孖寶兄弟三歲零三個月喇!

今日係孖寶兄弟三歲零三個月喇!

哥哥 (體重28lbs, 身高90cm)
細佬 (體重30lbs, 身高91cm)

孖寶兄弟係體格同語言發展方面都冇咩突破, 可能已經發展成熟 (希望身高仲有得發展啦, 因為佢地仍然係全班最矮, 唉! 好在佢地仲未識得自卑!)

最近經常諗: 係唔係下年轉讀民生, 又從頭從K1讀起, 問過朋友 (佢2個小朋友都讀民生), 佢comment係: 老師好有愛心, 唔會太谷, 小朋友又讀得開心! 咁其實佢地而家讀緊間學校都係咁, 點解要轉呢?  孖寶係而家間學校好受校長, 老師, 甚至廁所姨姨的歡迎, 個個都好錫佢地, 冇教佢地的老師, 經過都會叫哥哥細佬, 廁所姨姨仲成日要攬住佢兩個, 佢地應該都幾開心, 而家呢間學校的功課唔多, 老師係家長日時都話, 我地學校唔係著重成績, 學生評估表都係就學生的體能, 肌肉, 語言, 社交, 美藝等各方面的發展作評估, 完全同學術表現無關, 所以學習係零壓力, 老師亦都話佢兩個都跟得上學習進度, 冇需要留班。

轉讀民生只有2個理由:
1) 有65%機會可以原校升讀民生小學, 唔駛到時周圍撲學校, 好徬徨! (但民生小學又唔算係咩名校, 出名係民生中學, 但小學冇直升中學的!) 就算升唔返民小, 個底打得好, 出到黎都應該唔輸蝕, 可考其他直資/私校
2) 有NET (即係外籍英語老師), 孖寶每日有3小時接觸英語, 唔駛另外俾錢去上英語會話班, 將來如要考其他直資/私校, 英語流利D都有優勢。

而繼續升讀原校K2都有好處:
1) 近屋企, 孖寶返學放學冇咁辛苦
2) 校長同老師都好有愛心, 好錫佢地
3) 讀咗一年, 已熟識晒校園環境同上課程序, 唔駛從新適應
4) 係學券幼稚園, 唔駛交學費, 慳返的錢(每年12萬)可以夠佢地出去報好多好多興趣班或者英語會話班
5) 既然孖寶都可以跟得上學習進度, 無謂為咗做大B(全班最大, 自我感覺良好)而浪費咗一年, 正如明明有牙可以食固體, 無理由仲俾佢食糊仔, 寧願留返個"quota"萬一將來小學跟唔上, 都可以留班

就係咁, 我同爸爸就經常內心爭扎, 放棄民生, 讀返"村校", 係香港呢個咁功利的社會, 一定俾人話我地on居, 個個都話要嬴係起跑線, 放棄民生即係係起跑線前就跪低, 萬一將來孖寶輸咗, 就係因為呢條起跑線的話, 我同爸爸就成為千古罪人!

不過, 正如我之前的文章所講,  嬴在起跑, 輸在終點, 人生係一場馬拉松, 從來冇跑手一起跑就衝, 起跑真係咁緊要? 抑或快樂的童年緊要D呀?

諗到呢度, 我同爸爸都大概有決定喇......