熱, 好曬, 老公話搵個樹蔭坐吓先, 等其他人搾牛奶先, 到走得七七八八先至返去排啦! 等到下午1:20, 差不多喇! 原來每人係冇5分鐘榨牛奶, 只係搾幾吓, 今次細佬仔先, 之後到哥哥, 老公又話佢都想揸吓牛乳(頭), 但佢係冇買飛der~ 搾完牛奶, 每人可以拎一樽牛奶, 我揀咗原味同咖啡味, 孖寶唔like飲奶, 話冇味, 好似水咁!

佢地以前好驚餵羊

曳曳豬, 扯人地D羊咩鬚

細佬先試搾

輪到哥哥搾

行行吓, 俾我地見到係邊度騎馬喇(騎馬一圈每人500円)! 細佬話佢都想騎(佢以前好驚, 唔敢騎, 鼓勵佢, 佢仲會發脾四, 但佢今次主動話想試吓騎), 騎完之後, 細佬話好好玩! 唔驚! (今日的我打倒昨日的我), 之後輪到哥哥騎, 隻馬本來停低咗俾我地影相, 哥哥貪玩打隻馬, 搞到隻馬想走, 好在隻馬冇起跑咋, 佢墮馬都似!

細佬第一次騎馬, 佢話好好玩

下午2點左右, 唔覺唔覺已經係呢個牧場駛咗6,000円, 離開前買咗盒芝士餅一家四口食, 臨走的時候, 我肚屙, 唔知係唔係頭先食咗果D所謂"芝士", 好在最後都冇拎到。今日又係冇午餐食, 因為係荒山野嶺, 我地惟有係車上食包同零食, 食唔飽, 但唔肚餓囉!

下午3點, 到咗阿蘇火山, 老公話上咗火山先定係度落車行吓先, 我話橫掂孖寶瞓咗, 上咗火山先啦! 去到閘口, 個職員講咗一大堆日文, 唔知佢講乜, 然後佢俾咗張紙我地, 有中文, 內容大概係話上火山有危險, OK! 知架喇! 諗住上山之際, 個職員突然收到call, 叫我地兜返落黎, 吓? 咩呀? 跟住, 周圍都係廣播, 由於釋出火山氣體, 火山口要封閉, 唔知幾時會重開! 吓? 一秒鐘之前仲得架! 個閘口都未閂, 如果早一個鐘黎, 就可以上到去睇喇! 係牧場留耐咗, 本來行程真係plan咗2:30到火山口架! 原來要睇到火山口, 係唔容易架! 2010年同老公黎都封咗山, 第二日再去先至開返。其實, 我有少少想等吓, 希望佢會好快開返, 但係我地睇完ASO Super Ring之後, 都仲係話唔知幾時開返, 算吧啦! 我地走喇! 今晚要去別府, 仲要揸2個鐘車先至到!

去到就封山

下午4點左右離開, 揸車期間, 見到路邊有人餵馬, 落車睇咗一陣。晚上6:45, 終於到咗別府的Youme商場, 由於冇食午餐, 我地即刻去搵間餐廳食晚飯(去返上次去食過間日本餐廳)。食完飯, 去超市買飲品、生果、甜品, 返酒店lu...

酒店好近, 只係3分鐘車程, 8:20返到酒店, 老公去泊車, 我去check in, Reception個女仔初頭好好笑容, 係咁用日文同我講野, 但當知道我唔識聽日文之後, 就即刻變臉, 塊面黑晒, 冇晒笑容, 佢同我講, 2個小朋友食早餐要俾錢, 我話我之前住過呢度, 去日式餐廳食日式早餐SET, 小朋友可以Share, 唔駛錢, 佢話唔得, 佢再問佢個同事, 都話唔得! 我唔睬佢! 最後, 我問佢Amazon寄咗D幾箱野黎, 佢話係呀! 已經擺咗係房, OK!

上到房, 老公見到幾箱Amazon, 已經急不及待想拆, 但因為孖寶想玩Playground, 我地就落咗去3/F先, 老公去浸溫泉, 我睇住孖寶玩, 老公浸完, 輪到我, 老公話佢同孖寶上房沖涼先, OK! 黎咗日本N次, 第一次覺得浸溫泉, 好唔文明, 好似屠場入面D豬隻咁, 又好似納粹時期D猶太人集中營咁, 而且好多大劣人, 好嘈, 仲有個男仔高到佢阿媽心口, 仲跟阿媽入黎女湯! 我第一次咁冇癮, 好唔想浸, 好想離開, 但已經除晒衫, 洗濕咗個頭, 惟有草草了事! (我決定之後兩晚都唔會再去浸)。

返上房, 老公幫孖寶沖完涼, 準備開箱儀式, 孖寶好期待, 因為老公早幾日上Amazon買多咗幾架Tomica車仔, 其中有2架係送俾佢地, 我都有2箱, 係出發前上Amazon買的Majestic Legon, 有4件衫同1條裙, Total大約12,000円, 但係香港買肯定要over HKD2,000。