然兄逸弟: 東京親子之旅2018

2018.03.30 (星期五)

今早又係好早就起咗身, 我叫老公去大浴場浸吓, 因為房入面個「浴缸」真係好細。

早上8點去食早餐, 都係去返尋晚間餐廳, 但就唔駛行咁入, 枱面已經擺咗好多野食, 有鍋, 有燒魚, 都幾豐富。食完早餐, 返房, 孖寶話想浸多次「溫泉」, 又開一缸水俾佢地浸。

個早餐都算豐富, 同埋附近有窗口天然光, 冇尋晚感覺咁差

早上9:40 check out, 今日係最多野玩的一日! 行程好緊密, 安排咗4個節目。第一個節目係去辻堂海浜公園入面的交通公園, 呢個交通公園係媽媽特登上網搵的, 連旅遊網頁都冇介紹過, 唔好以為香港都有交通公園啦! 咪又係俾D小朋友係裏面踩單車咁囉! 香港D交通公園跟本冇得同人地比! 由箱根出發, 車程大約要1個鐘。

早上大約11點, 到達公園停車場泊車(要收費, 每小時420円, 老公話好貴!) 雖然係平日, 但都唔少車(即係公園入面的小朋友都唔少啦!) 入到公園, 首先就係去搵空中單車, 呢個公園的空中單車有外殼包住(感覺好似安全D), 同埋Keep得好新淨(緊係啦! 要收錢der~ 成人每位210円, 小童100円) 我同逸逸一架車, 我地出發先, 老公同然然一架, 佢地跟住後面, 雖然係第二次踩(第一次係早幾日的Grinpa樂園入面), 但仍然覺得好得意, 因為香港冇! 踩一圈大概5分鐘左右, 返到車站, 細佬落車先, 笑哥哥踩得慢, 搞到哥哥爆喊! 唉! 你兩兄弟分開玩算吧喇!

高空單車

細佬叫媽媽唔好踩, 佢踩!

老公帶哥哥去玩滑草, 我同細佬去睇吓有冇單車踩(因為我見公園入面有好多小朋友都踩緊單車), 原來真係有單車租架! 重點係 -- 唔駛錢架!!! 租一架單車可以踩2個圈, 我提意細佬去租單車踩(因為佢最近係香港學識咗踩單車, 唔駛輔助'碌', 但佢好唔想踩單車, 佢話要去玩滑草! (你玩野呀?! 就係要分開你兩兄弟, 你而家又要去同哥哥滑草, 咁你頭先落車就唔好挑佢啦!)

帶咗細佬去滑草場, 原來5歲可以自己玩, 由於佢地已經有N次滑草經驗, 已經識自動波走去拎兜, 行上山坡, 瀡落黎! 我同老公只係企係場邊。玩咗一陣, 細佬話唔玩喇, 都唔刺激, 係俾BB玩既! (個山坡的確係短咗D, 估唔到佢地對玩都咁有要求! 不過, 雪兜夠刺激啦! 咁你又發晒脾氣?!)

又真係幾短, 又唔夠斜, 唔刺激!

我仍然提意去踩單車(因為唔駛錢!), 細佬話唔想去, 我話唔係平時果D, 係一家四口踩果D喎! 兩兄弟都話: 好啦! 唔駛排隊已經有得玩, GOOD! 不過, 只可以踩一圈。老公提意孖寶一陣去踩單車, 但細佬堅持唔踩, 老公鼓勵佢地踩好得意果種--四個'碌'車(好似方程式賽車咁), 孖寶聽到係方程式賽車, 終於都肯去試吓! 行去租車的地方, 工作人員問我地: Elementary School? 正當老公心諗: 你講咩呀? 我已經答咗: YES! 工作人員示意我地入去揀車, 原來哥哥已經坐咗上架藍色車度(哥哥平時成日發呆, 但有得玩就反應好快!), 細佬就揀紅色。我同老公就跟住佢地, 沿途影相。哥哥完全唔守交通規則 - Cut線、爬頭、衝燈, 細佬就撞開其他阻住佢/唔小心片咗埋佢度的小朋友, 今次堅係孖寶賽車!

好兇狠!

玩到12點左右, 老公話就黎夠一個鐘, 如果冇其他野玩, 就走喇! OK! 重點都玩晒架喇! 只係未去參觀個交通館。老公跑去停車場, 出咗車先! 我帶住孖寶, 行去出口上車。

下一個節目係去橫須賀的三笠公園睇戰艦! 車程又要50分鐘。大概1點左右去到公園附近的Port Market個停車場泊車(消費滿2000円可以免費泊150分鐘), 然後行去公園。由於近海邊, 海風又大, 吹埋黎好凍呀! 參觀戰艦成人每位600円, 小童免費, 我地先行落去戰艦內部參觀, 有好多房間, 孖寶冇乜興趣睇歷史, 上返甲板, 睇到D大炮, 孖寶好興奮, 影完相, 落返船艙, 見到有間房好似俾小朋友打機咁, 即刻入去睇吓, 咁啱有小朋友走, 孖寶一人一部PS4, 玩揸戰艦射敵方的艦隊, 初頭都唔知點玩, 原來唔駛扭軚, 只係不停撳制發射飛彈就得!

準備打仗

下午2點幾, 仲未食野, 走喇! (冇諗住參觀戰艦會咁耐!) 行返去Port Market搵野食, 去咗間冇人的餐廳, 門口個職員好熱心咁召呼我地, OK啦! 就呢間啦! 我叫咗碗雲吞麵同孖寶Share, 老公就叫咗個刺身飯。食完飯, 哥哥要去poo poo, 又係你! 你最鍾意出街去廁所, 好在個廁所都算乾淨。由於已經3點鐘, 冇可能趕到3:25開出的船(我安排咗坐東京灣汽車渡輪, 去久里浜港要20分鐘車程), 老公話咁去行吓, 附近有Home Depot, 佢想去睇防鼻鼾枕頭, 我話都唔可以睇咁耐, 下一班船4:20開, 早10分鐘去到碼頭, 車程要20分鐘, 即係你睇到3:45都要開車走人! (我同孖寶係車入面等佢, 但佢最後都係買唔到枕頭)。

下午4:05到達碼頭, 好在唔算好多車, 但要落車, 入去售票處買飛 (當然又係我做跑腿啦!) 買咗車飛(包司機)同一個大人, 有10%割引券, 平咗少少, 但都要3,500円左右, 都幾貴, 不過, 孖寶兄弟未搭過汽車渡輪(我記得我細個時, 好似孖寶咁上下大, 老豆都同我搭過), 所以呢份第一次的體驗係無價der~

我就係跑入去呢座建築物入面買飛

上船喇!

揸車上咗渡輪, 工作人職指示我地泊低架車, 離開車箱, 行上去船艙, 由於以前睇咗好多高木直子的漫畫 -- 搭渡輪買蝦條餵海鷗, 我就同孖寶講, 唔知有冇得餵海鷗呢? 出到去甲板, 真係好多海鷗呀! 咁啱我背嚢入面有塊蝦餅, 搣碎咗俾孖寶餵, 孖寶好開心, 好興奮, 見到佢2個咁開心, 我都好開心, 爸爸就拎部相機出黎不停「打雀」。好快就冇晒蝦餅, 我話可以買蝦條, 孖寶話媽媽你快D去買啦! (爸爸唔想買), 媽媽咁愛孖寶, 緊係即刻走返落去船艙個小賣部買啦! 買咗包大蝦條, 孖寶一邊餵海鷗, 一邊拎黎食, hoho!

餵海鷗餵到開船都唔知, 不過, 真係好大風, 好凍, 係時候要返入船艙喇! 呢班船冇乜人, 我地搵咗個對住窗口的梳化位, 我拎晒D零食出黎, It's Tea Time! 老公去買咗支橙汁俾孖寶飲。船程大約50分鐘, 不過, 唔知點解, 好快到咗碼頭, 我仲想係船度瞓一陣。下午5:10到咗金谷港, 臨落船, 哥哥話佢'賴'咗屎, 唔係掛?! 你唔好玩野喎! 今次由老公同佢去廁所清潔!

返落船艙繼續食蝦條

落去揸返架車, 駛出碼頭, 幫哥哥換返條乾淨底底(好在早有準備, 擺定條乾淨底褲同面褲係車入面), 輪到細佬話要去vee vee, 你兩兄弟係唔係玩野呀?

本來安排咗4:30去咗酒店check in先, 休息一陣先至去德國村睇燈飾, 但因為搭遲咗一班船, 黎到金谷港已經5:20, 去德國村車程要50分鐘, 去到都日落西山, 夠鐘睇燈飾, 所以決定直接去! 孖寶頭先係船上冇瞓, 所以開車冇幾耐已經瞓著咗, 我都係!

差不多去到德國村, 老公叫醒我。嘩! 入口有一大片紫色花海, 趁未天黑, 兩公婆落車影相, 好凍呀! 黎咗東京咁多日, 而家係最凍既! 一陣帶孖寶落車, 要每人著2件褸先至得呀! 天色漸漸變黑, D燈飾變得好燦爛, 好靚啊! 泊好架車, 叫醒孖寶, 著衫, 落車! 嘩! 好好好...... 好凍呀! 見到有D人坐住Golf車係場內兜圈, 老公話: 唔知租唔租得? 我話: 有錢咪得囉! 趁仲未好多人, 那那林行去排隊坐Golf車, 兜一圈約8分鐘, 盛惠2,000円, OK啦! 出得黎去旅行就唔好咁慳! 坐住Golf車係D燈飾堆中穿梭, 又幾得意! 落車之後, 行上山坡上面個城堡, 原來呢度個停車場近D, 老公話佢一陣自己行落去攞車, 我地係Souvenir Shop入面(有暖氣)等佢, 唔駛咁凍!

D燈飾真係好靚, 好浪漫! (點解以前同老公倆口子, 搵唔到呢D景點?) 我想同老公影心心燈飾, 但孖寶唔like, 扯走我地! 唉! 又係咁! 不過, 現場環境真係好凍(估計當時只有8-10度), 為免孖寶冷病咗(好大鑊), 都係走人!

我同孖寶係有暖氣的Souvenir Shop入面等, 老公就行返落山, 再揸架車上黎(辛苦晒佢喇!) 晚上7:30左右離開德國村, 本來plan咗去返木津更市中心的AEON, 但車程來回要1個鐘, 我同老公都覺得太夜, 決定係附近的7-Eleven買D野食返去(買咗3個杯麵, 2條珍寶腸, 1L蘋果汁同埋丸久小山園抹茶甜品)。原來由德國村返酒店都要30分鐘, 而且四野無物, 路燈又暗, 係唔係真係有間酒店係深山入面架? 會唔會行錯路架? 點解呢個路口好似頭先見過咁既?

晚上8:15左右, 終於到咗酒店, 擺低行李係大堂, 去Front Desk check in, 環境唔錯, 唔係cheap cheap酒店黎! 個女職員都好nice, 佢同我講: Three Box? 我話: No, Four Persons, One Night! 雞同鴨講咗一輪, 我先至醒起--係Amazon.jp買咗D野, 送咗黎呢間酒店! Oh! Yes! Three Boxes! 個女職員見我地拎住咁多野, 主動借架行李車俾我地, 之後仲幫我地推埋架車上房 (佢仲細粒過我, 要佢幫我地推咁多行李, 真係有D唔好意思!)

上到房已經8:30, 仲未食飯(孖寶係架車度已經食緊珍寶腸), 媽媽好肚餓呀! 老公即刻煲水, 我沖杯麵(哥哥話個杯麵有少少唔好食, 吓? 係合味道海鮮味, 杯麵中的極品黎! 真係唔識食!)。間房比我想像中大, 同埋都幾靚, 浴室舖雲石der~(堅係高級酒店黎!), 但兩張床都係咁細。食飽飽, 可以拎D Amazon戰利品出黎喇! 包括夠孖寶食足一年的DHA, 我的兩件Majestic Legon衫(價錢平香港一半有多), 同埋老公的物品。由於聽日就返香港, 要pack晒所有野入2個喼, 同埋只可以拎2個hand carry, 媽媽執執執, 執咗好耐!