東京親子之旅2018 - Day 2

2018.3.25 (星期日)

今朝起身, 個人已經冇晒事喇! 冇肚痛, 冇想嘔! 可以繼續作戰! 感謝主!

早上8:30落去食早餐, 自助式早餐選擇唔算多, 但有蛋, 腸仔, 方包, 牛角包, 已經相當唔錯(好過上次去大阪堺駅前的APA好多喇!)

呢間APA的早餐算係唔錯

食完早餐, 上房執埋D行李, 9:30 Check out, 今朝的行程係去船橋市安徒生童話公園, 天氣好好, 最適合去公園玩(本來諗住去酒店對面間7-Eleven買入場券, 有9折, 但同個店員雞同鴨講咗好耐, 哥哥無啦啦話要去poo poo, 加上部機hang機, 我放棄喇! 去到公園門口先至買飛啦!)

早上10:30左右去到公園, 公園個專用停車場已滿, 惟有泊附近, 隔離塊田個大媽收我地1000円日泊, 是但啦! 泊好架車係塊田度, 沿小路行去公園, 好曬, 但冇太陽又凍凍地, 都係叫老公返車幫孖寶拎返2件外套。去到入口買飛, 兩大兩小盛惠2,000円, 入到公園, 好......好很多人呀! 緊係啦! 今日係星期日, 冇辦法!

老公問: 公園有咩玩? 收成2000円入場費, 我話個公園好大, 好多野睇, 重點係玩滾軸滑梯! 我地首先去玩電動車, 100円2個圈, 細佬架車好慢好慢, 佢開始發脾四, 又埋怨我地點解要黎呢個公園, 佢想走! 吓? 我地啱啱入黎咋喎, 仲俾咗2000円入場費, 玩多一陣先啦! 之後, 帶咗佢地去爬繩網同瀡滑梯, 細佬開心返, 哥哥有得玩就得, 兩個越玩越開心, 玩到癲晒! 我同爸爸就俾太陽曬到癲!

之後, 我提意去排隊玩滾軸滑梯, 冇錯, 係要排隊, 目測條隊大概有100人, 排咗半粒鐘先至有得玩, 玩咗一次(好刺激!), 但實在排得太耐, 性價比好低! 之後, 孖寶又玩返繩網同滑梯, 仲去玩飛索, 好開心!  過咗一陣, 我見到滾軸滑梯條人龍好似短咗, 提意再玩多一次, 今次都排咗15-20分鐘!

 排咗30分鐘玩, 性價比好低

公園入面好多櫻花樹

然後, 我地去玩彈床(其實係用個繩網包住好多好多個yoga波, 有2個彈床, 我叫孖寶玩for 3-5歲果個(因為隔離果個for 6歲以上, 好多大過佢地的小朋友, 佢兩個唔夠人撞又會爆喊)。由於細佬試過好多次跳彈床俾人撞到喊, 我一路睇住佢跳, 內心一路好驚!(千期唔好有人撞到佢呀!) 跳咗好耐, 佢兩個好開心, 好熱, 熱到要除底衫。後尾有個小朋友撞到哥哥, 細佬幫拖, 推跌個小朋友,好在個小朋友冇喊, 中午12:45, 爸爸話走喇! 玩夠喇!

Yoga波彈床, 跳到流晒汗

個公園真係好大, 行到腳軟。我地過橋去咗公園另一邊, 有風車屋, 有小火車坐(孖寶兄弟坐, 我同老公幫佢地影相拍video), 仲有得餵綿羊(但closed咗, 我地係圍欄旁邊摘D草, 伸條草入去餵綿羊), 原來孖寶好鍾意餵羊(佢地以前好驚架喎!) 本來plan咗係公園入面食午餐, 但老公似乎想快快脆行完個公園, 出去搵野食。一家人係風車屋前面自拍咗幾張相, 走人喇!

 大個仔可以自己玩喇!

個風車真係識轉der~

接近下午2點, 離開公園, 揸車去琦玉縣, 沿途搵野食, 離公園唔遠, 搵到一間餐廳, 招牌寫住咩咩咩和食, OK啦! (我實在太肚餓, 食乜都得, 除咗屎之外!) 我叫咗個烏冬湯鍋, 老公叫咗個冷麵天婦羅set, 另外叫咗個凍烏冬天婦羅set俾孖寶, 原來個凍烏冬好un, 孖寶唔係好like, 食剩咗好多。去Cashier俾錢, 個姨姨送咗兩個汽球俾孖寶!

下午3點左右, 食飽飽, 繼續上路! 孖寶好快就瞓著咗!

揸咗好耐好耐車, 由天光揸到天黑, 行錯路, 最後, 晚上6:30, 終於都去到爸爸的朝聖地 -- Tomix World, 睇火車模型同場景配件, 舖頭入面有個corner, 有張大枱, set 咗2架火車同路軌, 有得自己控制, 孖寶玩咗好耐。

孖寶好鍾意玩火車

晚上7點, 走喇! 仲要食飯同埋去酒店check in, 由於去酒店都要30分鐘, 加上係市中心要泊低架車食飯, 都有D難度, 我地決定去吉野家買外賣, 返酒店食。另外去7-Eleven買蘋果汁同甜品。

晚上8點到達酒店, 間房大過尋晚果間好多, 而且重點係 -- 有張按摩椅(啱晒老公, 佢最like), 可能因為肚餓, 孖寶好like個吉野家牛肉飯, 細佬話D牛肉好好味! 食完飯, 爸爸開咗缸水俾孖寶浸浴, 孖寶有得玩水, 好開心! 我就食飯後甜品, 係7-Eleven買的丸久小山園抺茶甜品, 好好味! 雖然係便利店買, 但有質素, 298円, 唔算貴!

 是日晚餐 (2牛1豬肉飯, 個豬冇咁好食)

有人已經享受緊張按摩椅

孖寶玩完水, 就輪到媽媽浸, 好C服! 老公就去嘆吓張按摩椅, 佢話睇吓呢間酒店個集團有冇酒店係其他地方, 佢話下次都要搵返呢間, 好正! 我話呢間係可遇不可求, 重點係 -- 佢唔貴 (15,120円一晚咋)! 孖寶沖完涼就係床上玩汽球, 玩到癲晒!

晚上10:30, 夠鐘瞓覺喇!

Day 2 完