然兄逸弟: 聖誕名古屋+大阪親子之旅2018

2018.12.27 (星期四)

今日都幾好天, 但好凍, 唔夠10度!

差不多早上9點先至落去食早餐, 尋日Check-in時, 職員問孖寶要唔要食早餐, 我話唔駛, 但今朝又帶埋孖寶落黎食, 唔知酒店會唔會收返錢呢? (老公話: 酒店唔會咁小家既!) 食完早餐, 上房執埋行李, 早上10:15 check out, 酒店冇收孖寶早餐錢啊! hoho......

揸車去奈良公園餵鹿仔, 由於我同老公已經係第3次黎, 所以已經熟晒地形, 我落車同阿婆買咗2 pack 鹿餅先, 然後泊車, 過隧道去返另一邊草地餵鹿仔, D鹿仔好進取, 不停咁點頭, 要食鹿餅, 仲咬我件衫, 哥哥比較大膽, 係爸爸協助下都餵到鹿, 但細佬都幾驚, 佢只係敢掉塊餅落地下俾D鹿食, 最後, 隻鹿連個膠袋都唔放過, 差D食埋個膠袋落肚, 好在俾爸爸制止咗!

然然由細到大都好鍾意小動物, 好有愛心!

難得小鹿同我一齊望住鏡頭

隻鹿差D食埋然然手上個膠袋

餵完鹿, 老公話想去行吓東大寺, 因為黎咗咁多次都冇去, 呢D世界文化遺產, 應該要去見識吓, 沿途仍然遇到好多鹿, 然後, 孖寶開始扭計, 好攰, 行咗好耐, 冇力喇! 媽媽惟有話: 咁買雪糕食, 補充體力喇! 食完雪糕, 孖寶都肯繼續行, 去到東大寺門口, 老公知道原來要買飛入場, 佢就話, 離遠睇都OK, 唔駛入去喇! 於是, 我地從另一條路行返去停車場, 攞車, 走人! 中午12:30, 出發去白濱 (要揸3個幾鐘頭車, 辛苦老公喇!)

隻鹿企定定俾途人影相

排隊隊食雪糕

老公話就咁離遠睇就OK!

我同孖寶都瞓到如火如荼 (老公要揸車冇得瞓, 佢話其實佢都好眼瞓, 因為揸公路好悶!) 下午2點, 到咗道之駅, 我記得上次去和歌山, 都黎過呢個道之駅, 我仲搵返上次(2年前)影的相, 對比一下(孖寶大個咗好多!)

2016.10.21

2018.12.27

由於仲有個半鐘先至到白濱, 已經冇可能去ToreTore Market食海鮮BBQ, 我決定係道之駅食咗嘢先, 買咗2碗拉麵(我同孖寶), 1碗烏冬(老公)。食完麵, 係舖頭買咗少少手信, 走人!

下午4:15, 終於到咗三段璧, 買飛, 搭lift落去懸崖下面睇浪, 工作人員幫我地一家四口影相, 然後行吓個山洞, 孖寶話有D驚, 因為又黑又濕, 哥哥話驚有D唔知咩突然彈出黎! 細佬捉到我隻手好實! 兜咗一個圈, 準備搭lift上返去, 細佬見到頭先影嗰幅相, 佢話好想要, 好啦! 盛惠1500円, 上返地面, 原來已經Closed!

老公想去間舖頭探返6年前見過嗰隻狗BB, 同老闆雞同鴨講咗一輪, 我係電話搵返6年前同狗BB影過嗰張相, 老闆又叫埋佢老婆出黎, 最後, 終於明白, 佢老婆帶咗我地去舖頭後面, 原來隻狗係老闆個女養, 狗BB亦已經變成一隻大狗, 同老闆個女用英文講咗幾句, 原來狗仔個名叫阿Kai, 係日文黎, 係"大海"的意思。Say Goodbye之後, 我地要去返另一間舖頭, 因為購物滿2,000円, 就可以Refund返停車場嗰500円泊車費, 緊係唔好蝕俾佢啦! 點都搵D嘢買, 不過, 原來間舖頭收檔喇! 我地求其買咗2盒手信, 老公見D士多啤梨好紅潤, 買咗一pack。

狗狗同孖寶一樣都係6歲

下午5:30去到溫泉酒店, 係座小山上面, 係小型溫泉旅館。我地今晚住露天風呂付洋室, book咗晚上6:30食飯。入到房, 唔豪華, 但感覺乾靜企理, 空間都幾大, 有2張大床, 個風呂係我地Request嗰款, 係地下的岩石溫泉, 夠大, 可以一家四口齊齊浸 (上次去箱根嗰間, 房入面個風呂只係一個用木做的浴缸, 唔夠一家四口浸, 個缸邊又高, 孖寶自己落唔到去, 我已經Backlist咗間酒店)。未夠鐘食飯, 緊係浸吓溫泉先啦! 不過, 都幾凍, 緊係啦! 12月尾喎, 就黎落雪添喇! 雖然好凍, 但浸住溫泉, 好舒服, 孖寶有得玩水好開心。