大阪&名古屋聖誕之旅2022 - Day 9

 2022.12.30(星期五)

今朝7:30起身, 冇食早餐, 執埋D行李, 8:30 Check out, 去機場 (好在機場只係隔離, 行5分鐘就到)。

去CX櫃位Check in, 寄倉行李, 都唔駛排好耐!

然後, 戲肉嚟喇! 排隊過海關, 打晒蛇餅 (唔怪得寄倉行李時, 排我地前面有兩父女, 但四個喼, 原來阿媽同另外一個女就嚟排住隊先, 人地好醒呀!)

由於我地唔夠醒, 所以要死死地氣搵個龍尾排隊, 好在都仲有少少時間, 排咗20分鐘(比我預期快)。

過咗海關同Immigration, 即刻狗衝去惟一一間手信舖買手信, 掃咗4盒Royce薯片, 2盒Tokyo Milk Cheese Factory, 另外買2盒唔知咩俾工人姐姐同老公D同事, 買唔到嘢俾我老母, 唉! 好似欠咗佢咁!

去到閘口已經冇時間, 要上機, 拿拿林去汽水機買咗支綠茶, 好口乾呀! 又冇食早餐!

今次輪到我同孖寶坐, 老公同LV大媽坐, wakaka!

下午2點, 平安返到香港喇!

由於個飛機餐只係早餐, 我地係未食午餐既, 所以我提議返屋企樓下食Tea，老公話OK, 皇恩浩洫呀! 謝主隆恩!

今次旅行的戰利品, 少得好可憐!

我只係買到2件衫, 好遺憾!