東京親子之旅2018 - Day 4

2018.3.27 (星期二)

揀咗今朝8:30食早餐, 校咗鬧鐘7:45起身, 不過, 可能D暖氣實在太乾, 我同老公瞓到半夜都喉嚨痛, 朝早6:30已經醒咗。

由於時間尚早, 我同老公都打算去大浴場浸吓先, 老公叫我去浸先, 佢睇住孖寶(孖寶仍然瞓緊), 個大浴場唔算好大, 沖身位只有4個, 有一個室內熱水池, 室外有一個好細的缸, 有2-3個大媽, 我見室外個缸有大媽走咗, 出咗去浸(自己一個, yeah!), 清晨的氣溫有D低, 但浸係缸熱水裏面, 好C服, 加上望住個湖景, 好正! 不過, 都唔可浸得太耐, 因為老公未去浸, 加上萬一孖寶起咗身, 就好麻煩!

哥哥聞住幅牆黎瞓... wakaka...

我浸完, 返房, 輪到老公去浸, 孖寶仍然瞓緊, GOOD! 大約7:30, 孖寶都瞓醒。刷牙, 換衫, 由於Book咗8:30食早餐(落去宴會場食), 未夠鐘, 老公話想帶佢架無人機去飛吓! 吓? 湖黎架喎, 會唔會跌咗落湖架? OK! This will be the last flight!

架無人機竟然冇跌落個湖

早上8:10, 一家四口又落返去酒店馬路對面個停車場, 今朝路邊仍然好多雪, 孖寶又踢雪(今次係佢地第一次見到真雪, 又真係好難唔興奮既!) 玩完一輪雪, 老公試飛, 大家對住鏡頭Say Hello! 飛咗10分鐘, 收返架機! 竟然冇事, 架機冇跌落湖呀! 老公想再飛多轉, 唔得喇! 差不多8:30, 要去食早餐, 日本人好準時架!

 8:30去到宴會場, 好......好多人, 個宴會場感覺有D賤舊(仲以為會有partition間開, 原來係冇既, 成個學校禮堂咁既空間, 全部人坐晒係地下(有D挨係度, 有D食完走咗, 成枱都係剩飯殘羹, 好似露宿者之家咁, 我地被安排坐係角落頭, 3張茶几砌成一張枱仔(好似就冧就冧咁), 坐地下食, 枱面上一早擺好晒D野食(咁咪凍晒囉! 日本人鍾意凍食!) 有侍應幫我地裝飯, 孖寶有撈飯粉就可以食晒成碗飯, 唔駛食餸 (養佢兩個真係好慳飼料!)

唔算豐富的早餐

食完早餐, 返上房, 本來今日安排咗去Thomasland, 孖寶話: 妖! 唔去! 惟有開埋Youtube俾佢地睇, Thomasland好多野玩架! 去啦! 哥哥開始有D動搖, 咁去啦! 細佬堅持唔去! 爸爸知道咗Thomasland的入場費幾錢之後, 都話唔值得去。兩票反對, 一票讚承, 一票冇所謂! OK! 咁唔去囉! 咁要搵其他野去喎! 去搭纜車睇富士山喇!

早上10點check out, 揸車去纜車站下面個停車場泊車, 行上山坡上面的纜車站, 要排隊, 唔算好長龍, 因為排排吓, 之後望返龍尾, 嘩! 好多人呀! 排咗30分鐘, 上到2/F有售票處, 我用自助售票機買咗飛, 繼續排, 上到3/F, 終於都見到架纜車喇! 一架纜車可以坐20-30人, 冇得坐, 全程企, 仲要好似東華三院籌款咁, 係咁塞D人入黎, 救命呀!

好細架纜車

搭咗大約10分鐘, 上到山, 山上面好很多人呀! 所有人都爭取有利位置影富士山, 我地一家四口本來想自拍, 有個國語人走過黎話幫我地影! 噢! 些些你呀! 影完相, 山上面有條小路, 可以再行上去高D的地方, 孖寶二話不說, 行咗上去, 媽媽係後面: 小心D呀! 慢慢行呀! 唔好踩落D泥度呀! (N次)

 孖寶話呢幅相係佢地上咗富士山...um...

又雪玩

上到去, 冇乜人, 只有2個鬼佬, 孖寶見到有積雪, 又好開心 -- 狂踢D雪+執起D雪黎掉! 玩咗一陣, 落返去頭先好多人果度, 有間手信舖, 入去shopping喇! 買咗幾盒手信(其實之前係温泉酒店都買咗幾盒), 落山喇!

未夠12點已經落咗山, 仲可以去邊度呢? 其實沿住河口湖邊有好多咩咩咩美術館, 間間都唔同主題, 間間都要入場費, 我地揸車去最出名果間, 泊好架車, 行過對面馬路, 經過個花園, 係入口睇吓個Menu, um... 冇咩好睇喎, 又冇花睇, D野都唔啱孖寶, 整音樂盒係要另外收費(咁緊係啦! 老公話入場費咁貴都唔包埋整音樂盒, 唔值得去!) 於是, 一家四口掉頭走!

係停車場周圍的商店行吓 (都係冇咩睇!), 算喇! 走咗! 離開河口湖喇! bye bye富士山喇! 我地去御殿場 Outlet行吓, 順便搵野食啦!

由河口湖去御殿場大概1個鐘車程, 下午2點, 終於到咗御殿場Outlet, 泊好架車, 第一時間去搵野食, 個Outlet好大好多人 (好奇怪點解去到邊都咁多人? 日本人唔駛返工?) 行咗好耐, 饑寒交迫 (冇錯! 有褸, 但唔俾著, 所以好凍! 之前去旅行, 老公自己唔肚餓就覺得人地都唔可以肚餓, 佢今次已經進化到, 佢自己唔覺得凍就認為人地都唔應該覺得凍, 連我想幫孖寶著返件外套都話唔需要!)

行咗好耐(Skip晒沿途的餐廳), 終於搵到Food Court(老公最愛), 佢叫我去買野食 (緊係啦! 你話肚餓嘛, 咁緊係你自己去買啦! 喂! 大佬呀! 我負責keep錢同俾錢啫, 唔代表去買野食都係我嘛! 你都有錢架! 乜你唔係要照顧老婆同2個仔既咩?) 由於我太肚餓, 唔想再消耗體力, 以上的怨言, 我一句都冇講出口, 我死死地氣去睇吓有咩食, 見到有日本拉麵(我最愛), 買咗2碗, 加蛋。老公同孖寶去搵位, 同埋去買野飲 (日本唔興套餐, 野飲通常要另外買, 老公話佢去買喎)。由於我太肚餓, 拎住2碗麵, 手都震埋, 好辛苦先至搵到孖寶坐係邊張枱, 埋到枱, 我二話不說分好4碗麵, 我食先喇! 孖寶繼續油顏色, 老公去咗買2杯珍珠奶茶(日本竟然有珍珠奶茶, 應該係Outlet好多大劣人, 要迎合返佢地D口味!)

食完野, 我終於有返力講到野喇! 我話呢度有LEGO店, 可以去睇吓! 孖寶知到有LEGO睇, 好開心。去到LEGO店, 老公話佢睇住孖寶, 叫我去行吓先! errr...... 咁我唔客氣喇! 辛苦你喇! 我急急腳咁去咗附近的OLIVE des OLIVE同 Sanrio睇吓, OLIVE des OLIVE 最低50% off, 唔算平! (上次去沖繩個商場, D舖頭都係50% off), D款唔靚! 走人! 去Sanrio, 主攻我最愛的Little Twin Stars, 好失望, 冇! 成間舖頭D貨, 好明顯係出面D舖頭賣剩拎入黎賣, 好失望! 走人! 返去LEGO店, 老公都話冇野睇! OK! 咁走人啦! 去停車場之前, 經過franc franc, 入去睇咗一陣, 都係冇野買! 走喇!

LEGO賣得貴過香港

下午3:30離開御殿場Outlet, 去西松屋, 原來間西松屋係一間超級殘舊破落的"百貨公司"入面, 我帶孖寶入去行住先, 老公去泊車, 孖寶好似癲咗咁係舖頭入面你追我續, 我叫佢地停, 無人聽我講, 結果, 細佬俾哥哥kick低咗, 爆喊! 我一人車咗一巴, 然後打俾老公, 老公話佢帶走一個先, 另一個跟住我, 我叫佢帶走細佬。哥哥跟住我, 乖返, 買咗一人一件反斗車王短袖T (今次記得買120碼喇!) 之後上去3/F搵老公, 老公話有Mario玩, 我話好驚喎! 輸咗果個又爆喊! 老公同佢地講好咗, 輸咗唔准喊先至有得玩! 我去隔離100円店睇野, 結果, 5分鐘後, 我係隔離已經聽到有小朋友喊聲! 原來今次係細佬, 連續輸咗2舖, 爆喊, 佢話爸爸淨係幫哥哥, 唔幫佢!

幅相係未爆喊之前影的, 以後唔俾玩雙打

我話不如返酒店check in先, 放低行李, 休息一吓, 沖埋涼先至出黎搵野食, 老公話唔好咁麻煩, 食埋野先至返酒店啦! 於是, 去咗行AEON MAX VALUE超市。

晚上7點, 去行程plan咗會去的"藍屋"日本餐廳食飯, 叫咗一個牛肉壽喜燒, 一個牛肉鍋, 價錢都唔平(我話今日冇去Thomasland, 慳咗好多錢, 可以食好+豪D), 由於牛肉份量唔算多, 叫咗一份追加牛肉。

同老公一人一鍋

晚上8點食完飯, 返酒店, 沖涼, 食生果。孖寶係床上面玩, 跳黎跳去, 結果, 哥哥差錯腳, 跌咗落地, 個頭撞咗埋床腳, 額頭淤咗, 俾老公鬧咗一餐 (好在冇流血, 唔駛聯針, 係日本都唔知點call白車, 送佢去急症!)

 Hea咗成日, 好似乜都冇做過咁, 真係好嘥! 我話聽日一定要去森林家族樂園(媽媽最愛), 不過, 由於今年早咗回暖, 樂園個網頁話已經冇雪兜玩喇! (有D失望!)

聽晚都係住呢間酒店, 所以今晚可以唔駛執行李, 抖吓!

是日戰利品

Day 4 完