聖誕名古屋+大阪親子之旅2018 - Day 1

2018.12.21 (星期五)

我同老公都請咗假, 孖寶今日要返學校參加聖誕聯歡會(12:40放學), 佢地負責帶燒賣, 所以媽媽一早起身, 幫佢地蒸燒賣(工人上星期二晚已經返咗鄉下, 媽媽已經做咗超過一個星期工人喇!), 然後, 整早餐俾孖寶食, 換衫(今日可以著便服返學), 早上7:30我同老公(揸車)送孖寶返學, 孖寶好開心! 仲係學校門口同聖誕老公公(外藉老師扮的)影相。之後, 我同老公就返去屋企樓下翠園飲茶(冇錯! 我好鍾意去茶樓飲茶, 成間茶樓最後生嗰兩個就係我同老公! hoho.....)

好有特色的點心, 味道都唔錯!

飲完茶, 返上樓執埋D行李, 12:20拎埋D行李, 揸車去學校接孖寶, 孖寶有爸媽接放學, 好興奮, 加上聖誕聯歡會, 孖寶收到好多糖果同禮物, 好雀躍! 不停咁分享佢地收到D咩禮物同聖誕咭, 仲話要帶埋去日本 (緊係唔得啦!)

直接揸車去青衣機鐵站, 泊低架車 (停車場職員話冇晒位, 老公冇睬佢, 照入閘, 車! 原來仲有好多位, 只係距離Lift口遠D啫!) 下午1:40泊好車, 拎埋行李, 落去搭鐵場快線, 小童聖誕期間又係免費!

然然個樣大個仔咗好多!

整古做怪的細佬仔

下午2:15左右去到機場, 去CX Counter Check-in, 都多多地人, 不過, 都唔算排咗好耐, 老公之前已經mark晒位, 又book咗兒童餐, 好順利! 由於未食Lunch, 我諗住去返入境大堂食D野先, 點知M記執咗笠, 想食碗麵都排餐死既, 我決定放棄, 去7-Eleven買D野食算喇! 食完野, 見到有魔術表演, 孖寶好like!

下午3:30, 夠鐘入閘喇! 由於係聖誕旺季, 好多人排隊入閘, 好在香港人D效率都好高, 好快就過咗Immigration。由於今次係坐尊貴的CX, 所以唔駛搭無人駕駛, 行去登機閘口就得! 排咗一陣隊就開始登機, 又係老公同孖寶坐, 我自己一個坐係走廊對面, 坐我隔離個妹妹好麻煩, 成日出出入入, 又伸隻腳過黎我個位度, 好冇家教!

指定打咭位影相

三父子同一個表情

是日晚餐

晚上9點落機, 好多人過Immigration, 打晒蛇餅, 好在都去得算快, 我地今晚瞓機場...... 酒店, 過條橋就到, 頭先係機上, 我醒起我唔記得帶最重要既嘢 -- 耳塞 (點算? 我呢幾晚點瞓呀?! 我想喊!), 所以Check-in 完之後, 我即管問吓酒店有冇Ear Plug, 佢地竟然話有呀! 太好喇! 今次有救喇!

終於到咗名古屋喇! 

上到房, 先至發覺哥哥件外套留低咗係酒店大堂, 要爸爸落去幫佢拎返。爸爸同孖寶沖涼, 安頓好, 好夜喇! 係時候要休息喇!

好在有耳塞, 因為塞咗耳塞都聽到老公D坦克鼻鼾聲, 如果冇耳塞, 都唔知點瞓!

Day 1 完