考試周

剛過去的星期(2018.11.27 - 2018.11.30), 係我家孖寶面對人生第一次考試的大日子!

話說, 媽媽係前一個星期已經進入作戰狀態, 深入研究今次的考試範圍, 並且日以繼夜咁幫孖寶出模擬試卷 (人家有阿哥家姐係度讀, 就會有往年的past paper, 或者係金牌家長, 或者係同金牌家長做friend, 都有機會取得past paper, 但我家孖寶冇阿哥家姐, 阿媽又唔係金牌家長, 又唔識人(今時今日, 真係識人好過識字), 當然無法取得past paper啦! 惟有用最原始的方法 -- 自家製模擬試題, 不過, 媽媽一個人要化身中英數常科主任, 出一份20分鐘的試題, 要用2個鐘, 中英數試卷各有卷一卷二, 如果要一個人出晒6份卷, 簡直係疲於奔命, 所以媽媽只出咗中文卷一, 卷二, 英文卷一, 已經係極限! 數學就惟有做吓坊間D練習, 計吓加減數, 常識就...孖寶你地自由發揮吧啦! 仲有中英普口試, 由於爸爸讀書少, 所以都係由媽媽幫孖寶練習, 真係練到聲都沙埋(我講我!) 自問今次考試已經盡晒力(係我!), 所以考出黎咩成績, 都唔好咁震驚, 要保持冷靜(孖寶未考試, 我已經不斷安慰自己!)

上星期六、日, 孖寶都要乖乖留係屋企溫習, 由於孖寶有一半爸爸的基因 -- 闊佬懶理! 所以媽媽要幫佢地兩個溫習, 真係好吃力! 加上其實溫習係要因應每個小朋友唔同的進度, 佢識D乜, 唔識D乜, 所以係好個人化, 冇可能一個幫兩個溫習(我真係唔得, 如果爸爸你得, 咁你一個幫佢兩個溫晒佢啦!) 最後, 當然係我幫一個, 爸爸幫一個啦! 仲要一個係房, 一個係廳, 唔好騒擾對方!

一連4日的考試終於完結, 媽媽都好似放下咗心頭大石咁! 終於都唔駛再幫佢地溫書喇! 你估我真係好鍾意幫佢地溫書咩? 我呢世人最憎就係讀書(唔好問我2個Master Degrees係點讀返黎!)

孖寶總算順利渡過咗人生第一個考試, 不過, 諗起孖寶往後的人生仲有無數個考試, 媽媽真係"鄧"佢地可憐, 不過, 媽媽都係咁捱過咗, 孖寶有媽媽一半基因, 佢地都得既!

然然、逸逸, 加油呀! 媽媽會一直係你地身邊, 為你地打氣架!