然兄逸弟: 聖誕名古屋+大阪親子之旅2018

2018.12.28 (星期五)

今朝起身, 望出窗外, 天陰陰, 好大風(好似颱風咁, 打到個窗嘭嘭聲!)

早上8點, 落去食早餐, 坐返尋晚個位, 早餐的腸仔、燒魚、橙汁、乳酪, 可以自己出去拎。唔算豐富, 但食得飽!

食完早餐返上房, 由於外面太大風, 冇可能出去浸溫泉, 我同老公輪流去大浴場浸, 哥哥本來話想跟爸爸去浸, 之後又改變主意, 想留係房玩。大浴場冇人浸, 我一個人浸晒, 游水都得! 正!

早上10:15 check out, 去Tore Tore Market, 天氣好凍, 所以放棄咗室外BBQ, 唔知睇唔睇到劏魚呢! 去到Market, 好多人啊! 果然係遊客區呀! 一場黎到, 點都要買返D刺身食吓! 見到有拖羅, 唔貴, 買一pack試吓, 就係我俾錢其間, 好多人開始圍住個檔口, 原來準備劏魚呀! 爸爸即刻帶孖寶搵個有利位置, 原來每劏一個部份落黎, 包括魚頭, 魚鰓, 就會問吓有冇人要, 要就舉手。睇完劏魚, 就去飯堂搵個位坐低食拖羅, 孖寶唔食得魚生, 買咗支芝士棒同2包Qoo(孖寶至愛)俾佢地。食完嘢, 行下手信舖, 超多人, 都係走喇!

早上11:30, 揸車離開, 出發去和歌山, 行緊高速公路期間, 無啦啦有架車係前面(好近)Cut我地線, 我地Cut過隔離佢又Cut, 閘咗我地幾次(好痴線, 兩架車距離好近, 又開得快!) 我問老公係唔係得罪咗佢, 老公話架車之前已經係後面跟咗佢好耐, 好貼, 老公打過死火燈, 示意佢唔好再跟咁貼, 可能因為咁, 得罪咗佢, 原來日本人都會咁賤格! (今次第一次見識到!) 下午1點到咗和歌山, 已經唔夠時間去參觀和歌山城(上次落雨, 又係去唔到), 所以決定去和歌山搵間西松屋行吓, 睇吓買唔買到嘢俾孖寶, 老公就帶住孖寶去咗另一個地方, 佢話想買Mini任天堂紅白機, 唔知佢去咗邊度買, 只知道佢要15分鐘車程先至返到黎接我。我買咗2件Tee、2套搖拉絨睡衣俾孖寶, 另外落咗去超市買咗5盒即沖粟米湯俾自己。

下午3點, 經過道之駅, 停低架車, 入去食麵, 望出窗口, 原來出面落緊雪呀! 頭先係和歌山都覺得落緊雪, 唔係雨, 不過, 唔太sure, 但而家睇得好清楚, 係落雪呀! 不過, 由於未到零度, D雪落咗落地下, 已經融晒! 食完麵, 同孖寶出去睇咗一陣落雪, 即刻衝返上車! 好凍呀! 好在今日返香港! 我地帶黎D衫頂唔順咁嚴寒的天氣!

孖寶第一次見到落雪

關西機場條橋之前打風時俾躉船撞爛咗, 但好似已經整返好喎, 只係部份橋面封咗路, 要改道啫! 下午4點左右到咗關西機場還車, 仲係落緊唔知雨定雪, 但氣溫進一步下降, 好好好凍呀! 還車既地方係無瓦遮頭, 我地一家四口, 拖住行李, 狂奔幾百米去搭扶手電梯, 再行天橋過去機場大樓, 好凍, 我對手凍到失溫, 冇晒感覺! 救命呀!

終於都入返室內, 呢個地方好熟口面, 就係上次黎大阪, 哥哥發癲要推喼, 之後我地一家四口自拍的地方, hoho... 舊地重遊。排隊寄艙, 好多人, 個地勤D態度好差, 好冇禮貌, 我好想投訴佢！嗱嗱林入閘, 又係好多人排隊, 過咗Immigration, 老公帶孖寶去廁所, 我去Duty Free買手信, 例牌掃4盒Royce, 再乜都買D, 同埋俾我搵返上次買過嗰盒Tokyo Cheese餅 (好好味der~)。然後搭無人駕駛去閘口, 好熟, 又係上次黎過。開始排隊登機, 老公叫我一個去排隊 (我諗起上次係宮崎機場, 我一條友排隊, 足足企咗45分鐘, 老公就同孖寶係麵舖入面坐, 篤機! 我唔想案件重演, 所以我Whatsapp老公: 一陣換你黎排隊!) 我見到老公篤機篤得好過癮, 坐係張Sofa度, 印印腳, 難為成日都係我排隊, 企到腳軟, 仲要前後都係麻甩佬同大媽! 後尾換咗老公黎排隊, YEAH! 仲唔輪到我篤機 + 印印腳?! (我唔會再好似以前咁過度犠牲自己, 乜都為老公、乜都就晒兩個仔, 最衰佢地又唔會覺得你偉大, 又唔會欣賞你! 所以我而家, 出街食飯會叫自己鍾意食既嘢! 唔會情願自己食唔飽, 都俾晒兩個仔食, 你地唔夠食就叫多個餐! 要老公幫手會即時出聲, 唔會期望佢識得自動波幫手! 點解要我一個排隊? 點解唔可以換你過黎排呀?)