孖寶升小一 (預習篇)

7月12日(上星期四), 孖寶正式告別校園!

只係放咗3日暑假......

7月16日(今個星期一), 孖寶又要重返校園!

事緣係孖寶的小學, 係7月16至20日(一連五日)舉辦小一新生適應課程, 內容包括模擬早會、排隊、上課、小息、午膳, 讓小一新生9月返學的時候, 能夠更容易適應, 7月16-19日返9點放12:30, 7月20日係結業禮(又黎?!), 家長必須出席, 乜都要家長出席, 個個家長都唔駛返工咩? (原來要好多年假先至可以生仔, 因為學校乜都要家長出席, 仲要係平日, 返工時間, 如果你冇咁多年假, 就唔好生仔喇! 認真的!)

根據孖寶過往的表現同媽媽的經驗, 可以推測得到, 孖寶返適應班的反應會係:

(1) 又要排隊, 又唔准人郁
(2) 老師好惡, 冇愛心, 都唔錫小朋友
(3) 好多野做, 又要做呢樣, 又要做果樣
(4) 又要好專心, 又唔俾出聲
(5) 好悶, 成日上堂, 不停咁聽老師講野
(6) 都唔識得D同學, 冇人同我做朋友
(下刪一千字層出不窮的埋怨說話!)

為咗讓孖寶可以舒舒服服返學(細佬流汗會發忟憎, 哥哥行得耐會不停問N次, 到未呀? 然後發脾氣!), 所以星期一早上(返適應班的第一日), 我陪佢地落樓下等的士, 由姐姐護送佢地返學, 由屋企到學校門口, 快靚正! (不過, 其實等咗5分鐘的士, 哥哥已經講咗N次, 咁耐架!)

見到孖寶著住件oversize的小學校服, 孭住個書包仔,
媽媽想起三年前佢地準備讀幼稚園的情景,

孖寶大個仔喇! 媽媽要學習放手! (眼濕濕)

當日夜晚, 我放工即時返屋企睇吓佢地咩情況, 姐姐話佢地OK! 我再問佢地 --

媽媽: You enjoy?
孖寶: YES!
媽媽: You sure?
孖寶: YES!
媽媽: 今日返學開唔開心呀? (驚佢地答YES太順口)
孖寶: 開心呀!
媽媽: 咁鍾唔鍾意返學呀?
孖寶: 鍾意!

佢地竟然話好開心, 鍾意返學, 我好肯定, 係 -- 神蹟!

媽媽終於放下心頭大石!