2022.12.25(星期日)
今朝8點左右起咗身!
已經Day 4, 但完全唔覺得去緊旅行, 尋日去水族館Skip晒所有嘢, 只係離遠睇咗殺人鯨, 同埋對住個魚缸食咗餐飯, That's all!
今日Plan咗去名古屋市科學館同磁浮鐵道館, 2個都未去過, 希望會有D新鮮感啦! 食完早餐, 換衫, 9:30出發, 科學館好近酒店, 只係15分鐘車程左右。早上9:50, 泊低咗架車係科學館隔離個停車場, 行去買飛, 由於天象節目係全日文, 我地聽唔明, 所以只係買咗入場券, 參觀展館。
搭扶手電梯上到2/F, 孖寶已經被D新奇又好玩的展品深深吸引住, 郁唔到, 至於爸媽, 情況就好似帶孖寶去尖沙咀個科學館咁樣 -- 呆企係度等! 但由於實在太悶, 所以爸媽都玩吓啦! 玩咗成個鐘都仲係第一層, 媽媽不停嚷著：要走喇! 不如上去睇吓其他嘢啦! (x N次)
搭Lift上去最頂層, 然後續層玩返落嚟, 孖寶玩到唔捨得走, 但爸媽就...... 媽媽見到有個零下30度極地體驗, 但要等到12:30先至開始派飛, 然後1點先至有得玩, 算啦! 唔等喇!
孖寶玩咗好耐好耐, 爸媽都發呆咗好耐好耐, 中午12:40, 爸爸去拎車先, 因為唔想過3小時(入庫3小時內最大500円)。媽媽留係館內繼續睇住孖寶。下午1點, 走喇! 好肚餓呀! 要去食飯喇! 下晝仲要去參觀鐵道館架! 孖寶最後都要睇埋龍卷風先至走!
去咗AEON TOWN一間日本嘢食, 要自己搵位, 自己係門口部機買飛, 然後交飛, 但餐廳有職員送餐埋嚟! 我叫咗個三文魚定食(嚟咗日本咁耐, 冇食過肉, 冇食過菜, 全部只有澱粉質!), 另外介紹咗細佬食滑蛋吉豬飯(佢話D蛋同D汁好正!), 哥哥食中華麵, 爸爸食鐵板餐。
食完飯, 下午2:25出發去鐵道館(其實就係Legoland隔離), 唔信GPS, 行錯路, 兜咗2個圈先至泊到入去金城碼頭停車場(我地聽日嚟Legoland都係泊呢度)。泊低架車, 行到去鐵道館已經係下午3:10, 人地5點收檔, 我地只係得返少於2個鐘行, 是但啦! 反正個館唔算好大, 又冇小火車玩!
孖寶唔算對火車有興趣, 但都願意跟爸媽一齊行, 續架火車上去參觀一下! 好乖! (幾年前去京都鐵道館, 行咗30分鐘已經怨聲載道!) 可能就嚟收檔, 個館冇乜人, 好好行。突然, 我發現可以玩揸JR模擬器(但今日受付終了!) 天呀!!! 冇人講過呢度有得揸JR既? 我見仲有人玩緊, 仲好似幾好玩咁! 如果早D知道, 一入嚟就衝過嚟買咗飛先, 可能仲有機會玩! 而家冇喇! 惟有過隔離打機(揸火車), 只係100円一次, 好抵玩! 仲有職員識講普通話, 教孖寶玩, 孖寶玩得好開心!
打完機, 睇埋個火車模擬城市, 出埋去室外參觀, 已經5點喇! 人地要收檔喇! 即刻衝入去Souvenir Shop, 我提議+鼓勵哥哥買把JR間尺(今次去旅行, 媽媽每日會俾1,000円孖寶, 俾佢地自己買嘢, 順便學習一下理財), 爸爸買咗2支筆送俾孖寶, 又買咗D紀念品俾自己, 媽媽冇收鑊! 原來外面落緊雨+好凍, 爸爸自己行去停車場攞車(盛惠1,500円, 只係泊咗2個幾鐘, 爸爸想講粗口!), 再揸返過嚟鐵道館門口接我地。
咁去AEON啦! 途中經過YAMADA, 爸爸話可能有玩具買, 呃咗孖寶落車, 結果只係賣電器, 冇嘢睇!
晚上6:30去到AEON, 媽媽自己去行, 爸爸帶住孖寶行, 約好7:30會合, 媽媽嚟咗4日都冇收鑊, 見有間INGNI, 於是入去求其買咗件米色針織衫(冇新, 是但啦! 冇特價, 盛惠4,200円)。爸爸話食得太多日式定食, 想食其他嘢, 孖寶想食拉麵, 搵咗好耐都搵唔到, 要問Reception, 結果入咗一間食拉麵, 個老闆態度唔多友善, 唉! 是但啦! 差不多夜晚8點, 唔想再搵喇!
我好肚餓, 叫咗碗拉麵自己一個食, 爸爸另外叫2碗拉麵同孖寶三個人分! 碗拉麵超級咸, 好難食! 中伏!尖沙咀間一幻都好食過佢! 早知食返日式定食啦! 妖!
去超市買牛乳, 朱古力包, 芝士, 然後去便利店買三文治, 仲俾我地搵到溏心蛋, YEAH! 早餐有蛋食喇!
晚上9:30左右返到酒店, 沖涼, 食生果, 今晚要早D瞓呀! 聽朝要好早起身, 去Legoland(開10am, 收5pm, 只有7個鐘時間玩咋!), 呢度去Legoland要1個鐘(包GPS老點+塞車), 所以9am要出發, 未夠8am要起身。
沒有留言:
張貼留言