孖寶升小一 (迎新篇)

為咗讓新生可以適應校園環境同課堂的運作, 孖寶的小學係今日(8月30日)舉行咗小一迎新活動。

今日學校會幫新生影學生相, 所以我叫爸爸幫孖寶Gel靚個頭, 影相靚仔D!

早上8:50, 家長帶子女返學(爸爸請假, 我要代老闆出去開會, 唔可以請假, 但都有送佢地返學), 家長可以陪子女上課, 由於爸爸要去泊車, 我同孖寶行咗入學校先, 係G/F去完洗手間, 就陪佢地上2/F, 哥哥係1C班, 細佬係1A班, 上到2/F, 好多老師企晒係走廊同課室門口, 個個都滿面笑容 (似乎幾nice)。

由於細佬班房近樓梯, 我同哥哥講, 不如送咗細佬入班房先, 細佬的班主任好Nice, 佢叫細佬坐低先(細佬坐課室中間最前個位), 佢又知道哥哥叫卓然, 佢幫細佬掛咗個名牌, 仲叫哥哥坐係細佬隔離, 一齊合照。哥哥初頭有D唔想, 可能太緊張, 但最後都肯企係細佬隔離, 影咗張相。

同細佬bye bye之後, 我就帶哥哥去1C班課室, 老師(唔知係唔係班主任)都好nice, 問哥哥叫咩名, 然後幫佢搵返自己個位, 原來哥哥坐係窗口隔離第四個位, 哥哥咁矮, 我擔心佢有機會俾人遮咗, 睇唔到黑板, 但我估, 而家應該係跟學號坐住先既啫, 老師到時會因應學生的高度, 重新再分配過座位掛! (我記得我小學時都係咁)。老師叫我坐係然然隔離, 用佢部相機幫我地兩母子影咗張相。

安頓好孖寶, 我行出走廊睇吓爸爸黎咗未! 佢都啱啱上到黎, 一齊又走入去哥哥班房, 另一位老師, 又幫我地一家三口影咗張合照, 哥哥呆呆地, 可能因為有D緊張! 爸爸叫我去睇吓細佬先, 啊! 其實我頭先已經bye bye咗細佬, 我再入返去, 唔知會唔會影響佢情緒! 我入到班房, 見到老師不停"遼"細佬傾計 (多謝老師! 可能見佢好緊張), 細佬見返我, 面容繃緊(好似有D想喊, 但又忍住!)。我同老師講, 爸爸頭先去咗泊車, 而家黎咗, 想入黎同卓逸打聲招呼, 但原來已經9點, 家長要落禮堂聽講座, 我叫爸爸快D啦! 爸爸衝咗入去班房, 我幫佢兩父子影咗張合照。

之後, 爸爸落禮堂聽講座, 我要走喇! 趕住出去九龍開會!

聽爸爸講返, 佢兩個(尤其細佬)好唔想學樂器(學校希望做到一人一樂器, 我好like, 因為我成日都想孖寶學樂器, 但俾某人阻止!) 細佬仲話唔想學咁多野, 佢驚冇時間玩! 爸爸又問佢地頭先做咗D乜, 細佬話唔想講, 爸爸你問呢D野好煩! err...... 都係關心你啫! 咁似乎媽媽今晚都唔好問佢地喇!

今晚, 媽媽都係忍唔住想問吓佢地今日係學校咩情況, 由於唔可以太直接, 於是, 就問佢地:
1.  有冇影學生相呀? (問黎都多餘!)
2.  有冇拎件外套出黎著呀? (佢地一向都唔會主動著外套, 情願凍, 所以未問都知答案)
3.  排隊係唔係男仔一行, 女仔一行架? (係呀! 佢兩個仲不約而同話自己排第一, 沾沾自喜! err...... 咁樣係唔係應該開心呢?)

後記@2018.08.31(星期五)

媽媽今朝再問吓孖寶想參加咩興趣班? 羽毛球好唔好呀? 細佬話: 好呀! 我再問: 咁另外參加畫畫班, 好唔好呀? 細佬又話好呀!

爸爸話: 突變!

後記@2018.09.07(星期五)

今朝一早7:40, 要上學校的內聯網幫孖寶報興趣班, 因為D家長話, 好搶手, 遲咗就冇(估唔到連興趣班都要爭, 請問係香港讀書, 有咩係唔駛爭架?!) 我同爸爸幫孖寶報咗羽毛球班, 唔係校隊, 千期唔好揀錯, 校隊要操到X盡人亡的! 另外, 幫佢地一人報咗一個樂器, 哥哥係口琴(本來佢好鍾意打鼓, 我同爸爸都想幫佢報敲擊樂, 但佢話唔鍾意, 一定要學口琴, OK!) 至於細佬就係小提琴(因為細佬話唔鍾意咁嘈, 我同爸爸覺得小提琴D聲音比較優美, 細佬應該會少一點抗拒)。

南九州親子之旅2018 - Day 8

2018.08.11 (星期六)

今日天陰陰, 天氣冇咁熱, 外戶活動一流, 可惜, 我地今日下午就要搭飛機返香港, 今日的行程只係揸4個鐘頭車去宮崎機場。

仍然係早上8:30左右落去酒店地下的日式餐廳食早餐, 阿姐已經認得我地, 而我地都自動波坐返埋我地自己個位, 孖寶話今日要一齊坐, 爸爸媽媽就坐另一邊。早餐都係果D野, 食咗3日都唔厭, 因為只要係食日本野, 我就OK!

賣廣告

返上房執埋D行李, 早上9:50 check out, 出發去宮崎, 本來諗住去AEON MALL食午餐, 但GPS顯示要下午2點先至到, 吓? 唔得喎! 班機下午4:20起飛, 最遲2:30都要去到機場啦! 之前仲要入油同還車, forget it! 直接set去機場附近油站入油, 還車算吧啦!

早上10點開車, 上咗高速之後, 個天由天陰陰, 變成落雨, 然後越落越大(我諗起上年4月去九州時都係咁, 希望今次唔好又尿急, 又搵唔到道之駅, 又要係路邊... 滂沱大雨中...), 雖然老公已經開到時速120公里或以上, 但原來由別府去宮崎真係好遠, 感覺行咗好耐, 都仲有好耐先至到!

由於車速太快, 影到濛晒!

唔知幾時, 哥哥突然講起就黎要返學, 升小一, 好驚唔適應, 好驚自己聽唔到老師講乜, 好驚抄唔切手冊, 好驚做唔晒D測驗/考試題目, 好驚急尿老師唔俾去廁所 (下刪一千字好驚到時會發生的狀況), 總之佢就係好驚 + 好擔心! 然後, 爆喊, 喊到收唔到聲, 爸媽嘗試用唔同的方法安慰佢(同理心大法 + 幫佢諗辦法), 佢都不停反駁: 唔係喎! 如果咁咁咁... 咁點算呀? (連細佬都忍唔住講: 阿哥! 點解你講黎講去都係呢幾句?!) 然後, 哥哥繼續爆喊! 爸爸一邊揸車, 一邊安慰咗佢超過30分鐘(勁!), 不過最後, 爸爸終於忍唔住, 我唔再同你講! 然後, 輪到媽媽, 媽媽試圖分享自己小學失敗的經歷(默書零分、小息冇去廁所搞到上堂賴尿, etc.), 希望佢知道 -- You are not alone! 但似乎不湊效! 佢仍然係好唔開心 + 好擔心 + 飲泣! (最後, 我已經忘記咗佢係咩情況之下收咗聲, 好似係去道之駅去廁所掛...)

好似係呢個道之駅

下午1:45左右去到油站, 入油, 還車, 然後搭租車公司的Shuttle去機場。下午2:10到咗航空公司櫃位, 原來仲未開, 個牌寫住2:30先至開櫃位, 吓? 要企係度等20分鐘? 咁算喇! 去咗食野先, 好肚餓! 於是, 一家四口去咗隔離食麵, 叫咗1碗大麵(for 老公), 2碗細麵(for我自己&孖寶), 食完麵, 下午2:35左右, 隔住麵舖個玻璃窗望出去, 見到排隊條人龍越整越長, 我同老公講, 唔對路喎, 我出去排住隊先, (老公"啊"一聲, 繼續篤機...... 藐咀加斜睥眼emoji表情符號一個!)

排咗好耐, 條隊郁得超慢, 好似因為只係開咗1個Counter, 排咗超過20分鐘, 聽到有人話開多咗個Counter, 條隊好似快咗少少, 再過咗15分鐘左右, 終於輪到我(早知頭先一早企20分鐘等佢開Counter啦!), 老公呢個時候先至同孖寶行出黎, 坐係度印印腳篤機係唔係好正呢? 難為你老婆食飽麵都未落隔, 就仆出黎企咗35分鐘, 都冇諗過換老婆入去坐一陣, 你繼續排, 你對老婆真係好喇! 驚佢食飽冇野做, 坐係度, 會痴肥!

由於仲未買手信, 係! 冇錯! 呢8日的行程入面, 都冇買過手信俾鄉親父老, 所以我有D擔心, 我同老公講, 都係入咗閘先, 要去免稅店掃手信呀! 原來入閘要上幾層樓, 經過樓上好多賣手信的舖頭, 有好多店員攔途截住你, 想你試食同買手信。雖然都係寫住免稅, 但我驚好似有一次咁, 收咗我稅, 然後叫我行去機場另一邊唔知邊個Counter退稅, 我時間無多, 唔得閒玩退稅, 都係入咗閘去免稅店買, 唔駛煩!

經過呢條走廊, 就係Immigration

下午3:30入閘, 過Immigration, 哥哥唔知做咩, 無啦啦起跑加自轉, 結果仆咗落地, 對手都伸唔切出黎撳住個地下, 成個咀唇仆咗落地, 今次對門牙應該飛脫, 我同老公即時執起佢, 睇吓佢傷成點? 冇事喎! 對門牙仲係度, 不過, 哥哥已經喊到九彩, 仲俾爸爸鬧! (我心諗: 算啦! 佢咁慘, 咀唇都流晒血喇! 仲鬧佢做乜丫?! 唉! 寶寶心痛, 但寶寶不說!)

入到禁區, 原來只係得一個候機室咁大的範圍, 同埋只有一間一眼睇晒的免稅店(滴汗!) 是但啦! 有乜就掃乜啦! 最後, 掃咗17盒手信(包括2盒Royce自用), 無意中俾我見到有Shiseido Anessa有色防曬防水BB cream(價錢同香港差不多), 再睇吓隔離, 竟然有隻藍色Anessa防曬防水粉底, 係粉底呀! 有OC20, 係我用開果隻粉底顏色呀! 即時納咗一支, 2,240円(即HKD163左右, 後來上Amazon睇, 要3,240円, 免稅店平咗足足1,000円呀!!!), 支野係香港LOG-ON未見過, 同埋唔貴喎, 我平時用開Shiseido支粉底30ml都要HKD310啦! 呢支防水粉底有22ml, 只係HKD160, 好抵喎! (諗咗好耐買唔買多2支, 但由於屋企仲有2支粉底未開未用, 算吧啦! 我驚擺到過期都未用到!)

下午4點, 買完野, 仲未入得閘, 抑或已經入晒閘, 準備起飛喇? 但冇理由, 仲有好多人坐係度! 老公走去問地勤, 原來班機Delay咗, 車! 冇廣播通知人既? (可能只係因為我地買野買到老豆姓乜都唔知啫!)

下午4:35, 終於可以上機喇! 今次輪到我同孖寶坐, 因為對面個走廊位隔離坐咗個好高大的麻甩佬, 老公, 俾你坐! 我唔想坐麻甩佬隔離呀! 最後, 班機係日本時間下午5點起飛, 足足遲咗40分鐘, 但唔駛Delay到半夜先至起飛, 已經係不幸中之大幸! 港航喎! 你懂的!

下午5:30左右派飛機餐, err...頭先2:30先至食咗碗麵咋喎! 孖寶直頭絶食, 我同老公都揀咗日式雞肉飯, 中伏! 個飯冇汁既?! D雞肉好鞋, 同埋冇餐包既? (去程有架喎!) 是但啦! 都唔肚餓! 反而孖寶個兒童餐螺絲粉, 好似仲好味!

航機係香港時間晚上7:20降落, YEAH! 要搭無人駕駛, 過Immigration(雖然要排隊, 但好快), 拎行李(個藍色喼好快出咗黎, 但老公個箱Gundam同個紫色大喼, 就等咗好耐好耐!) 晚上8:10, 搭機場快線去青衣站攞返架車(泊咗8日,  $80一日, 盛惠$640, 以前$70一日咋)。

晚上9:20返到屋企, call工人姐姐落黎停車場, 幫手拎行李, 返上樓, 我同孖寶沖涼, 老公落去樓下買麥當當俾孖寶做宵夜(住係商場樓上的好處)。

晚上10:30, 好攰呀! D行李留返聽日先執啦! 我瞓先喇!

都係屋企張床最舒服!

Day 8 完

今次旅程的戰利品, 由於太多, 要分2批影

南九州親子之旅2018 - Day 7

2018.08.10 (星期五)

今日仍然係陽光猛烈, 天氣酷熱!

今日去Harmony Land (Sanrio主題樂園, 有我最鍾意的Little Twin Stars), 玩埋今日, 我地今次的旅程就完結, 聽日基本上係冇行程, 只係揸4個鐘返宮崎機場, 然後搭飛機返香港。

早上8:30, 又落返去酒店地下間日式餐廳, 職員好似認得我地, 而我地亦自動波坐返尋日個窗口位, 又係食返果D野, 都係食到好飽。

早上10:15到咗Harmony Land, 近正門個停車場Full晒, 要泊下面個停車場, 然後行樓梯上去正門, 排隊買飛, 外國人出示Passport, 每位有500円Discount (折後2,400円, 一家四口玩全日唔駛10,000円, Good啦!)

入到場, 唔算好多人, 但唔係好搵到邊度有機動遊戲設施, 只係見到有人排過山車, 唔算太多人, 但唔知點解, 等咗好耐, 應該超過30分鐘, 原來架過山車都幾刺激, 哥哥玩完又話有少少暈, 慘慘豬!

個樣睇唔出好刺激的過山車

之後, 跟住地圖, 行咗上山, 山頂上面有好多適合小朋友的機動遊戲: 咖啡杯、旋轉木馬、兒童版摩天輪、兒童版過山車、真‧摩天輪、空中快艇, etc. 由於哥哥有D唔舒服, 爸爸陪佢入餐廳涼吓冷氣, 休息一吓, 細佬仔叫我同佢去玩咖啡杯, err...... 媽媽驚暈喎, 你唔好轉得咁犀利! 不過, 小朋友又點會咁順攤丫? 個咖啡杯一開動, 佢就狂轉, OMG, 媽媽不行了! 你轉到我都唔舒服, 就冇人再陪你玩架喇!

細佬, 唔好再轉喇!

玩完咖啡杯, 見到老公拖住哥哥係餐廳出黎, 哥哥又爆喊完, 原來佢見到細佬有得玩, 自己冇得玩, 覺得好唔公平, 好唔開心! 佢唔單止要玩, 仲要細佬冇得玩, 咁佢先至覺得公平, 先至開心! 細佬當然唔會睬佢啦! 有得玩, 點可以唔玩呀? 爸爸好努力咁安慰哥哥, 但佢仍然係好唔開心, 同佢去玩兒童版摩天輪, 佢喊住黎玩囉! 之後又玩咗旋轉木馬、空中快艇(排咗超過30分鐘, 其實唔多人排, 只係工作人員人手不足) 、真‧摩天輪(冇人排隊, 原來個車廂入面係冇冷氣der~)。

 喊住黎玩!

 強顏歡笑

 等咗超級耐

冇冷氣, 唔怪之得冇人排隊

下午1點左右, 行返樓梯落山, 去搵餐廳食野, 經過廣場, 見到有parade, 企係度睇咗一陣, 見佢就黎做完, 快D走喇! 一陣散場好多人湧去餐廳食野。

入到餐廳, 冇乜人, 搵咗個窗邊死角位, 拎本畫簿出黎俾孖寶填顏色, 我同老公出去排隊買野食, 我地算早黎, 排第5-6個, 之後見到越黎越多人入黎, 條龍排到好長, 雖然都算早排隊, 但都係等好耐, 日本人做野, 係好慢條斯理, 你急佢唔急既!  感覺排咗超過20分鐘, 買咗2碗牛肉飯(好好味), 一碗炸雞飯(中伏! 又係老公)。

下午2點食完飯, 行出餐廳, 見到門口有人玩緊個爆谷機, 好得意 (部機即時整爆谷, 第一次見! 唔好意思!) 我見咁好玩, 即時俾220円孖寶, 等佢地玩吓(以前細個跟阿爸去旅行, 佢孤寒到死, 乜都冇得試, 冇得玩, 得個睇字, 我唔想孖寶好似我當年咁囉!) 入咗錢, 要揀爆谷的味道, 由於唔識睇日文, 就揀返頭先對父女揀個味啦! 部機會輸送袋未整好的爆谷入去裏面, 然後, 就聽到部機入面噼嚦啪啦咁既聲, 應該係爆緊! 等咗2分鐘左右, 終於有袋脹卜卜的爆谷跌出黎, 原來好熱架, 孖寶拎唔到, 等媽媽拎啦! 今日的飯後甜品係爆谷!

一直都想搵坐船仔係邊度(係室內的, 但唔知道座Building), 老公話係山下面, 嘩! 烈日當空, 行樓梯落去, 都幾攞命! 但係點解冇人行既呢?! 一陣點上返黎呢? 是但啦! 都行咗一半喇! 行行吓, 老公見到, 原來有火車落山架! 我相信老公心入面已經講緊粗口, 因為頭先老公話不如搭咗火車先, 我話一陣臨走先搭啦! 原來架火車係載人上落山架! 老公冇埋怨我, 佢只係話, 點解樂園唔貼張告示話俾人聽有火車搭, 或者索性封咗條落山的樓梯啦! 我惟有安慰大家, 做吓運動, 幫助消化呀!

好在唔算行咗好耐, 大概10分鐘, 我地落到山腳, 原來呢度就只有一個遊戲, 就係坐船仔, 咁啱有架火車落客, 好多人呀! 我地要行快D呀! 等咗2班船, 到我地, 好熱, 就算有得遮蔭都係流晒大汗, 我拆咗包爆谷俾孖寶食, err...... 點解淡茂茂, 冇味既?! Anyway, 只要係爆谷, 孖寶就會搶住食, 上咗船繼續食, 好快就食晒。架船初段係露天, 行得好慢, 行咗一陣, 先至入到室內, 有冷氣, 叫做涼返D, 入面全部都係Sanrio公仔, 載歌載舞! 小朋友睇到應該好開心, 但我地去過廸廸尼小小世界N次, 就覺得冇乜特別!

有我最鍾意的Little Twin Stars

玩完船仔, 去火車站搭火車上山, 準備走人, 經過Souvenir舖頭, 我同老公講, 我要入去睇吓有冇Little Twin Stars, 都有, 但好少, 少過屋企樓下千色店間Sanrio, 本來想買對Twin Stars夾, 但太多人, 唔想排隊, 唔買喇! 原來哥哥太攰, 係外面個花槽瞓咗一陣, 老公去停車場攞車, 細佬不停咁問: 而家可以做咩呀? 點解冇野做? (怨聲載道, 又係阿媽唔啱, 帶咗你黎, 呢個世界!)

哥哥暈咗!

下午3點離開樂園, 上返車, 今日的行程完結, 今晚唔去Youme, 去吓路邊D餐廳食, 老公話平時經過果間Royal Host都幾出名, 可以一試。經過油站, 又要入油, 因為聽日要揸4個鐘頭車返去宮崎機場。

上車後, 輪到細佬暈咗!

下午4點, 經過二卜刂, 去咗N次日本, 都未去過人地日本IKEA, 我話想去參觀吓, 泊好車, 一家四口上去睇吓, 第一層係賣家用品, 老公最Like, 睇咗好耐, 見到個洗手液樽(講咗N年, 都冇買到), 決定買一個, 揀咗黃色, 好貴氣! 孖寶玩Cushion都玩得一餐, 笑到卡卡聲。第二層係賣家俬, 算喇! 唔行喇! 俾錢, 走人!

之後, 經過DAISO, 老公話想去行吓, 佢要買封箱膠紙同尼龍繩(綁返佢盒Gundam喎, 真係執條襪帶!) 既然黎到100円店, 我都唔執書, 緊係睇吓有冇Twin Stars用品啦! 老公搵到包Twin Stars濕紙巾同專用蓋俾我, 我搵到個飯袋(米老鼠, 是但啦!), 同埋買咗個粉色硅土杯墊, 哥哥見到個杯墊, 佢話: 點解好似放大咗既維他命C咁既? 又係喎! 三母子捧腹大笑!

下午5:45, 老公行去Autobacs, 我同孖寶係車度等佢, 老公買唔到野。

晚上6:30, 去Royal Host食飯。叫咗一個燒牛扒炒飯底, 一個蟹扁意粉, 2個都轉SET, 有餐湯同飲品(自己出去斟, 可以添飲)。今餐盛惠4,500幾円, 係旅程中最貴一餐, 因為係最後一餐晚餐, 緊係要食好D啦! 不過, 我覺得最好味都係Day 2餐Lunch。

食咗一半先至記得影相

個麵同D汁都唔錯, 但隻蟹好似只係用黎裝飾咁, 我完全食唔到!

食完飯都未天黑

晚上7:30, 返酒店之前, 係街口間便利店買咗包Aerial粟米脆片(我地全家的Favorite!) 返到酒店, 老公去3/F屠房做豬隻浸溫泉, 我陪孖寶去Playground玩, 今次冇人玩, 得佢2個玩, 佢地玩得好開心! 返上房, 同孖寶沖涼, 食零食, 執野(聽日要返香港, 所以要努力執喼! 同埋我發覺個大喼擺唔晒D野, 要將D污糟衫擺落去老公裝Gundam個箱度, 順便做cushion, 保護佢個Gundam盒!)

 Playground

Our Favorite!

Day 7 完

南九州親子之旅2018 - Day 6

2018.08.09 (星期四)

今日仍然係天晴酷熱! 今日去城島高原遊樂場的Kids Driving School, 係今次行程的重點節目!

早上8:30落去酒店地下間日式餐廳(希望佢唔好話要收孖寶錢, 如果要, 老公話唔俾錢, 去對面便利店買包俾佢2個食, 係啦! 其實唔係錢問題, 而係孖寶跟本唔食野, 佢地每人都帶咗包奶去飲, 你夾硬要我俾錢, 然後俾多2 set早餐我地, 跟本食唔晒, 最後都係倒咗佢, 嘥晒D食物!) 入到餐廳, 個阿姐嘰嘰呱呱咁講咗一輪日文, 唔知佢講乜, 總之, 我指住孖寶: We Share! 佢冇話唔得, 佢帶我地入去, 指我地去窗口位坐, 然後, 2個阿姐拎咗2 set早餐出黎, 好多野食! 其中一個阿姐英文好掂, 同我地講, 可以出去添飯, Shabu Shabu 的蔬菜可以出去拎。

2 set早餐, 4個人食, 都食唔晒!

食飽飯, 返上房執埋今日的行裝(今日要游水, 要帶泳衣同毛巾)。早上10點出發去城島高原遊樂場, 車程約20分鐘, 早上10:20到, 買入場券(成人每位1,500円, 小童每位600円, 為咗去玩揸車, 先要擺低4,200円過路費先。孖寶仲好記得Kids Driving School係邊(尤其哥哥, 佢認路好叻, 佢知道轉左落斜路就係), 由於上次已經攞咗駕駛執照, 今次唔需要再上堂, 可以即場買飛玩(600円揸15分鐘), 我預佢地每人玩2次, 買咗4張飛。第一次我坐哥哥架車, 爸爸坐細佬架車, 孖寶好開心, 好興奮, 哥哥揸得好瘋狂, 兩個倒後泊位都好叻, 可能睇得多爸爸揸車。第二次, 輪到我坐細佬仔架車, 細佬揸車好守規舉。玩咗2次, 佢地仲想玩, 於是我買多2張飛俾佢地, 嗱! 最後一次喇! 好熱呀! 好曬呀! 唔得喇! 細佬話: 上次黎就好凍, 好大風, 今次就好熱! 係啦!

 突然好Friend!

中午12點, 我地行去游水的場地, 原來就係冬天玩溜冰個場, 游水又係要另外收費(每人500円, 大小同價), 入咗場, 個場唔算大, 水深只有20厘米, 所以我同老公, 基本上係唔需要濕身, 可以唔換泳衣都得, 不過, 我驚曬黑, 換件長袖泳衣可以保護吓, 女士有更衣室換衫, 男士就只有門口4格更衣格, 孖寶係小朋友, 當眾換泳衣算吧啦!

出到去, 都幾多人, 遊戲設施唔算多, 有手攪式划艇仔, 充氣滑梯, 充氣滾輪, 水上搖搖板, 磨菇花曬, 小水桶, 同一個正常滑梯, 個充氣滑梯都幾高, 孖寶爬上去好吃力, 玩咗2次, 細佬話唔好玩, 佢見到個充氣滾輪, 話好想玩, 於是走去排隊, 孖寶玩得好開心。之後又去玩吓搖搖板, 騎海豚, 哥哥就去玩普通滑梯, 細佬就不停話: 點解咁少野玩? 仲有咩玩? (又開始發怨言!) 爸爸叫佢地再去玩充氣滑梯, 細佬唔想, 我又同佢去排隊玩滾輪。玩到下午1:40, 走喇! 好肚餓! 要食飯喇!

 又要另外收費, 咁其實One Day Pass包咩既呢?

下午2點, 去返上次去過果間餐廳食飯, 我叫咗碗冷麵, 老公叫咗碟焗飯(佢話叫錯野, 好熱, 食得好辛苦, 好在係佢自己叫, 如果我幫佢叫, 又怨死我!), 另外叫咗碗烏冬俾孖寶。

好鍾意見到哥哥肯食野

食飽飽, 老公話隔離好似有個室內遊戲室, 原來係要另外收費(每人600円, 孖寶太細個, 爸爸要陪玩, 都要俾600円), 個遊戲好似障礙遊戲咁, 有好多關要過, 第一關係瑜伽波陣, 第二關係飛索, 之後係攀石, 爬過滾輪, 上斜, 爬牆, 過木橋, 繩網, 爸爸全程陪孖寶玩, 我就負責影相。

 好細心聽講解, 呢個職員D英文相當唔錯

 瑜伽波陣

 攀石要爸爸扶住

 過木橋

Mission Completed!

玩完一大輪, 差不多3點, 我地過隔離間Shop睇野, 我買咗龍貓筷子、毛巾、Little Twin Stars襪。之後去買雪糕食, 下午3:30, 我地走lu... 去到停車場, 先至發覺唔記得拎細佬個水壼, 漏咗係遊戲室, 我拿拿林返入去拎返。

下一站係去血之池地獄, 孖寶因為放電過度, 上車冇幾耐就瞓咗。經過西松屋, 我話想去睇吓有冇兒童拖鞋(細佬對拖鞋, 頭先游水時, 擺咗係池邊暴曬, 結果, D膠溶晒, 兩條帶都甩咗, 著唔返), 不過, 原來西松屋係冇拖鞋賣, 只有涼鞋。

下午4:30到咗血之池地獄停車場, 叫極孖寶都唔醒, 由於5:00就Closed, 爸爸惟有夾硬叫醒佢地。入場費成人每位400円, 小童免費, 原來血之池地獄好細(細過上次去的海地獄), 同埋因為係遊客景點, 好多人! 係個池前面影咗幾張相, 叫做到此一遊, 走人!

今晚又係去Youme商場, 係童裝部買咗對人字沙灘拖俾細佬, 我話細佬你未著過人字拖, 得唔得架? 細佬話OK啦! 晚上6:30左右, 我地入咗間食壽司的餐廳, 原來間餐廳好似上次去Megabox食果間壽司店咁, 有新幹線運送D食物去我地張枱, 由於2點先至食完午餐, 所以唔太肚餓, 我地點咗碗細蕎麥麵、刺身、壽司、串燒、茶碗蒸, 今餐食咗2,800幾円, 老公話唔抵食。

之後去超市買蕉, 去藥房買馬油(哥哥圍住個咀D皮膚爆晒拆, 老公話試吓買馬油俾佢搽)。

行超級市場, 見到擺到好似擺書咁...... D咖喱!

晚上7:50去別府塔, 2011年冬天同老公黎九州, 住咗係個塔隔離間溫泉酒店"望海", 雖然個塔好矮, 但我估上個塔睇吓夜景應該唔錯, 泊咗架車係隔離的便利店, 行過去買飛, 成人每位200円, 上到去觀景台, err...... 開晒白色光管, 咁點睇夜景呀大佬? 個觀景台好細, 行咗一個圈, 冇野睇, 早知唔上黎啦! 中伏!

晚上8:30左右返到酒店, 去Reception拎聽日的早餐券(唔明點解唔俾晒3日的早餐券我, 要我每晚去拎, 驚我走數呀? 但我已經俾晒3晚錢喎!) 職員話我地有箱野, 佢拎俾我, 好大箱, 應該就係老公早幾日上Amazon訂的Gundam。我同老公講: 咁大盒, 冇可能塞入喼, 一係hand carry, 一係你惟有信佢入面真係Gundam, 唔好拆箱, 成盒原封不動寄艙。最後, 老公緊係忍唔住拆咗黎睇啦! 由於老公實在買咗太多Amazon, 我話: 咁啦! 我將所有野pack晒落個大喼度, 騰空個細喼, 俾晒你擺喇! (我係執喼專家, 好多時都可以執到2個喼去, 1個喼返der~)。

 爸爸盒Gundam, 唔好咁大力, 會壓爛個盒架!

是日戰利品

Day 6 完