今日係旅程的最後一日, 我同細佬都病病地(喉嚨痛+鼻塞+流鼻水)。
早上8:30落去食早餐, 食早餐的地方好decent, 我地被安排坐係Window Seat, 自助早餐的選擇好多, 最重要係 -- 孖寶食早餐唔駛另外俾錢! (上次去阿蘇間山卡拉酒店收我對孖寶每人900円食自助早餐, 但個早餐冇野好食, 加上孖寶練仙食好少野, 感覺簡直係老屈!)
食完早餐, 行出去酒店個庭園散步, 睇魚, 影相, 返上房執埋D行李, 10點check out。本來plan咗今朝早去千葉兒童王國, 但由於要收入場費+個別項目收費+停車場費, 老公覺得好貴! 佢提意不如去行AEON(因為佢仲未買到防鼻鼾枕頭)。早上11點左右去到AEON, 即時去搵兩架手推車俾孖寶(孖寶至愛), 只要坐上手推車, 你推佢地去邊度, 基本上佢地都唔會留意, 因為佢地只顧玩架手推車, 老公想睇枕頭, 我想睇衫, 所以分開行, 我推住細佬, 佢好乖, 我入去舖頭睇野, 佢都冇叫我快D走, 不過, 由於(1)New Arrival冇減價(但都比香港平), (2)推住細佬, 入唔到更衣室試衫, (3)時間有限, 個商場無限(大), 只係睇咗幾間舖頭, 都係返去同老公會合。老公仍然係搵唔到防鼻鼾枕頭。
下午1點, 夠鐘走喇! 老公話之前同租車公司講咗, 下午2點去還車。下午2點左右, 到咗租車公司, 還車, 租車公司提供Shuttle送我地去機場, 去返Day1上車個位(um... 我地離境喎! 做乜送我地去入境大堂?) 之後, 自己睇水牌, 搭扶手電梯去返離境大堂果層。去櫃位Check in, 寄倉行李, 2:45pm, 去食飯喇! (冇錯! 仲未食飯! 次次去旅行都係咁!) 上咗有廳餐有商舖果層, 電梯口有間日本餐廳, 就呢間啦! (我已經肚餓到冇力再行去前面睇吓有咩食)。叫咗3碗烏冬, 食完野, 仲有時間, 老公叫我出去行吓, 例牌有Earth Music, 都有D減價, 但質素真係麻麻! 買唔落手! 至於其他手信舖頭, 冇乜興趣。輪到老公去睇野, 佢去睇電器, 都係冇收穫!
下午4點左右, 唔好嘥時間喇! 入閘啦! 我要去Duty Free買Royce朱古力薯片俾你地食呀! 去到間舖頭, 我以為自己眼花, 打晒蛇餅, 見到有Royce, 但想攝入去拎四盒都冇位, D人Block住晒所有櫃架, 仲眼啤啤以為我想打尖。我惟有睇吓有冇其他手信(主要係搵阿媽盒蝦餅同買俾我地自己食既手信!), 老公同孖寶幫手排住隊先, 到我拎咗2盒Cheese餅(勁好味!)同4盒Royce返黎, 佢就帶孖寶去閘口先, 我繼續排隊俾錢。20分鐘後, 老公打俾我, 問我做乜咁耐? (你頭先都睇到有幾多人, 個場面幾咁震撼啦! 我都想問點解要我排咁耐! 不如換你過黎排好唔好?)
下午4:40終於趕到去閘口, Final Call, 一家四口那那林上機。仍然係老公同孖寶三父子坐, 我自己坐走廊對面個位(由於出入方便, 孖寶去廁所都係由我帶去, 叫做都幫吓手做D野啦! 嗱! 唔好話我冇照顧對仔呀!)
正當飛機就黎降落的時候, 然然發現唔見咗個玩具電話(個電話跟咗佢8日, 餐餐食飯都要拎出黎玩, 返到酒店又玩, 係架車度冇瞓覺都會拎黎玩, 而家唔見咗! 好慘啊!) 正當媽媽睇吓有冇跌咗係凳底時, 空姐就黎問我: 小姐, 有冇野可以幫你! 空姐知道咗個情況之後, 佢話等飛機降落之後拎電筒幫我搵! 真係唔該晒!
晚上8:45左右到達香港國際機場, 等其他人落晒機, 個空姐真係好認真咁幫我地搵, 揭起晒D坐墊, 又搵埋前後幾排的凳底, 其他空姐空少都走埋過黎幫手, 仲同然然講: 吓? 唔見咗玩具? 咁大件事! 唔得喎! 要幫你搵返! (真心覺得CX的服務並非好似外界講得咁差喎, 上次遲咗寄倉行李, CX派個地勤同我地經職員通道入閘, 仲同我地一齊跑去閘口喎!) 最後當然係搵唔到啦! (我地估計佢應該漏咗係東京機場候機室或者係架行李車度), 都係唔好阻住人地收工喇! 算啦!
然然真係好唔開心, 扁晒咀, 眼濕濕, 行去搭無人駕駛其間, 佢終於忍唔住喊咗出黎! 同機的空姐突登拆咗包係德國買的軟糖, 請然然食, 想氹佢開心。然然食完粒糖仲係好唔開心, 我地應承佢, 下次去日本, 一定會去西松屋買返個電話俾佢!
過Immigration, 拎行李, 搭機場快線, 去青衣站攞車, 回家!
Day 8 完
沒有留言:
張貼留言