然兄逸弟: 東京親子之旅2018

2018.3.28 (星期三)

今日仍然係天朗氣清, 陽光普照! 感恩!

朝早7:45起身, 8:30落去食早餐, 由於呢間係Budget Hotel (住2晚唔駛25,000円), 所以對個早餐都冇乜期望, 亦冇驚喜, 有蛋有包有腸仔, 食得飽就OK!

早上9:45離開酒店, 揸車去森林家族樂園(正確名稱係Grinpa), 10:20到咗樂園的汽車入口(要即時俾1000円泊車費先), 又見到富士山喇! (其實樂園係富士山二合目, 不過, 之前河口湖係富士山的北面, 我地而家就去咗富士山的南面)。

泊好車, 排隊買入場券, 可能個樂園比較隔涉, 所以唔算多人(但排隊買飛都排咗20分鐘, 好在老公幫手排隔離條隊, 我條隊郁都未郁過)。入咗場, 仍然係唔多人, 有摩天輪、空中單車、水陸兩用車、唔刺激的過山車, Go-kart車、迴旋木馬、轉轉千秋、碰碰車, 不過D遊戲設施冇乜保養, 比較殘舊(希望安全啦!), 但呢度勝在少人, 好多遊戲都唔駛點排隊就玩到(只有Go-kart車要排好耐, 但都玩咗2次)。樂園入面有賣森林家族的舖頭, 媽媽當然要衝入去睇吓啦! 嘩! 好多好多森林家族呀! 仲有2018最新款的Pizza店同雜貨店, 香港未見到有得賣, 媽媽睇中咗個Pizza店, 爸爸話臨走先至買啦! 廢是拎住! OK!

一路行上山, 見到玩滑雪兜個斜坡, 有人玩緊雪兜喎! (又話Closed咗?) 媽媽好興奮, 大叫: 去玩喇! 去玩喇! 800円租一個雪兜, 租咗2個。不過, 孖寶乜野裝備都冇喎, 之前以為Closed咗冇得玩, 本來plan行程果陣, 真係諗住頭1日去西松屋買咗防水鞋, 手套同雪褲先架! 老公話唔駛咁麻煩啦! 就咁玩咪得囉! 冇問題呀! OK! (心諗: 好快你對鞋就會濕晒!)

孖寶之前只係玩過滑草, 未玩過雪兜, 雖然個原理係一樣, 但孖寶跌咗落D雪度, 係斜坡中間, 唔上唔落, 對腳藏咗係D雪入面, 爆喊+大叫, 要爸媽跑去救佢地, 細佬發晒脾氣, 你做乜唔過黎幫我? 我對手好凍! 就黎凍死喇! etc. 面對細佬每次D埋怨聲, 媽媽的EQ都好低, 我頂佢唔順, 要爸爸出馬。爸爸話玩雪就緊係咁架啦! 對鞋濕咗之嘛, 好快乾, 你地控制唔到個雪兜, 等爸爸陪你地玩喇! 之後, 有爸爸陪孖寶玩, 孖寶破涕為笑, 玩得好開心, 爸爸係咁叫媽媽一齊玩, 我唔想囉! 我對靚靚粉紅色毛毛球鞋, 濕晒, 就黎報銷喇! 最後, 係爸爸的鼓勵之下, 媽媽都豁出去(對鞋), 同爸爸雙人玩咗一次雪兜, 真係幾好玩! 不過, 我下次一定要有足夠裝備先至玩。(對上一次玩雪兜已經係2006年同老公去韓國)

第一次玩雪兜, 比滑草難控制好多, 好容易中途反兜

第一次玩未濕腳, 所以仲識笑!

哥哥破涕為笑

下午1:10, 開始肚餓, 要食飯喇! 去咗公園入面的"咸蛋超人"主題餐廳, 要自己出去個售票機度買飛, 買咗一碗烏冬, 一個咸超飯, 之後唔夠, 再買多碗拉麵, 3樣野夾埋唔駛3000円(HKD210) (真係要再一次讚吓日本D樂園, 唔似得香港D海XX園, 廸X尼咁, 食碗叉燒飯要HKD150, 仲要係酒店的價錢, 大家樂都不如的質素!)

冇乜人, 好多位, 食物唔貴, 質素OK, GOOD!

下午2點食完飯, 繼續玩, 個樂園唔算大, 但都幾多野玩, 玩唔晒! 玩完機動遊戲, 行去玩摩天輪期間, 見到有個木製的5層高建築物, 外面好大隻字寫住個「忍」字, 然後有四隻字寫住「忍術道場」嘩! 係忍者練習場呀! 見門口冇人排隊, 我地去排吓喇! 初頭都唔知玩乜, 加上個職員D英文... 只係講到幾個單字, 我估計大概係分藍組同紅組(自己揀), 我照例同細佬一組(紅組), 哥哥就跟爸爸(藍組)。首先係係場外掟飛鏢 (哥哥藍組就係射箭), 然後自己行去個建築物入面玩, 中途有D check point, 要收集D印章(所以每人要拎住張紙), 要爬高爬低, 搵暗門, 搵通道, 避開障礙物, 都幾好玩, 一路上上層, 間中會係D木板空隙見到老公同哥哥, 細佬當正自己係忍者咁, 好勇敢咁樣, 一路向前行, 媽媽又要拎住2張紙, 又要爬高爬低, 媽媽就快不行了!

玩咗2次

爸爸帶哥哥去廁所, 我同細佬仔玩咗一次旋轉木馬,

哥哥返黎見到, 即場爆喊! (佢勁嬲媽媽)

有6個呢D咁既Check Points

最後, 終於上到頂樓喇! 行返樓梯落黎, 原來老公同哥哥已經係地面等咗我地好耐! Oh! Sorry!

哥哥同爸爸首先完成, 落返地面

然後, 去玩摩天輪, 遠眺富士山, 好靚! 好C服! (孖寶見到地面有個迷宮, 又話要玩, 唔得喇! 而家4:30, 個樂園5點就閂門, 我地仲未去買森林家族間Pizza屋呀! 本來諗住沿路行返落山, 經過小火車站, 架小火車(係貨車扮的)準備開車, 我地即刻衝過去, 問吓仲可唔可以上車, 結果上到車, YEAH! 唔駛行得咁辛苦喇!

上咗車5分鐘, 哥哥已經攰到瞓咗係我大脾, 去到山腳, 要落車喇! 我同細佬落車先, 同架小火車頭影相, 然後爭取時間去買Pizza屋, 老公就抱住哥哥, 後尾哥哥都醒咗, 影咗幅相, 一齊去買Pizza屋, 盛惠4,300円 (約HKD310), YEAH! 好開心呀!

終於買咗Pizza屋喇!

下午4:45, 行返去樂園入口(出口), 見到一排扭蛋機, 有媽媽最鍾意的森林家族扭蛋(黎咗日本咁多次, 第一次見到有), 又有爸爸最Like的Tomy車仔扭蛋, 結果, 一家四口一齊扭, 孖寶揀咗部Minion扭蛋機, 隻蛋入面係一部mini扭蛋機, 要自己砌, 好得意! 大家都好開心! 今日好充實!

究竟會扭到咩呢?

揸車返御殿場, 趁孖寶瞓咗, 老公話想去AUTOBACS睇吓有冇汽車香薰賣, 有隻新車汽味香薰, 噴咗架車D味就好似新車一樣, 嘩! 好神奇喎!

晚上7:00, 去搵餐廳食飯, 唔去尋晚果間喇! 又貴又唔係好多野食! 搵到另一間日式餐廳, 等咗一陣間位, 等位其間, 孖寶嚷著要砌頭先隻扭蛋的mini扭蛋機, 爸爸返車幫佢地拎, 入座之後, 要自己用牆上部pad點餐, 有簡體字, 點咗2個套餐, 白飯加大(免費)。今晚呢餐平好多, D飯多到食唔晒, 早知唔駛叫加大啦! 浪費咗人地D食物添! 晚上8:20食完飯去超市, 間超市好靚, 原來價錢都貴過人, 只係買咗野飲同泡芙甜品, 返酒店。