2022.12.28(星期三)
未夠8點已經起咗身喇!
孖寶今朝食杯麵做早餐, 繼續有三文治同烚蛋。
今日的行程係去六甲山滑雪場, 六甲山係神戶, 由酒店揸車去, 大概要1個鐘 (為咗可以揸車去滑雪場, 爸爸要俾多15,000円租咗條雪軚!)
孖寶好期待去滑雪 (因為有朋友個女今年暑假去咗紐西蘭滑雪, 孖寶睇到佢D相, 都好想去滑雪)。媽媽人生第一次滑雪, 係讀大學時同朋友去韓國, 孖寶10歲已經有得去滑雪, 真係好幸福!
早上9:30出發, 交通好暢順, 上雪山條路, 一D都冇積雪喎! 咁點解六甲山個網頁規定揸車一定要用雪軚或雪鍊呀??? 妖!!! 嘥咗我地大拿拿15,000円呀!!! (其實六甲山係人工滑雪場, D積雪係用機噴出嚟既! 千期唔好想像為萬天風雪的畫面!)
10:30到達滑雪場泊車, 係門口自助售票機買飛, 要買入場券(成人2,200円, 小童1,100円, 一家四口盛惠6,600円), 另外, 要租一家四口的滑雪裝備(成人4,700円, 小童3,600円, 每套裝備另加500円按金, 盛惠18,600円), 唔怪得D人成日炫耀自己去日本滑雪, 因為去日本滑雪成本高過去韓國好多!
入到去租裝備的小屋, 個心一沉...... 又細...... 又up dup...... 上次同老公去韓國滑雪場, 租裝備的地方好大, 好有系統! Errrrrrr...... 是但啦! 都嚟咗喇! 錢又俾咗! 然後, 租衫係自己埋去搵, 好似減價開倉咁, 我地幫孖寶揀好衫褲, 再自己搵, 感覺D衫好污糟(肯定冇洗), 又殘, 又肉酸, 唉! 是但啦! 爸爸帶孖寶去男更衣室, 我自己去更衣室換衫, 呢個時候, 就享受到生仔的好處喇! 因為我咩都唔駛搞, 爸爸, 辛苦你喇! 然後, 成個更衣室入面, 都係講緊廣東話既...... 我突然間覺得, 做香港人好可憐! 香港冇嘢好玩! 個個都要走嚟日本滑雪!
原來D Locker只可以開閂一次, 仲要400円, 我叫老公俾晒佢地D衫我, 我開一個Locker算喇! 然後去租鞋, 我地自己著嚟嗰4對波鞋, 又要開多一個Locker儲存(老公已經不停鬧：點解唔係入場費包埋?! 搶錢! 有冇搞錯! 痴線! x N次) 由於呢個行程係我Plan, 我覺得佢埋怨緊我!
原來租雪板同雪杖要行去另一間屋仔 (好煩!), 於是一家四口, 著住對千斤重的雪鞋, 龜速咁行對面間屋仔。租完雪板, 自己去旁邊拎雪杖, 斜坡下面就係練習場喇! 唔知點解, 好多人企係個斜坡上面, 又唔係滑雪(冇著裝備), 好似嚟參觀咁! 爸爸本來想滑落斜坡, 結果...... 當然係...... wakaka......
我同孖寶慢慢行落山, 然後, 爸媽就變身成為滑雪教練, 同埋「極地拯救隊」(哥哥嘗試多次都失敗, 跣低咗起唔返身, 佢開始發脾四, 媽媽自稱係「極地拯救隊」, 佢先至笑返!) 細佬係媽媽的專業指導之下, 已經成功由個練習斜坡滑落嚟 (但佢唔識停, 剷跌咗個女人, 仲要鬧人"婆娘"......唉! 真係冇家教!)
哥哥之後都成功喇! 反而專業教練 -- 媽媽, 都係成日跌低, 只係成功過2-3次, 係另一個小斜坡滑落嚟! 不過, 我覺得已經好過上次係韓國好多, 都有少少成功感! 爸爸挑戰練習斜坡失敗, 仲衝咗埋去學滑雪D人度, 俾個教練鬧佢, 然後, 佢不停鬧：咪已經講咗Sorry囉! 駛唔駛鬧人呀???
我覺得個滑雪場太細, 但又俾咁多人入場, 成個場都係人(仲有D人企係度唔滑, 阻住晒!) 滑雪的空間好少, 好易撞到人! 個場好差! 加上天氣唔夠凍(又話-1度, 我熱到要拉開件雪褸拉鍊, 我仲要不停幫孖寶托兩塊雪板上山坡, 等佢地可以滑落嚟, 我熱到標汗!), 地面嗰D跟本唔係雪, 係融咗的雪 = 冰, 就算企係度都好跣, 跟本唔係滑緊雪, 係滑緊冰, 所以好難控制對雪板 (人地真正滑雪嗰D, 係雪粉嚟既, 好軟綿綿!)
「滑」到下午2點, 孖寶都好攰, 開始坐埋一邊砌雪人! 我同爸爸都放棄喇! 今日又係冇人肚餓, 唔駛食午餐。咁不如去玩雪兜啦! 我估孖寶玩雪兜會開心D, 原來要行返出去門口個售票機買飛, 條! 爸爸幫我托雪板, 我就幫孖寶托雪板, 好辛苦行返上個斜坡, 再山長水遠行去門口買飛, 再山長水遠行上另一個斜坡租雪兜, 爸爸已經不停鬧鬧鬧!
一個雪兜可以坐一個大人加一個小朋友, 我同細佬坐, 爸爸同哥哥坐, 冇錯! 其實雪兜係最好玩, 連大人都覺得好刺激! 好好玩! 不過, 由於之前滑雪托雪板已經消耗咗好多體力(冇食飯, 只係飲咗2支寶礦力), 要拖住個雪兜再滑返落嚟, 真係好攰, 本來諗住可以玩10次, 結果, 玩咗5次已經...... 投降喇!!!
下午3:30, 收咗太陽, 開始凍, 再加上, 真係好攰, 都夠皮喇! 走喇! 返更衣室換返衫, 今朝的動作要倒返轉頭做一次, 老公又嚟......不停鬧鬧鬧!!! 好差!!! 痴線!!! (x N次) 搞掂好晒, 去門口退返D按金, 去停車場, 上車之後, 老公仍然不停碎碎唸! 我終於忍唔住, 同老公講: 好喇! 唔好再咁講啦! 孖寶覺得滑雪好開心架! 你唔好講埋呢D嘢破壞佢兩個的美好回憶啦! (老公終於都收聲)
本來Plan咗去神戶港行街+食飯+睇夜景, 但大家實在太攰, 都係早D返大阪算喇! 爸爸提議去道頓堀(咁咪即係行街囉! 但你又話好攰!)
下午5:50去到道頓堀泊車, 好多人呀! 大城市呀! 孖寶終於見到傳說中的Glico跑跑人喇! 細佬話想玩摩天輪(佢睇高木直子漫畫睇過) 不過, 爸爸覺得好貴...... 本來想係道頓堀搵間餐廳食嘢, 但細佬話D環境好差, 唔想係度食, 好想快D走! 都係既! 呢D地方, 其實唔係好適合小朋友嚟! 咁去返尋晚間AEON啦!
晚上7:30去AEON食飯。
媽媽今日唔記得幫孖寶搽防曬, 兩個塊面都曬到黑咗! 然後, 雖然媽媽有幫自己搽防曬, 但因為只係得SPF30, 加上冇補搽, 結果, D斑出晒嚟! OMG!!! 點解咁易曬到出晒班既? 明明今日都唔算好曬啫! 嚟咗日本一星期塊面已經狂爆粒粒, 再加埋D曬斑, 我正式宣布: 媽媽毁容了!
細佬仔著咗幾日保暖底衫, 加上今日滑雪好熱+標汗, 結果敏感+焗到個背脊起晒粒粒, 陰功豬!
今日大家都好攰喇! 今晚早D休息! 聽日Hea吓算啦!
沒有留言:
張貼留言