孖寶兄弟語錄(17)

(1)  話說孖寶好鍾意踩單車, 有一次係爸爸車上, 細佬出咗條問題考媽媽 --

細佬: 媽媽, 你知唔知我最擅長係乜野?

媽媽: er... 踩單車囉! (心諗佢呢排咁鍾意踩單車, 答踩單車應該啱)

細佬: 錯! 你再估過!

媽媽: 估唔到喎!

細佬: 俾個貼士你! 係踩單車的時候... 轉彎會做咩呀?

媽媽: 咪踩腳踏囉! 定係唔駛踩腳踏, 等架單車自己"扇"呀?

細佬: 錯! 係"掟彎"! 我最擅長就係"掟彎"!

媽媽: wakakaka ...... (笑到收唔到聲! 原來轉彎係唔同掟彎, 多謝指教!)



(2)  話說爸爸經常漏低銀包、手提電話、車匙係屋企或者係架車入面(但媽媽只係間唔中有一次漏低咗銀包或電話, 就會俾爸爸鬧到七彩!) 有一日, 爸爸又漏低咗電話係屋企 --

媽媽: 你老豆又唔記得拎電話喇!

哥哥: 佢應該要食多D DHA!

媽媽: 你講得好啱! wakakaka ...... (笑到收唔到聲!)



(3)  去完日本返黎(天氣好好, 曬足8日) --

媽媽: 我發覺我都曬黑咗! 明明有搽防曬架!

爸爸: (望都冇望過我) 哎吔! 咁慘呀!

細佬: (好認真咁望咗我塊面5秒) 冇呀! 睇唔到!

媽媽: 唔係曬黑咗咁簡單! 係曬咗好多紅印出黎! 我一化妝就知!

細佬: (再好好好認真咁, 望咗我塊面5秒) 都唔覺! 唔緊要啦!

媽媽: hoho...多謝細佬你安慰我呀! (細佬真係媽媽的忠實fan屎!)