復活節假期 2016 (Day1)

話咁快就一年! 仲記得舊年復活節假期, 哥哥用咗4日時間成功戒咗"豬豬" (佢當時係咁樣稱呼佢個奶咀), 今年已經識得同我地講, 佢想去邊度玩, hoho!

Day 1 - 25.3.2016

話說12月的時候帶過佢地去濕地公園, 佢地對公園入面個兒童遊戲室個樹屋念念不忘 (但佢地跟本未夠高, 唔玩得), 哥哥成日話要去濕地公園, 於是爸爸就應承佢, 復活節假期去濕地公園啦! 由於路途遙遠, 我地差不多12點先至去到, 仲要等車位, 要等好好好......耐, 於是媽媽就一個人帶住孖寶兄弟去廁所, 買飛, 加入園排隊攞飛玩兒童遊戲室, 排咗20分鐘, 原來即場仲有2個位, 於是孖寶兄弟就即場玩, 見佢地玩得咁開心, 揸咁遠車, 排咁耐車位, 都OK啦! 開心的時光總係過得好快, 好快就玩完, 已經1:30, 媽媽開始肚餓 + 黑面, 爸爸好驚, 即時話去餐廳睇吓有冇位, 由於係假期, 超級多人, 加上我地2個要拖住2件細既, 身手又點夠人地D大家庭人多勢眾咁敏捷, 結果當然係搵唔到位, 加上排隊買餐都要排半個鐘, 好在媽媽帶咗D零食黎, 於是求其搵張長凳坐低開餐 (註: 媽媽已經由黑面變成燶面), 爸爸急急腳去買包維他奶返黎俾孖寶...

炸彈暫時解除後, 爸爸提意出去演講室睇濕地節目 (因為想帶佢地去睇戲, 所以試吓係咁黑的環境, 孖寶有冇扭計), 孖寶都算乖, 冇爆喊話要出返去, 但就成日問做完未, 細佬話冇昆蟲既 (因為媽媽話有得睇佢先至肯入去)。睇完節目, 爸爸提意出去外面個草地行吓, 哥哥見到有攤位遊戲 (坐住個沖涼盤瀡滑梯), 佢好想玩, 係都話要排隊玩, 細佬就好驚, 問佢玩唔玩, 佢就話驚驚, 爸爸媽媽惟有鼓勵佢, 叫佢企度睇吓其他小朋友點玩先, 佢睇睇吓又覺得OK, 排咗一陣就有得玩喇, 細佬話佢好緊張, 爸爸媽媽都見到, 因為佢雙手捉到個盤好實... hoho... 玩完起身行出個盤, 佢仲差D仆低... 但見到細佬能夠克服恐懼, 接受挑戰, 爸爸媽媽覺得佢好勇敢啊!

由於係仲未食Lunch, 媽媽仍然好肚餓, 於是3:00離開, 揸車去Yoho Mall搵野食, 車程約15分鐘, 去食Pizza Express (因為最少人排隊), 叫咗個2人set, 一家四口食, 哥哥練仙, 基本上可以唔食, 細佬都OK, 肯食吓沙律蛋, 包包, pizza, 但少人排隊真係有原因的, 三個字 --「唔好食」, 叫咗個蜜糖烤雞pizza, 上菜的時候, 我同老公都呆晒, 說好了的蜜糖烤雞呢? 我只係見到個pizza底同一pat茄汁+4片樹葉......

Yoho Mall 有恐龍主題彈床, 哥哥見到, 不停話: 好想玩! (N次), 但真係好多人排隊 (保守估計要排1粒鐘), 加上佢好似唔夠高, 驚佢俾人撞死, 爸爸勸佢唔好玩, 佢即場爆喊, 擾嚷咗30分鐘, 後尾撞到親戚, 分散咗佢主意力, 先至成功撒退!

孖寶兄弟一上到車即瞓!

Day 1 完結

備註:
孖寶兄弟自從上星期六(19/3)去運動會, 出街、搭長途車都冇著尿片(著底褲), 雖然係車度瞓著咗, 細佬仲成日話唔去廁所(叫佢去, 佢仲發脾氣), 但兩個都好叻仔, 冇賴濕過!