南九州親子之旅2018 - Day 6

2018.08.09 (星期四)

今日仍然係天晴酷熱! 今日去城島高原遊樂場的Kids Driving School, 係今次行程的重點節目!

早上8:30落去酒店地下間日式餐廳(希望佢唔好話要收孖寶錢, 如果要, 老公話唔俾錢, 去對面便利店買包俾佢2個食, 係啦! 其實唔係錢問題, 而係孖寶跟本唔食野, 佢地每人都帶咗包奶去飲, 你夾硬要我俾錢, 然後俾多2 set早餐我地, 跟本食唔晒, 最後都係倒咗佢, 嘥晒D食物!) 入到餐廳, 個阿姐嘰嘰呱呱咁講咗一輪日文, 唔知佢講乜, 總之, 我指住孖寶: We Share! 佢冇話唔得, 佢帶我地入去, 指我地去窗口位坐, 然後, 2個阿姐拎咗2 set早餐出黎, 好多野食! 其中一個阿姐英文好掂, 同我地講, 可以出去添飯, Shabu Shabu 的蔬菜可以出去拎。

2 set早餐, 4個人食, 都食唔晒!

食飽飯, 返上房執埋今日的行裝(今日要游水, 要帶泳衣同毛巾)。早上10點出發去城島高原遊樂場, 車程約20分鐘, 早上10:20到, 買入場券(成人每位1,500円, 小童每位600円, 為咗去玩揸車, 先要擺低4,200円過路費先。孖寶仲好記得Kids Driving School係邊(尤其哥哥, 佢認路好叻, 佢知道轉左落斜路就係), 由於上次已經攞咗駕駛執照, 今次唔需要再上堂, 可以即場買飛玩(600円揸15分鐘), 我預佢地每人玩2次, 買咗4張飛。第一次我坐哥哥架車, 爸爸坐細佬架車, 孖寶好開心, 好興奮, 哥哥揸得好瘋狂, 兩個倒後泊位都好叻, 可能睇得多爸爸揸車。第二次, 輪到我坐細佬仔架車, 細佬揸車好守規舉。玩咗2次, 佢地仲想玩, 於是我買多2張飛俾佢地, 嗱! 最後一次喇! 好熱呀! 好曬呀! 唔得喇! 細佬話: 上次黎就好凍, 好大風, 今次就好熱! 係啦!

 突然好Friend!

中午12點, 我地行去游水的場地, 原來就係冬天玩溜冰個場, 游水又係要另外收費(每人500円, 大小同價), 入咗場, 個場唔算大, 水深只有20厘米, 所以我同老公, 基本上係唔需要濕身, 可以唔換泳衣都得, 不過, 我驚曬黑, 換件長袖泳衣可以保護吓, 女士有更衣室換衫, 男士就只有門口4格更衣格, 孖寶係小朋友, 當眾換泳衣算吧啦!

出到去, 都幾多人, 遊戲設施唔算多, 有手攪式划艇仔, 充氣滑梯, 充氣滾輪, 水上搖搖板, 磨菇花曬, 小水桶, 同一個正常滑梯, 個充氣滑梯都幾高, 孖寶爬上去好吃力, 玩咗2次, 細佬話唔好玩, 佢見到個充氣滾輪, 話好想玩, 於是走去排隊, 孖寶玩得好開心。之後又去玩吓搖搖板, 騎海豚, 哥哥就去玩普通滑梯, 細佬就不停話: 點解咁少野玩? 仲有咩玩? (又開始發怨言!) 爸爸叫佢地再去玩充氣滑梯, 細佬唔想, 我又同佢去排隊玩滾輪。玩到下午1:40, 走喇! 好肚餓! 要食飯喇!

 又要另外收費, 咁其實One Day Pass包咩既呢?

下午2點, 去返上次去過果間餐廳食飯, 我叫咗碗冷麵, 老公叫咗碟焗飯(佢話叫錯野, 好熱, 食得好辛苦, 好在係佢自己叫, 如果我幫佢叫, 又怨死我!), 另外叫咗碗烏冬俾孖寶。

好鍾意見到哥哥肯食野

食飽飽, 老公話隔離好似有個室內遊戲室, 原來係要另外收費(每人600円, 孖寶太細個, 爸爸要陪玩, 都要俾600円), 個遊戲好似障礙遊戲咁, 有好多關要過, 第一關係瑜伽波陣, 第二關係飛索, 之後係攀石, 爬過滾輪, 上斜, 爬牆, 過木橋, 繩網, 爸爸全程陪孖寶玩, 我就負責影相。

 好細心聽講解, 呢個職員D英文相當唔錯

 瑜伽波陣

 攀石要爸爸扶住

 過木橋

Mission Completed!

玩完一大輪, 差不多3點, 我地過隔離間Shop睇野, 我買咗龍貓筷子、毛巾、Little Twin Stars襪。之後去買雪糕食, 下午3:30, 我地走lu... 去到停車場, 先至發覺唔記得拎細佬個水壼, 漏咗係遊戲室, 我拿拿林返入去拎返。

下一站係去血之池地獄, 孖寶因為放電過度, 上車冇幾耐就瞓咗。經過西松屋, 我話想去睇吓有冇兒童拖鞋(細佬對拖鞋, 頭先游水時, 擺咗係池邊暴曬, 結果, D膠溶晒, 兩條帶都甩咗, 著唔返), 不過, 原來西松屋係冇拖鞋賣, 只有涼鞋。

下午4:30到咗血之池地獄停車場, 叫極孖寶都唔醒, 由於5:00就Closed, 爸爸惟有夾硬叫醒佢地。入場費成人每位400円, 小童免費, 原來血之池地獄好細(細過上次去的海地獄), 同埋因為係遊客景點, 好多人! 係個池前面影咗幾張相, 叫做到此一遊, 走人!

今晚又係去Youme商場, 係童裝部買咗對人字沙灘拖俾細佬, 我話細佬你未著過人字拖, 得唔得架? 細佬話OK啦! 晚上6:30左右, 我地入咗間食壽司的餐廳, 原來間餐廳好似上次去Megabox食果間壽司店咁, 有新幹線運送D食物去我地張枱, 由於2點先至食完午餐, 所以唔太肚餓, 我地點咗碗細蕎麥麵、刺身、壽司、串燒、茶碗蒸, 今餐食咗2,800幾円, 老公話唔抵食。

之後去超市買蕉, 去藥房買馬油(哥哥圍住個咀D皮膚爆晒拆, 老公話試吓買馬油俾佢搽)。

行超級市場, 見到擺到好似擺書咁...... D咖喱!

晚上7:50去別府塔, 2011年冬天同老公黎九州, 住咗係個塔隔離間溫泉酒店"望海", 雖然個塔好矮, 但我估上個塔睇吓夜景應該唔錯, 泊咗架車係隔離的便利店, 行過去買飛, 成人每位200円, 上到去觀景台, err...... 開晒白色光管, 咁點睇夜景呀大佬? 個觀景台好細, 行咗一個圈, 冇野睇, 早知唔上黎啦! 中伏!

晚上8:30左右返到酒店, 去Reception拎聽日的早餐券(唔明點解唔俾晒3日的早餐券我, 要我每晚去拎, 驚我走數呀? 但我已經俾晒3晚錢喎!) 職員話我地有箱野, 佢拎俾我, 好大箱, 應該就係老公早幾日上Amazon訂的Gundam。我同老公講: 咁大盒, 冇可能塞入喼, 一係hand carry, 一係你惟有信佢入面真係Gundam, 唔好拆箱, 成盒原封不動寄艙。最後, 老公緊係忍唔住拆咗黎睇啦! 由於老公實在買咗太多Amazon, 我話: 咁啦! 我將所有野pack晒落個大喼度, 騰空個細喼, 俾晒你擺喇! (我係執喼專家, 好多時都可以執到2個喼去, 1個喼返der~)。

 爸爸盒Gundam, 唔好咁大力, 會壓爛個盒架!

是日戰利品

Day 6 完