一個月內去咗4次廸廸尼

話說孖寶第一次去廸廸尼係3年前, 當時孖寶就黎3歲生日, 嫲嫲提意請我地一齊去廸廸尼玩一日。三個大人(孖寶未夠3歲免費)的入場費, 盛惠超過$1,500。

可能去廸廸尼的車程實在太長, 哥哥到咗廸廸尼個停車場就...... 嘔, 慘慘豬! 哥哥嘔完好似冇咩事, 我地一家五口入去樂園玩, 由於孖寶太細個, 好多遊戲都唔玩得, 只係玩咗巴斯光年, 之後去玩咖啡杯,  然後去食午餐, 印象中好多大劣人, 好難搵位, 老公排隊排咗超過30分鐘先至買到野食返黎, 食完飯, 排隊玩反斗車王期間, 哥哥又嘔返晒午餐D意粉出黎, 似乎哥哥唔係唔搭得車咁簡單, 佢應該係有D唔舒服, 勉強玩埋反斗車王, 4pm都係走喇! 連晚上的花車巡遊都睇唔到。全日只係玩咗巴斯光年、咖啡杯、反斗車王, 同埋好似乞衣咁食咗個午餐, 盛惠1,500的入場費, 可以講係 -- 嘥晒! 我同老公都得出一個結論, 孖寶太細, 唔適合去D咩樂園, 雖然佢地入場免費, 但對佢地黎講, 實在太辛苦!

自此之外, 就冇再去廸廸尼, 直到最近, 廸廸尼推出全年票8折優惠, 我同老公都覺得, 孖寶已經6歲, 大個咗好多, 而家去廸廸尼, 應該唔會再好似以前咁辛苦, 可以再試吓! 於是, 我地係上個月買咗金咭, 一家四口盛惠$5xxx, OK啦! 假日又可以多個節目, 由於金咭泊車唔駛錢, 諗唔到節目入去行吓都OK!

由11月到而家, 我地已經去咗4次(只係孖寶考試個星期冇去), 已經值回票價! 孖寶好鍾意, 其實我同爸爸都好鍾意, 因為好funny, 加上臨近聖誕, 好有節日氣氛!

第一同第二次去廸廸尼, 都只係去咗明日世界同幻想世界, 因為細佬好鍾意玩Iron Man個遊戲, 次次都嚷著要去玩 (哥哥第一次玩爆喊, 以後都唔去), 我同爸爸輪流陪細佬, 但因為都幾chok,  好頭暈, 次次玩完都想嘔, 但細佬就面不改容(有媽媽當年的影子!), 不過, 佢全程唔笑, 好認真!

由於兩兄弟鍾意玩D野都唔同, 我同爸爸有時會一人湊一個, 分開玩, 不過, 佢地兩個都好鍾意玩小熊維尼, 小小世界坐船仔, 又好鍾意睇人上台扮絶地武士(爸爸用Star Wars激光劍利誘佢地, 佢地都唔肯上台, 細佬話好怕醜!)。睇咗一次魔法書房, 係有劇情的歌舞表演, 孖寶竟然話好睇!

第三次去廸廸尼, 媽媽決定唔再去明日世界, 要去另一邊的森林冒險, 坐木笩去對面岸, 參觀泰山樹屋, 爸爸同細佬兩個去玩灰熊山谷過山車, 然後一家去睇獅子王慶典(都係歌舞表演, 但冇魔法書房咁好睇!) 由於12月係孖寶生日, 可以換2張免費餐券, 第一次係大冒險家餐廳食lunch, 都OK, 冇3年前感覺咁差! 好似少咗大劣人!

上星期六, 係第四次去廸廸尼(由於天氣凍咗, 爸爸提意孖寶著去年買的雷神外套去廸廸尼, 孖寶竟然肯就範! hoho......), 一入到樂園, 我見到係近門口的建築物前面有人排隊, 唔知係咩黎, 睇吓門口個牌, 好似係教人畫畫喎! 哥哥話佢想畫畫, 但細佬唔想, 佢不停咁扯住我, 要我同佢去玩灰熊山谷, 於是我同老公一人湊一個, 我同細佬玩過山車, 老公陪哥哥畫畫。同細佬玩過山車好開心, 佢好多野講, 又同我一齊大嗌!

我地今次仲特登玩D之前冇玩過的遊戲 -- 迷離大宅(有D詭異同恐佈, 嚇死孖寶喇!), 同彈弓狗(排咗好耐, 但玩唔夠1分鐘!)。之後去咗火箭餐廳食午餐 -- 漢堡包、炸雞(幾好味)同薯條(多到食唔晒!), 好唔健康! 由於細佬去咗玩過山車, 冇去畫畫, 佢見到哥哥有幅畫, 又話想去畫, 於是媽媽陪孖寶去畫畫(爸爸唔like畫畫, 自己去咗行街!), 原來今堂教畫聖誕高飛(哥哥之前學畫Duffy熊), 媽媽自小鍾意畫畫, 所以覺得好好玩呀! 畫完畫, 細佬想去明日世界玩Iron Man(又黎?!) 爸爸提意搭小火車去, 但細佬唔like, 結果媽媽同細佬行去, 爸爸同哥哥搭火車(原來行去係快過搭火車der~)。我同細佬去玩Iron Man, 爸爸就同哥哥去搵Star Wars角色影相, 今日玩咗好多野, 唔錯! 臨走的時候, 我地又去多次畫畫 (今次拉埋爸爸入黎!), 都係畫聖誕高飛, 畫完出黎見到有巡遊, 睇咗一陣, 差不多5pm, 孖寶好攰, 返屋企喇!

 無端端有街頭表演, 就係呢D樂園氣氛!

 兩個型到爆的雷神!

媽媽的畫作, 仲keep到當年的水準!

爸爸話下次6pm入場, 睇埋夜晚的燈光花車巡遊先至走!