南九州親子之旅2018 - Day 2

2018.08.05 (星期日)

今早天朗氣清, 陽光普照, 宮崎最高溫度35度。

行程的第二日, 正式展開今次南九州之旅, 今日會去兩個地方, 上午去宮崎市自然動物園入面個機動遊戲樂園, 下午去宮崎科學技術館。

早上8:30左右上去天台餐廳食早餐, 餐廳環境一般, 坐係窗邊冇乜冷氣, 有D熱。早餐選擇唔多(仲要收我2個仔每人900円食D咁野, 佢地又食得少喎, 只係食咗半條腸仔, 一塊壽司蛋, 一片魚, 半塊包(哥哥冇食), 半杯奶, 2位小朋友盛惠HKD130! 唔好意思, 我同老公心入面都講緊粗口!)

孖寶呢餐早餐盛惠每人900円 (睇睇佢隻碟)

早上9:30左右離開酒店, 未夠10點到咗動物園, 停車場泊咗好多車, 所有人都拎住水泡呀, 游泳用品呀, 小朋友就著晒泳裝, 原來呢度有得游水 (天氣咁熱, 要唔要返酒店再拎D泳衣過黎游水呀?)。 排隊買飛入去動物園, 如果想玩機動遊戲, 要入到去再買飛。玩機動遊戲的地方都遠遠地, 好曬, 好熱, 不過, 細佬冇扭計!

爸爸去買機動遊戲全票(每人1,600円任玩), 我同孖寶就入去紀念品店睇吓野, 主要目的係涼冷氣, hoho! 冇乜人玩機動遊戲 (緊係啦! 天氣咁熱!), 我地玩咗好多遊戲, 全部唔駛排隊! 不過, 玩完Go-kart車之後, 哥哥話唔舒服, 暈暈地, 可能頭先玩咗2次過山車, 太刺激! 加上天氣太熱! 哥哥要休息, 冇得玩, 媽媽就陪細佬玩其他遊戲, 哥哥見自己冇得玩, 好唔開心! 爸媽提意佢同細佬玩小火車, 但其實佢都係唔開心, 因為佢覺得細佬玩得多過佢, 唔公平!

 天氣太熱, 玩咗2個遊戲已經要休息, 飲能量飲品

哥哥唔舒服, 只可以玩小火車

(熱到冇其他小朋友玩)

中午12:30, 都玩咗2個鐘, 夠喇! 因為實在太熱, 再留係露天地方, 會中暑der~! 都係走人! 下一個節目係宮崎科學技術館, 要返去市中心, 老公好似冇諗過中途要食飯! 下午1點到咗科學館附近, 我話館入面冇野食, 而我地最少都玩2個鐘, 下午3點出返黎先至食野, 似乎太晏喎! 老公呢刻先至如夢初醒咁, 都係! 咁食咗野先!

由於冇預先plan去邊度食 (因為plan咗都冇用, 有人係唔需要+唔記得要食飯, 所以今次已經冇將"食飯"加入行程表當中)。原來附近冇咩食, 以為有野食的地方, 入到去原來係波子機舖, 超市, 係冇飯食! 見到有間用鋅鐵搭成的貌似香港公廁的物體, 寫住Restaurant, 係個停車場隔離, 猶疑咗好耐, 兜咗好耐, 算啦! 附近都唔會有野食, 就呢間啦! 入到去, 原來唔係公廁, 真係餐廳黎! 而且仲好Decent添喎! 待應安排咗我地坐近門口的四人大枱, 個餐牌冇英文, 又冇圖, 我地惟有麻煩侍應解釋一下係乜, 不過, 個侍應都唔係好識英文, 雞同鴨講咗一輪, 知道有一個係魚, 一個係意粉, 是但啦! 就呢2個啦!

過咗一陣, 侍應拎咗2碟沙律菜+幾片魚黎, 我以為個魚就係咁, 不過, 我地叫咗一個魚咋喎! 原來我地叫果2個係SET黎, 呢個係頭盤, 嘩! 好豐富喎! 之後仲有餐湯 (孖寶都有, 似乎係餐廳送的, 因為我地只係叫咗2個SET, 但有4碗餐湯), 原來個魚係炸魚黎, 而且唔係一般的炸魚, 佢個做法好似我地中式酒樓個雀巢咁, 用D幼麵包住塊魚黎炸, 香脆可口! 至於我個意粉, 原來係番茄大蝦意粉, 仲有少少雞肉添! 最後, 仲有飲品(我地叫咗橙汁)同Tiramisu甜品, 食物味道相當唔錯! 今餐應該係成個旅程最好味的一餐, 又坐得舒服, 侍應服務態度一流! (真係唔好意思, 初頭仲以為係公廁, 原來係好野黎!)

出去埋單的時候, 我讚佢地的食物very good! 佢地好開心! 我地出門口, 佢地都跟住出門口, 睇住我地上車(差D想幫我地開車門, 因為哥哥唔夠力開門), 然後超過90度躹躬, 再不停揮手, 揮到我地架車走為止。(今餐真係食得好開心啊!)

下午2:30去科學館, 停車場爆晒, 要泊架車係對面個有料停車場, 由於8月4-5日係科學祭典, 所以入場無料, 孖寶見到2樓有隧道玩, 嚷著要上去玩, 走黎走去, 爬高爬低, 好開心! 細佬仔玩到流晒汗! 玩咗好耐好耐 (細佬本來話冇野玩, 同爸爸走先, 我同哥哥留係度, 點知哥哥玩到唔捨得走, 爸爸又帶返細佬返黎, 又玩過) 最後, 差不多下午4:30, 走喇!

爸爸想去睇模型(佢係香港已經search咗模型舖個地址), 好近科學館, 只係5分鐘車程。爸爸同哥哥落車去睇模型, 細佬冇興趣, 同媽媽留係車上涼冷氣, 食Tea!

下午5:30, 我地又黎到AEON MALL喇! 媽媽想去買底衫, 底褲仔俾孖寶, 爸爸就負責睇住孖寶(佢地有得砌Lego), 最後, 媽媽都有少許收穫, 買到底衫同底褲仔俾孖寶, 同埋買到2條Made in Japan的打底裙/褲俾自己(本來想係Amazon JP買, 但要收運費, 放棄咗!) 爸爸都係Hobby Zone買咗2盒小模型(菓子付)。

晚上7:30, 食飯喇! 今晚又係食天婦羅+湯烏冬(阿媽話唔好食咁多生冷野, 要食熱野, 所以今晚唔叫冷麵喇!)。食完飯, 去超市買飲品, 生果, 甜品。 晚上8:40, 揸車返酒店。

晚上9點返到酒店, 沖涼, 食生果, 甜品, 孖寶又係玩到10:30先至瞓, 由於聽日要搬酒店, 媽媽又要執行李(尋日買的森林家族唔可以入喼, 驚壓爛, 要hand carry, 老公話佢今日訂咗盒大大地的Gundam模型 (老公, 我識咗你20年冇聽過你話鍾意Gundam喎!), 擺唔到入喼! 加上原來佢之前係Amazon JP買咗好多火車場景模型同埋Tomica車仔, 睇怕超過20盒, 吓? 唔係咁癲呀化?)

是晚宵夜

我今晚早過尋晚瞓, 不過, 都係同尋晚一樣, 瞓吓醒吓!

Day 2 完