然兄逸弟: 聖誕名古屋+大阪親子之旅2018

2018.12.24 (星期一)

日本氣象廳好準, 今日陽光普照, 但氣溫急降, 都幾凍吓, 好在今日的節目 (豐田產業技術紀念館同名古屋市科學館) 都係室內。

差不多早上8點起身, 8:15食早餐 (係房入面食早餐好方便, 又唔駛換衫, 又唔駛搭lift落去), 孖寶好like係房食早餐, 佢地話最好以後都係咁, hoho!

包包好好味!

陽光普照, 但好凍!

食完早餐, 早上9:30出發, 原來真係好凍, 我拎漏咗條頸巾, 要返上房拎, 老公同孖寶去停車場攞車, 但老公冇散紙俾泊車費, 都係要等我行過黎, 先至出到停車場。

豐田產業技術紀念館只係距離酒店15分鐘車程, 好快就到。買飛 (成人500円, 小童寒假期間免費入場), 由於想睇吓邊度有車車揸, 所以就問其中一個職員, 原來出返去門口有個counter book時間, 好在問吓啫, 唔係又好似上次東京鐵道博物館咁(飲恨!), book咗11-12點的時段, 仲有時間, 入去展覽廳睇吓野, 有日本導賞團, 雖然唔識聽, 但都想睇吓, 跟住導賞員行, 佢解釋D棉花點樣整成棉線(冇錯! 係介紹緊以前的紡織程序, 因為豐田的前身係做紡織, 之後先至造車。) 我覺得以前D人好叻, 可以發明到呢D機器黎整棉線同織布(我同老公都好有興趣, 孖寶就...... 只係對棵假的棉花樹好有興趣囉!)

個博物館係以前的廠房活化

早上11點, 入去揸車車館, 原來要身高130以上先至可以揸車, OH! 爸爸你自己玩啦! 館入面有個兒童play area, 孖寶玩得好開心, 但期間, 細佬急vee vee, 又搵唔到我地, 發晒脾氣 + 爆喊! 爸爸安慰咗佢好耐, 辛苦晒爸爸! 好快就1個鐘頭, 我地玩完吹風機, 就走lu!

爸爸自己玩

兒童Play Area

然後, 參觀汽車博物館(小朋友可以即場砌汽車模型, 係重點節目), 細佬不停嚷著要去砌模型, 爸爸想安安靜靜睇展覽都唔得, 於是, 我話陪孖寶去砌模型, 老公你慢慢睇吓嘢啦!

小朋友每人拎一個托盤, 自己拎零件

爸爸都過黎睇吓孖寶砌成點

砌完模型, 再周圍行吓, 下午1:30喇! 媽媽好肚餓呀! 博物館入面有餐廳, 決定就係度食咗先! 老公叫咗兩個咖喱飯(好辣! 是但啦! 肚餓乜都食!), 一個熱狗(細佬), 一塊pizza(哥哥)。

之後去科學館, 但孖寶係車入面瞓咗, 叫醒佢地, 佢地發癲, 唔想去科學館。免強無幸福, 既然係咁, OK, 爸媽去睇自己鍾意既嘢喇! 我當然係去AEON行街買衫啦! 老公車我去AEON, 佢就帶住孖寶去Bic Camera, 電話聯絡, OK!

係AEON MALL行咗個半鐘, 係Earth Music買咗件灰色9-way毛毛短身絨褸(4000円咋), 另外係Discoat買咗件棗紅色hoodie(我好少呢D色衫)。老公同孖寶都收穫豐富(買到要退稅, 老公話個收銀員見到要退稅, 手都震埋, hoho!) 老公買咗一人一個爆旋陀螺俾佢地, 仲要買埋個盤(吓? 點拎返香港呀? 都話咗用隻唔要的易潔鑊做盤咪得囉!)

爸爸話買埋個盤, 都唔知點拎返香港?!

老公都想係AEON睇吓衫, 佢想買件冷外套返工著, 但孖寶不停話: 好肚餓! 於是, 媽媽叫爸爸自己去睇衫, 我帶孖寶上樓上餐廳叫住嘢食先。媽媽見孖寶咁肚餓, 於是叫咗一人一個兒童餐俾佢地, 另外媽媽叫咗個魚生飯set, 爸爸叫咗一個好大的set, 好多嘢食!

孖寶真係好肚餓

食飽飽, 去Supermarket買早餐, 由於今晚係平安夜, 媽媽真係好想買個cake返去慶祝吓, 揀咗好耐, 諗咗好耐(驚中伏), 最後買咗個小小綠茶cake, 應吓節啦! 返酒店期間, 經過名古屋電視塔, 我實在忍唔住要講喇: 其實我plan咗今晚去名古屋電視塔架! 老公話: why not? 去埋囉!

又俾我地搵到個唔知咩停車場 (好似尖東D停車場咁, 有個阿叔坐係門口, 入去佢就開門俾你咁)。半小時收費150円, very OK 喎!

電視塔入場費成人1,000円, 小學生500円, 我兩個咁細粒, 緊係小學生以下 -- 免費啦!) 搭lift上展望台, 可以睇到外面的夜景, 聖誕期間仲有咩Fantasy Show (將D電腦動畫投射落去塊玻璃度, 都幾得意, 如果冇咁多人 + 只有我&老公, 應該都幾浪漫!) 之後, 行樓梯上多一層, 原來係露天架! 好很凍呀! 影咗一張全家福, 到此一遊, 走喇!