東京親子之旅2018 - Day 1

2018.3.24 (星期六)

今日搭CX早上10:15的航班去東京。

我同老公大約早上6點起身, 孖寶可能太興奮瞓唔著, 6:15都起咗身, 大家梳洗之後, 仲有時間係屋企食早餐(本來諗住我同老公食咗先, 孖寶係車度食), 之後檢查行李, 老公話最緊要帶passport, 其他野唔記得帶都唔緊要, 到時係日本買啦!

早上7:10, 叫工人姐姐幫我地影咗張全家幅(每次旅行出門口之前必影), 出發喇! 今次都係揸車去青衣機鐵站, 泊車(日泊$80, 加咗價, 之前係$70咋), 轉乘機場快線。早上8:00左右到達機鐵站, 8:30已經到咗機場CX個counter。好多人排隊, 我地搏大霧, 排嬰兒/老人同行快線, 好快就搞掂咗行李寄倉同拎咗boarding pass (每次搭CX都好順利, 硬係搭HK字頭果2間航空公司就出事)。

早上8:45入閘, 行吓廸廸尼禮品店, 孖寶俾門口的反斗車王玩具吸引住, 玩咗好耐都唔捨得走。9:15已經到咗閘口, 距離起飛仲有成1個鐘(好難得唔係裙拉褲甩咁衝去閘口登機), 老公同孖寶去睇飛機, 媽媽就坐係度篤手機!

仲有好多時間, 可以玩自拍

早上9:30, 孖寶話要去排隊上飛機, 是但啦! 反正都要等, 企係度等囉! 9:55上到飛機, 老公同孖寶坐窗邊3座位, 我自己一個坐走廊位, 後尾隔離坐咗個型型地的鬼佬, 老公係咁問我迫唔迫? 要唔要調位?

老公話孖寶大個仔咗, 佢一個人照顧孖寶, 都唔算太辛苦, OK喎! 我就好似自己一個人搭飛機咁, 簡直係爽啦! 下午3:15到達東京成田國際機場T2, 堆住架行李車過馬路, 搵咗好耐都搵唔到租車公司的Shuttle, 由於行桯係我plan (但租車公司唔係我搵囉!) 俾人點我去問個呢個, 問果個, 最後終於問到另一間租車公司個職員, 原來我地間租車公司, 係要自己打電話去, 叫佢揸架車黎機場接我地, 吓? 咁麻煩? 於是又俾人點咗我去打電話, 好在入100円入去, 撳咗個電話號碼就接通咗, 個職員D英文都唔錯, 溝通到, 佢話架車15分鐘後會到。

到咗成田機場喇!

下午4:25, 行返過頭先條馬路, 終於見到架Shuttle黎緊, 個司機好有禮貌。4:40到咗租車公司, 真係離機場幾遠, 所以平過其他租車公司囉! 又係我去辦租車手續同俾錢。5:10終於可以出發喇! 我地今晚會住係印西市駅前的APA Hotel, 而家去咗行西松屋先, 之後去AEON MALL食飯。

今次架車係藍色

好在冇乜塞車(上次由名古屋機場出市區, 塞車塞到我想喊!) 媽媽提意今次的旅行禮物去西松屋買, 唔好再買Tomy車仔喇! 爸爸非常反對! 但細佬仔就好鍾意媽媽呢個提意, 佢仲話次次都係買車仔, 好悶! 離遠見到有間Birthday (都係賣嬰童用品), 爸爸話入去睇吓, 入到去, 媽媽照舊走去睇吓有冇衫啱孖寶 (貴過西松屋, 但質素一般), 老公帶孖寶去睇玩具, 細佬無啦啦發忟憎: D玩具都唔好玩! 我唔鍾意呢度呀! 媽媽見情況惡劣, 提意走人! 爸爸問: 咁細佬, 其實你係唔係心目中想搵某一款玩具? 而呢度冇呀?

之後去咗西松屋, 由於1月時去沖繩已經買咗大量的底褲仔同襪, 媽媽只係去睇吓衫仔, 最後乜都睇唔啱, 反而細佬搵到佢想搵的野 -- 發聲電話, 成個人開心返晒! 哥哥話要同細佬一樣, 都係買電話, 個電話得粉紅色咋喎, 你地OK? 孖寶話OK!

晚上7點去AEON MALL搵野食, 老公話想食好D, 決定去食仙台牛舌, 間餐廳坐得幾舒服, 但上菜就好慢, 落單之後等咗超過30分鐘, 好肚餓! 以為等咗咁耐, 一定係用心製作, 點知D燒牛舌係唔熱的, 都唔知擺咗幾耐先至俾D客食, 離晒譜, 而且全完食唔到燒味, 唔香, 仲要份量超級少, 唔夠餸飯, 老公一路食, 一路鬧 (好在間餐廳唔係我揀啫!) 叫咗一個兒童餐俾孖寶, 原來送玩具, 孖寶只能揀一份玩具, Share玩, 爸爸幫佢地揀咗陀螺。

就係呢餐飯, 我食完之後, 返到酒店就嘔

食完飯去AEON的Supermarket買豆奶同香蕉奶俾孖寶(因為次次去旅行, 孖寶早餐都唔肯飲奶, 加上細佬好似對奶敏感, 兩星期前戒咗奶, 只係飲豆奶, 所以決定今次旅行, 每日早餐都係飲豆奶), 士多啤梨, 另外買咗2支2L水 (自從上次去旅行已經冇再夜晚係酒店煲水, 因為真係好麻煩, 同埋跟本煲唔到咁多水)。

晚上9點返到酒店, 酒店房間同預期一樣 -- 好細! 但整齊乾淨, OK啦! 今晚由媽媽同孖寶沖涼, 之後食士多啤梨 (哥哥都有食, 細佬唔like)。其實媽媽同孖寶沖涼其間都有少少肚痛, 食咗幾粒士多啤梨之後, 肚痛加劇 (痛到想喊, 痛過生仔), 肚屙咗幾次, 最後一次仲痛到嘔, 老公聽到我D嘔聲, 終於知道事態嚴重, 入黎廁所睇吓我咩事, 佢仲話: 如果再唔舒服, 都要返香港架喇!

好在, 我嘔完之後, 個肚就唔痛喇! 坐係度休息吓, 到咗瞓覺時間, 都冇再肚痛同想嘔! 感恩!

晚上11點, 孖寶瞓咗, 我都要早D瞓喇! Goodnight!

Day 1 完