孖寶今年6歲, 但已經係第7年過新年喇!
為咗俾孖寶感受更多中國人過新年的氣氛, 媽媽今年買咗個日式全盒(其實已經講咗好多年, 今年終於冇人阻止我買喇! 佢仲同我一齊去揀添, hoho!) 其實過年全盒都係媽媽的童年回憶, 記得細個既時候, 到咗新年, 就可以不停咁食全盒入面D糖果, 係非常開心的童年回憶!
好日式啊!
未過年已經不停咁食
除咗全盒入面D糖果可以任食, 小朋友最開心就係可以逗利是! 為咗逗利是, 細佬仔可以克服佢最弱的一環 -- 怕醜! 佢背咗幾句新年賀詞, 然後不停咁loop住黎同人講。
逗完利是, 最開心的時刻就係拆利是喇! 以前孖寶太細, 媽媽唔敢俾佢地拆, 驚佢地撕爛利是入面D錢, 或者撕爛個利是封(媽媽每年都會將D利是封keep起+重用, 撕爛咗就好可惜)。
拆利是最開心!
仲有開心事, 就係每年年初二去完姑婆屋企拜年, 就會去佢樓下間LEGO舖買LEGO, 係孖寶用自己利是錢買 (爸爸通常幫佢地俾咗錢先, 佢地拆咗利是之後會俾返錢爸爸, 而因為係用自己錢買, 孖寶都好小心選擇, 唔會揀太貴, 佢地話要慳錢, GOOD BOY! 我地成日問細佬儲埋咁多錢做乜, 佢就會話留返第二時大個用, 佢話要用D錢買間大屋, 俾埋爸爸媽媽住! 媽媽心諗: 買屋俾我住? 到時唔駛問我地攞錢俾首期買樓就已經好好喇!)
沒有留言:
張貼留言