大阪&名古屋聖誕之旅2022 - Day 6

 2022.12.27(星期二)

今朝8:30起身, 9:00去餐廳食早餐(餐廳係另一個Building, 本來可以Call Shuttle接我地, 但等咗一陣都唔見有車, 行過去算啦! 反正都唔係好遠, 好過企係度捱凍!)

好得意呀!

餐廳好多人 (又話日本聖誕節冇假期?! 又話日本D男人係社畜, 唔敢同公司請假?! 點解呢度全部都係一家大細?!) 大鑊喇! 咁一陣間入到去樂園, 咪好多人囉! 會唔會俾人搶晒Suzuka Challenger D飛架? 冇得玩就大鑊喇! 呢個係今次嚟名古屋的重點節目!!!

樂園早上10點開門, 我地食早餐都唔可以食得太耐, 因為仲要山長水遠行返去酒店房, 執埋D行李, 搬上車, 好在唔駛Check Out (尋晚個職員話, 只要係房打電話同Reception講聲我哋Check Out就得喇!)

老公行去停車場攞車, 再揸返嚟我地座Building, 搬埋D行李上車, 再揸埋架車去鈴鹿賽車樂園門口個停車場。個停車場好多車呀! 大鑊! 泊好車, 行去正門, 拿拿林自拍咗一張全家福, 快D入場喇!

尋晚Check in 順便係Front Desk買埋

然後, 即刻飛奔去買Suzuka Challenger的飛 (我記得上次門口附近擺咗個Booth賣飛, 今次冇, 惟有仆去賽車場嗰邊售票處買飛, 售票員話而家賣緊11點嗰場, OK! 2架車, 盛惠3,200円 (即係HKD100一架車, 抵玩過中環AIA個踫踫車啦! 上次孖寶嚷著要玩, 結果, 2分鐘踫走咗我100蚊)。

買咗飛, 個心定咗, 仲未到11點, 不如玩住其他嘢先, 隔離有個電單車咁款的過山車, 好似幾過癮喎! 冇乜人排隊, 正! 我同細佬一架車, 爸爸同哥哥一架, 好刺激, 好正! 本來想玩多一次, 不過又好似唔夠時間, 都係早少少去排隊玩Suzuka Challenger。

由於孖寶已經10歲(9歲或以上可坐駕駛座), 佢地今次可以自己揸車喇! 恭喜晒!!! 孖寶超級興奮, 我今次同哥哥坐, 爸爸同細佬坐, 一向唔守規舉的哥哥(外號Rules Breaker)揸住架車, 好似舞龍咁, 佢笑到卡卡聲! 由於玩一次係唔會夠喉的, 所以我地又急急腳去售票處買飛, 今次即場有位, 即買即刻入場, YEAH! 今次輪到我同細佬坐, 爸爸同哥哥坐, 細佬好守規舉, 跟足晒指示做, 因為佢想攞高分!

細佬仔戴埋手襪, 成個賽車手咁!

之後去玩飃移, 孖寶上次唔夠高, 玩唔到, 今次終於咩都玩得喇! 之後見到有得玩電單車仔(成人都玩得), 於是一家四口去排隊, 雖然冇乜人, 但排咗好耐, 因為要Briefing, 又要戴頭套、頭盔、手套, 搞一大餐, 職員帶咗我地一家四口出室外, 原來有個練習場, 我叫孖寶練習一吓, 當我同爸爸討論緊哥哥玩呢D嘢比較快上手的時候, 哥哥突然發晒脾氣, 自己除咗個頭盔, 仲掟到我, 佢話架車有問題, 佢揸唔到, 我仲安慰佢, 只係練習, 一陣架車唔係呢架車嚟! 佢超級暴躁, 堅持唔玩, 自己除晒D裝備, 我惟有不停咁同個職員講Go men na sai! 我有諗過唔玩, 陪哥哥, 但咁樣做, 即係懲罰埋自己?! No way! 我都想玩啊! 原來好難玩的, 我平衝唔到, 架車又失控, 結果我包尾, 仲要自炒咗幾次!

哥哥本來好地地一齊玩

Foodpanda外送員

哥哥仍然係好唔開心 (我唔明! 我真係唔明! 我理解唔到佢諗咩! 我同哥哥溝通唔到呀!) 爸爸同佢傾咗一陣, 哥哥好似釋懷咗少少, 但叫佢玩其他嘢, 佢都冇晒興趣咁!

本來想去隔離玩Go Kart車(爸爸上次玩唔到), 結果, 今日受付終了! 吓? 而家只係下午2點咋喎! 仲要另外俾錢買飛, 車! 

由於大家都唔肚餓, 於是就決定空肚去玩過山車 (細佬上次玩唔到, 爆喊!) 原來都幾刺激! 媽媽玩一次夠喇! 孖寶想玩多次(仲要背住嚟坐倒頭車), 爸爸話佢陪孖寶玩! 嘩!

唔知點解大家都唔肚餓, 好似有得玩就唔駛食咁! 孖寶嚷著要玩飛天韆鞦, 媽媽見到都想嘔(上次係海洋公園玩完之後勁想嘔)。

玩唔到Go Kart車, 惟有玩另一隻Go Kart車, 跟住條路嚟行, 是但啦! 不過, 好多人排隊, 排咗半粒鐘。之後, 媽媽鼓勵哥哥去玩返一次揸電單車仔, 又係排咗好耐隊, 我叫哥哥今日唔好練習喇! 直接出場玩啦! 哥哥本來都有D擔心, 但佢一騎上架電單車仔上面, 就冇晒事lu! 至於媽媽, 仍然係失控+自炒+包尾! 最抵玩係媽媽呀! 因為媽媽玩的時間係最耐既! YEAH!

媽媽鼓勵哥哥再玩多一次, 我唔想佢有唔開心的回憶!

同埋今次應該係最後一次嚟, 我同孖寶講, 你地第二時大個仔自己嚟喇!

之後, 我地發現上次揸BB電單車隔離, 有越野電單車仔玩(又係成人都可以玩), 爸爸話呢隻好玩呀! 不停嚷著要玩! 又嚟? 又係電單車? 又失控? 又自炒? (媽媽內心入面不停嚷著)

又係等咗好耐, 又係要戴頭盔, OMG! 我的肌膚呀! 嚟咗日本6日, 塊面已經不停爆粒粒, 仲要戴埋呢D污糟頭盔, 我塊面玩完喇! 惟有同自己講, 豁出去啦!

個污糟頭盔污染咗我塊面D肌膚呀!

玩完越野電單車已經天黑喇! 細佬話要去Souvenir Shop睇吓, 結果, 佢買咗支電筒(佢勁開心!), 哥哥都係冇嘢買! 佢話佢麻麻地呢D物質嘢! wakakaka......

下午5:20, 要走喇! 今晚要揸車返大阪, 要成3粒鐘架! (好痴線呀......媽媽安排D行程)

晚上8:00, 終於到咗酒店附近的AEON, 細佬話要食D特色嘢, 咁嚟大阪緊係要食大阪燒啦! (爸爸唔係好Like, 因為會搞到成身油煙味) 叫咗個炒麵, 大阪燒, 餃子, 原來餐廳已經整熟咗, 只係俾你係塊鐵板上面煎返熱佢, 咁又幾好喎! 唔怕唔識炒, 炒衰咗! 媽媽實在太肚餓 (冇食午餐), 所以叫多一客餃子。

係Supermarket買聽朝早餐, 仲買咗盒淡雪(3,000円), 大概HKD180, 香港呢個價錢應該買唔到!

返酒店之前去油站入油。

晚上10點返到酒店Check in, 職員識講普通話, 太好喇! (原來佢係大陸過嚟日本)。上到房, 間房超級大呀! 孖寶嘩嘩聲! 雖然只係得2張雙人床(都夠位瞓既), 但好新淨, 感覺好舒服, 個浴室同梳洗間都好靚, 正呀! 爸媽之前上網研究咗好耐, 搵咗好耐, 先至搵到呢間平靚正架!

人生第一次品嚐淡雪, 嗰陣士多啤梨味香到呢...... 勁似士多啤梨百力滋味呀! 然後, 真係好甜! 好幸福啊! 佢同普通士多啤梨, 係兩個唔同層次嚟架!

哥哥的笑容同D淡雪一樣...... 好甜!

今晚又係搞到11:30先至瞓覺!