大阪&名古屋聖誕之旅2022 - Day 2

 2022.12.23(星期五)

由於尋晚實在太夜瞓, 所以今朝瞓到9:15am先至起身!

望出窗外, 嘩! 外面好大風喎! 仲好似落緊雪! D雪係打橫片過嚟!

派老公落去便利店買早餐, 食完早餐, 執埋行李, Check Out, 10:40行落去租車, 老公今次租咗架車仔(冇租大車), 只係啱啱擺得落1大1細喼, 另外加錢(15,000円)換咗條雪軚(因為要上六甲山滑雪, 官網話路面有積雪), 盛惠63,xxx円, 唔平囉!

一家推住D行李落去地面攞車, D風大到好似會吹走個人咁! 雖然陽光普照, 但好大風! 好X凍呀!!!

早上11:30, 出發去奈良喇! GPS顯示1小時15分鐘到奈良, 但超級塞車(行IC都好塞), 最後用咗2.5個鐘先至去到。

去到奈良已經係下午2點(仲未食午餐), 泊咗架車係上次個停車場(首2小時無料), 行過對面馬路餵鹿仔, 又係好大風, 天陰陰, 仲落雪, 救命呀! 孖寶有得餵鹿仔, 好興奮, D鹿仔見到孖寶手上有鹿餅, 仲興奮! 結果, 係一片混亂中(落雪+大風+成地濕泥+被鹿追撞), 用咗30分鐘餵鹿仔, 走喇! 走喇! 唔得喇! 好凍呀! 會病架!

小鹿好可愛!

離開奈良公園, 揸車去奈良AEON MALL(高原), 3:30到達AEON MALL, 拿拿林搵間餐廳食午餐, 由於太晏食, 好快又食晚餐, 所以只係叫咗2個午餐, 一家四口Share, OK啦! 然後, 就去Uniqlo買禦寒衣物(冷手襪, 冷帽, 厚褲, 厚leggings), 另外, 老公係Montbell買咗頂冷帽。

下午4:45, 要離開喇! 因為今晚要去名古屋, 奈良去名古屋要2.5個鐘車程。結果, 又係超級塞車, 晚上7:30都只係行咗一半路程, 我提議搵個道之駅食咗晚餐先, 點咗2個拉麵餐同1個咖喱飯, 全部都係澱粉質, 少量肉, 冇菜, 再加上今晚都去唔到超市買生果, 孖寶已經2日冇poo poo了!

晚上9:30, 終於到咗名古屋喇! 足足用咗2倍時間先至去到(真係好痴線!) 辛苦老公要揸咁耐車!!! 酒店後面條街有便利店, 我帶住孖寶衝咗入去, 買奶、乳酪、三文治、飯團(哥哥的早餐)、蘋果。

我去Check in, 老公泊車, 晚上10點, 終於上到酒店房! 今晚有4張床, 一人一張床, 應該會瞓得好舒服!

然後, 孖寶沖涼, 切蘋果俾孖寶食, 孖寶刷牙, 瞓覺, 我又要執定D衫褲襪出嚟, 搞嚟搞去, 又係12點幾先至瞓! 救命呀! 我究竟嚟日本做咩? 我今日究竟做過D咩?

今日買的禦寒衣物