東京親子之旅2018 - Day 6

2018.3.29 (星期四)

今日仍然係好好天, 陽光普照!

捱咗2晚cheap cheap酒店, 今晚去住箱根的溫泉酒店喇! YEAH!

早上8:15落去食早餐, 9:15 check out, 9:30 開車出發去箱根喇! 由御殿場去箱根要超過1小時車程, 為咗爭取時間, 緊係唔好慳, 行IC啦!

離開御殿場市, 架車一路上山, 冇幾耐, 見到有個展望台, 當然要泊低架車睇吓啦! 嘩! 好靚! 係富士山呀! 早知果日唔駛搭纜車上山睇啦! 呢度都睇到, 仲冇乜人添! (雖然冇乜人, 但都係有人, 仲要係香港人, 講廣果話既!) 唔知點解, 個個影相都要擺同一個Post -- 就係用隻手掌托住個富士山! (呢個post好似廿年前興過!)

呢度睇得好清楚, 早知前日唔駛搭纜車上山睇啦!

好friend friend呀!

今次真係Bye Bye富士山喇! 我地去箱根, 應該之後都見唔到富士山架喇! 繼續上路, 以為行IC, 但行咗好耐都係行緊上山, 之後條路仲變咗"公仔麵"咁攣(係GPS畫面睇到) OMG! 我暈喇! 我問孖寶有冇暈, 佢地話冇事(不過, 我都拎定個嘔吐袋出黎, 以防萬一), 過咗15分鐘, 哥哥話佢開始有D暈, 細佬冇出聲, 我話想嘔出聲, 媽媽有嘔吐袋, 老公叫我唔好成日提住佢地, 再過咗15分鐘, 我話我頂唔順, 好想嘔, 細佬出聲: 我都係! 好想嘔! 去到收費亭(冇錯, 條九曲十三彎山路就係IC, 係要收費der~) 然後......細佬...... 好似噴泉咁...... 嘔返晒頭先上車冇幾耐飲果包香蕉奶出黎, 成架車都灕漫著濃郁的香蕉味, 要泊埋一邊, 打開晒D車門, 個嘔吐袋仲好似有D漏, OMG! 老公將個嘔吐袋擺咗係山邊 (冇辦法, 四野無物, 都唔知邊度搵個垃圾筒黎掉咗佢, 加上佢條九曲十三彎山路收咗我錢, 好應該包埋清理嘔吐物的費用!)

抖咗15分鐘, 細佬話佢好D喇! 繼續上路, 開始落返山, 同埋條路正常返, 冇咁多灣喇! 早上11點, 到咗箱根湖的桃原台駅, 個駅的停車場滿咗, 老公話緊係唔泊隔離個有料停車場啦! 又要俾錢又要行咁遠 (老公的決定係明智der~ 因為就係個駅對面山邊, 有個免費停車場, 竟然有位, YEAH!)

泊咗架車, 細佬因為嘔完, 要休息, 哥哥都好攰, 孖寶就係車上瞓一陣, 我就留係車入面睇住孖寶, 至於爸爸, 佢緊係爭取時間去放飛機啦! 1個鐘之後(冇錯!)我係架車上面呆坐咗1粒鐘(我唔眼瞓, 瞓唔著), 老公返黎, 叫醒孖寶。

中午12點, 我地行過馬路對面, 去桃原台駅搭纜車, 上去大涌谷火山(孖寶上年去九州上唔到阿蘇山, 所以今次特登安排去睇火山! 其實只係好似地獄谷咁, 有D硫磺氣體係地下升上黎, 睇唔到火山既!) 排隊搭纜車的人龍, 比我想像中短, 可能因為過咗早上繁忙時間, 大概排咗20分鐘左右已經上到纜車, 車箱入面係有坐位既! GOOD!

呢架纜車有位坐, 唔迫, GOOD!

大概15分鐘車程, 就到咗大涌谷駅, 我地要落車喇! 出咗個駅, 好好好很多人呀! (好似去咗旺角咁) 一家四口搵咗個有利位置, 自拍! 但由於全家都係小矮人, 要影到一家四口+欄杆後面個景, 有D難度! 影咗一大輪, 繼續向前行, 見到前面有個展望台, D欄杆冇咁高, 又有梯級, 於是又一家四口自拍一番! 其實, 個所謂火山就係得咁多野睇(=冇野睇) 孖寶話D硫磺味一D都唔臭喎 (因為今日風向唔係吹向我地呢邊, 所以係冇乜味) 由於唔想咁快走, 所以又繼續向前行，有2間賣手信的舖頭，見到門口大排長龍，原來係排隊買黑色雞蛋, 但老公最有興趣反而係黑色雪糕, 不過, 孖寶唔like, 佢地要食黃色的雞蛋雪糕, 照例買一杯雪糕一家四口食, 四個人share? 係呀! 我地減肥!

 今日D煙冇吹埋黎, 所以唔覺臭

你地三父子唔好食晒, 留返D俾我呀!

食完雪糕, 去手信舖頭買咗D手信(包括送俾姑媽的貓咪毛公仔), 下午2點, 搭返纜車落山。落到山, 我提意係纜車站個餐廳食飯(大佬呀! 已經下午2:30, 你唔係仲想去其他地方搵吓野食呀化?)

去到餐廳, 搵到張四人枱, 枱上有menu, 但點餐拎餐都係要自己出去, 我已經餓到個腦同四肢都shut down咗, 想食咩呀? 是但啦! 人氣No.1果個飯啦! (都係果句啦! 唔係食C就得架喇!) 等咗15分鐘, 終於有飯食喇! 我已經冇氣力畢咗飯俾孖寶先, 我食先喇! 你兩個繼續油吓顏色先啦! (飛機個逃生講解都係咁教架, 大人要搞掂咗自己先, 然後先至幫身邊的小朋友!)

食飽飯, 我終於都有氣力講到野同埋企起身喇! 我要去洗手間! 離開餐廳, 孖寶嚷著要去玩「鴨仔」, 搭纜車上山之前, 爸爸同孖寶講, 呢個湖都有得玩鴨仔, 然後孖寶嚷著要玩, 爸爸應承佢地, 搭完纜車去玩。纜車站隔離有條小徑行落去個湖, 求其搵咗最近果檔, 老闆收1500円30分鐘, 平過河口湖喎(河口湖要2000円)。孖寶又係好興奮, 又係搶住要揸軚盤, 又係不停轉黎轉去。

下午4:15左右, 行返上去停車場攞車, 揸車去今日入住的溫泉旅館(位於羅強車站隔離的雪月花)。車程約20分鐘, 去到旅館門口, 工作人員指示我地架車泊邊, 但冇幫我地拎行李落車同推行李去酒店大堂 (感覺間酒店有D唔正常!) 然後, 我入去櫃枱辦理check in手續, 個職員同我講, 今晚食飯時間只剩返8pm, 吓? 咁夜? 好過份喎! 然後同我講解房間位置同酒店的設施, 最後拋低一句: Have a nice stay! 吓? 咁即係點呀? 冇職員幫我地拎行李同帶我地上房架? (未住已經對呢間酒店的印象扣晒分!)

去揀Yukada, 然後推住2個喼去搭Lift, 搭去2樓, 仲要九曲十三彎咁去搵個出口, 出咗個平台, 眼前係30級樓梯, 老公心入面同口裏面已經講緊粗口: WTF?! 即係點呀? 拎住2個喼行30級樓梯? 冇錯! (我好想返去Front Desk, 叫佢安排過另一間唔駛行咁遠的房囉!) 行完樓梯, 仲要再搭lift, 再行咗好耐, 終於都搵到我地間房。

入到房, 比我想像中普通, 話晒都係客房風呂附, 同埋都成46000円一晚, 感覺一D都唔豪華(完全冇得同上次湯布院果間比, 果間仲平D添!) 再出去睇吓個風呂, 如我所料, 只係好似家用浴缸咁(只係舖咗D木扮晒野), 同埋堅係露天(唔似得湯布院果間咁, 係室內落地玻璃), 黎到呢度, 感覺好中伏! (係我細佬介紹, 即刻whatsapp鬧爆佢先! 佢答我: 係呀! 因為係大型渡假式溫泉旅館, 所以係咁架喎! 註: 我最憎大型渡假式溫泉旅館 e.g. 九州阿蘇山腳的饅頭屋)

 價錢貴, 但質素普通

唔該晒細佬仔幫我地影咗張合照, 影得幾好!

由於未到食飯時間, 係房hea到5:30, 去返大堂隔離個茶水間, 佢話有免費豬肉包食, 我地一家四口一人一個, 細佬話好好味, 結果, 又拎多兩轉, 最後一轉個職員話唔可以拎咁多, 只可以俾2個我。食飽包後, 返房, 開缸水俾孖寶玩水, 兩個玩得好開心, 不過, 天氣實在太凍, 驚佢地冷親, 都唔可以玩咁耐。孖寶玩完到我浸, 個缸真係好細, 加上冇景, 坐係度都唔知做乜, 浸咗10分鐘就上返黎。距離食飯時間仲有1.5鐘, 都唔知做乜好, 惟有執吓行李, 孖寶兩個自己玩, 老公就不停上網, 真係等咗好耐(火都黎埋! 8點先至開始食, 你估係香港去飲人地結婚酒咩? 咁遲食, 咪食到10點? 孖寶要瞓覺喎! 個安排都痴痴地線! 好心你第一輪5:30食, 第二輪咪最多7:30開始)

終於等到8點, 又長途跋涉咁行返去大堂隔離個餐廳, 入到去, 冇得坐窗口位, 安排咗我地坐近廚房一個好昏暗的角落, 隔離係一對外國年老夫婦。食緊一早擺晒係枱面的冷盤, 哥哥已經好眼瞓 (大鑊!), 佢頂唔順, 個頭仔瞓咗落我大脾, 唉! 算吧啦! 好在頭先食咗個豬肉包。個晚餐都幾多野食, 但我地跟本冇心情品嚐, 因為真係太夜(咁夜仲食咁飽, 好唔健康囉!) 所以我地都食得幾急, 只係希望盡快食完, 盡快返房, 等孖寶唔駛咁辛苦。加上燈光真係好暗, 真係食咗C都唔知! 我對呢間野的印象, 已經跌到零分。

 睇相都唔覺去咗溫泉旅館食豐富晚餐, 現場環境更加惡劣

太夜先至開始食飯, 哥哥影完上面幅相後就...

那那林食晒D野(堅係背脊骨落!), 晚上9:15, 叫老公抱哥哥, 我拖住細佬, 離開喇! 隔離枱個外個人仲話: He looks so tired! 緊係啦! 邊有安排咁夜食飯架? 應該check in時堅持同個職員講, 我地有小朋友, 唔可以咁夜食!

出咗餐廳, 哥哥就醒返(佢係見飯眼瞓, BB時候已經係咁, 想肥都難!)。經過貸切風呂, 想睇吓有冇機會有空位, 係冇既! 話明係大型溫泉旅館, 咁多人, 佢得幾個貸切風呂, 跟本冇可能等到佢有位!

返房, 刷牙, 換衫(個頭好大陣燒味, 算喇! 咁夜唔洗頭喇!), 瞓覺!

Day 6 完

P.S. 半夜突然間"嘭"一聲, 原來哥哥由張床褥跌咗落地(可能係木地板所以咁大聲啫!), 佢跌咗落地都冇醒過, 繼續瞓, 老公執返佢上床。