然兄逸弟: 大阪&名古屋聖誕之旅2022

2022.12.24(星期六)

今朝校咗鬧鐘8:30am起身, 打開窗簾, 發現所有屋頂都積晒雪, 嘩! 原來尋晚落雪呀! 孖寶好興奮!

係雪呀!

是日早餐

今日已經係第三日, 都唔知做過乜嘢, 完全唔覺得係嚟旅行!

食完早餐, 早上10:15, 出發去名古屋水族館, 4年前的聖誕都嚟過一次, 仲發生咗「哥哥差點被棄養」的事件, 所以今次舊地重遊, 要修補返當年的「傷痕」!

早上11點到達水族館(明明只需20分鐘車程, 結果行咗足足45分鐘, 救命呀! 我係嚟日本玩架! 唔係嚟遊車河囉!)

買咗套票(包水族館+海洋博物館+展望台+南極觀測船), 一入到水族館, 又係俾眼前游嚟游去的海豚吸走咗個靈魂! 之後去睇殺人鯨訓練表演, 不過, 離看台好遠, 其實只係睇TV, 孖寶冇乜興趣(佢地又話冇興趣睇海豚表演), 之後又落返去睇海豚同其他展覽, 其實, 從一踏入水族館, 哥哥就不停嚷著要去條橋度! 條橋係邊? 本來想續個部份睇, 點知無啦啦入咗Souvenir Shop, 細佬就不停搵+揀禮物買, 最後, 終於揀咗本立體殺人鯨單行簿, 哥哥就冇興趣買嘢, 佢一心只係想去條橋度再同爸爸賽跑一次。

細佬第一次自己俾錢買嘢

經過見到扭蛋機, 細佬扭咗隻海龜

由北館行去南館, 媽媽見返上次間餐廳, 由於已經12:30, 媽媽個肚已經開始打鼓, 當然, 呢度有個人經常性唔覺肚餓, 然後就覺得其他人唔應該肚餓, 再然後就覺得唔應該係度食(佢認為應該要出去搵D地道又有特色嘢食), 媽媽當然唔會理佢啦! 即刻拎定張飛, 等位先。等咗冇幾耐, 就到我哋喇! 入去啦! 唔好出去搵嘢食喇! 附近都唔會有好嘢食, 要揸車去好遠架!

於是, 我地就係水族館入面間餐廳, 對住個金魚缸, 食咗餐安樂茶飯喇! 叫咗2個兒童餐俾孖寶(哥哥要咖喱飯, 細佬要肉醬意粉, 我叫咗個漢堡餐, 老公食蛋包飯), 雖然有D貴, 又唔係好食, 但可以一邊望住D魚游嚟游去, 一邊食飯, 咁既價錢, 香港海洋公園一定唔得囉!

食完飯, 係咁倚睇咗個水母館, 然後Skip晒所有展館, 就出咗去條橋度, 我同爸爸講, 今次同孖寶賽跑, 你就讓吓佢地, 特登跑最慢, 扮輸啦! 今次, 終於都冇發生不愉快事件, 亦改寫咗哥哥的童年回憶, 為當年的「事件」製造咗另一個結局 -- 係美滿的結局!!!

美滿的結局

之後, 又去參觀博物館+展望台, 雖然事隔4年, 但都係玩返嗰D嘢, 所以好快就走喇! 最後, 就去參觀南極觀測船, 參觀期間, 細佬突然話想去poo poo (上次係哥哥, 今次輪到細佬, wakakaka), 細佬嚟咗日本3日都冇poo poo, 佢話好擔心, 爸爸陪細佬去廁所, 但細佬都唔係好poo得出!