今日天陰陰。
早上8:30落去食早餐, 由於係APA酒店, 所以早餐質素麻麻, 亦冇乜好食, 是但啦!
早上9:45 check out, 去AEON MALL睇吓會唔會搵到尋晚架車仔, 或者有冇一把黃色的兒童遮, 結果...... 緊係冇啦!
早上10:15, 到咗鈴鹿賽車樂園, 停車場先收1,000円, 然後去買飛, One Day Pass 成人每位4,300円, 3-6歲每位2,100円, 一家四口盛惠12,800円。
入園喇! 門口有隻公仔等緊佢地, 影完相, 就去問吓真賽車場揸車體驗(Circuit Challenger)係邊度, 因為要預先買飛, 再係指定時間去到 (自從上次東京鐵道博物館, 冇攞籌, 買唔到飛揸車, 而家好驚, 咩都問咗要唔要攞籌或者買飛先), 原來可以係佢個臨時Counter買飛, 一架車可以坐1大1小, 我地要2架車, 盛惠3,000円, 我地買嗰場係12:15, 要早10分鐘去排隊。
由於時間尚早, 我地去玩其他嘢先, 包括電車、越野車、飛天兜、揸船仔、吉普車過山車, 中午12點, 係時候要去賽車場喇! 過咗條隧道, 去到真既賽車場 -- 鈴鹿賽車場, 淨係企係賽車場外面個空地都已經好興奮, 再行去看台睇個賽道, 人生第一次踏足賽車場, 幻想賽事時候D賽車既引擎聲, 感覺好震撼! 然後就係排隊, 排咗好耐, 終於行得, 原來係行去等候室, 睇一段片, 內容大概係教你點操控架車, 其實都好簡單, 就好似平時玩揸車咁囉, 不過, 今次係係真的賽車場上揸車咁解!
工作人員安排我地順住次序上車, 我同哥哥, 老公同細佬, 工作人員仲幫我地影相。之後, 開車喇! 慢慢駛出賽道, 然後跟住錄音的指示, 扭軚, 再停低係個框入面, 見到全部綠燈, 就踩盡個油門, 衝呀! 不過, 由於安全問題, 最高時速只有30公里, 原來冇賽車feel, 不過, 能夠係真既賽車場上揸過車, 感覺仍然係好興奮der~
揸完車, 可以拎返張咭, 出去門口D機度, 睇吓自己咩Grade, 我竟然有B (老公得C咋! hoho...) 孖寶嚷啫要玩多一次, 而且因為我有B Grade, 細佬話今次要同媽媽坐, 好啦! 咁難得既體驗, 加上出得黎玩, 就唔好計咁多喇! 豁出去啦! 玩多一次啦! 原來可以即場買飛, 又唔駛排隊, 可以即刻入去玩, 早知唔駛咁緊張買飛啦! 今次, 我同老公都有A Grade喇!
下午1:15, 係時候去食飯喇! 叫咗兩個兒童餐俾孖寶, 我叫咗個照燒牛肉飯, 老公叫咗個漢堡扒飯 (佢地而家大個仔咗, 要食成個餐先至夠飽!) 食完飯, 去玩蝸牛, 細佬嚷著要玩過山車, 又黎? 啱啱食完飯咋喎! 好啦! 媽媽同你去啦! 去到先至發現, 原來要120cm先至可以玩, 細佬只有112cm, 佢好傷心, 喊咗! 要爸爸安慰!
之後去玩飄移, 完來又係有身高要求, 孖寶唔玩得, 我同老公要輪流睇住孖寶, 所以都要分開玩。之後入咗賽車博物館, 原來有個好似戲院咁, 坐位會郁, 好似自己揸緊賽車咁。玩完之後, 去玩摩天輪, 期間見到有個For 大人玩的Go-kart車場, 我叫老公一陣自己去玩, 我同孖寶去玩兒童電單車。
原來兒童電單車就係門口隔離 (今朝入場見唔到), 工作人員問孖寶本身識唔識踩單車(因為要自己平衡), 好在孖寶係識der~ 然後, 孖寶入去個房仔入面(媽媽唔入得, 只可以企係外面等), 工作人員幫佢地戴頭盔、護掙同護膝, 叫佢地坐係凳度等。原來要試揸一輪, 熟習咗個操作先至可以落場玩, 孖寶輪流試揸, 都算揸得唔錯, 起碼平衡到先啦! 之後, 就正式落場玩, 但只係揸咗4-5個圈就夠鐘, 不過, 孖寶笑晒口, 好好玩咁! 差不多下午5點, 個天就黎黑晒, 趁樂園未閂門, 去埋隔離玩揸BB電動車, 雖然架車行得好慢(我仲驚細佬發脾四), 但佢兩個都玩得好開心! 玩完, 真係要走喇! 今晚要去奈良, GPS顯示車程要3個幾鐘, 唔係掛, 唔好嚇我喎, 我google過, 都係1小時40分鐘。
晚上7:30 (好在唔駛3個幾鐘, 只係揸咗2個鐘啫), 終於都到咗奈良的AEON MALL喇! 老公去100円店買返把黃色兒童遮俾細佬。今晚又食拉麵, 又叫咗2個兒童餐俾孖寶, 餐廳送俾孖寶每人一個金幣, 可以去扭蛋機度扭蛋, 孖寶好開心! 食完飯後去Supermarket買水果同甜品, 晚上9:20, 返酒店。
晚上10點, 食甜品+蘋果。
Day 6 完
沒有留言:
張貼留言