復活節假期 2016 (Day 4)

Day 4 - 28.3.2016 (Last Day)

一早諗咗今日去黃金海岸跳彈床, 因為Day 1去Yoho Mall冇玩到就走咗, 孖寶哥爆喊, 為咗補償佢, 今日一定要去玩跳彈床。

11:30入到黃金海岸, 唔算太多人, 但地方好細, D通道好窄, 用咗$100買咗12張token, 排隊玩第一個彈床遊戲, 就黎排到, 兩兄弟竟然話唔鍾意玩, 想玩隔離果個, OK! 我忍你, 反正唔係排咗好耐, 隔離都唔算多人! 於是又走去隔離再排過, 細佬話唔想玩, 因為好驚, 吓?! 諗住跳彈床先至千里迢迢揸車入黎黃金海岸喎, 媽媽惟有安慰細佬: 「其實幾好玩架, 你睇D小朋友玩得幾開心, 你驚, 我叫哥哥拖住你丫!」細佬聽到我咁講, 好似個心定D, 排咗10分鐘已經到佢地, 但同場好多小朋友, 但個彈床唔夠大, 開始時要小朋友爬過個4呎高的吹氣牆, 然後瀡落黎, 哥哥初時都有拖住細佬隻手, 但玩玩吓(對哥哥黎講實在太好玩), 哥哥自己走咗去玩, 細佬就係呢個時候, 俾個企都企唔穏的BB飛身撞低咗, 細佬即時爆喊, 媽媽拍緊video, 即時心痛死, 細佬本來已經唔係好想玩, 加上俾人飛撞, 大喊要出返黎, 爸爸媽媽即時抱住佢, 不停安慰佢同埋檢查吓佢有冇受傷, 至於大膽哥, 話之你繼續玩, 人地個鬧鍾响咗夠鐘, 佢仲走去爬瀡滑梯, 然後呢埋係個彈床盡頭唔出黎, 可憐的細佬, 喊住話: 「哥哥冇拖我! 嗚嗚!」(N次)... 今次真係慘慘豬!

哥哥繼續想玩另一個彈床 (細佬已經驚到唔肯落地行, 要爸爸攬實), 惟有由媽媽拖住哥哥去排隊, 排咗20分鐘, 就黎輪到哥哥, 佢竟然話好急(尿), 忍唔到, 媽媽拿拿林抱起佢飛奔去廁所, 好在前面個女士肯讓我地去先咋! 唉!

12:30pm, 嫲嫲黎咗黃金海岸join我地, 我地一齊食咗個垃圾lunch (細佬之後話肚痛), 食完lunch用埋4張token換咗2個氣球 (哥哥已經唔記得玩彈床, good!) 之後就join埋我細佬一家, 係天台度玩吹Bubble, 個天台係惟一冇乜人的地方, very good!

3pm, 開始多人, 我地走喇! 嫲嫲自己搭車返屋企, 細佬一家繼續作戰...

兩兄弟一上到車又瞓咗, 我同老公返到屋企, 放低佢兩個, 仲可以去買雞蛋仔食, 去PK shopping!

晚飯後老公叫我煮芝麻糊, 我話你買果包係芝麻粉, 我唔識整, 情形就好似你俾包米我, 叫我煮D芝麻糊出黎一樣! 我惟有煲滾水 + 片糖 + 芝麻粉, 再整埋個豆粉獻汁, 有9成似芝麻糊, hoho... 之後上網search點樣整芝麻糊, 原來唔係講笑, 真係要落米(飯)!

Day 4 完結

結論:
1.  我同老公都唔鍾意同人迫, 下次唔好再去咩同樂日
2.  孖寶兄弟太細粒, 唔夠人撞, 都係唔好去玩跳彈床
3.  $40玩一次跳彈床真係好搵笨, 情願$50一次揸電動車, 佢地仲開心
4.  香港周圍都好多人, 又冇小朋友friendly的設施 (唔似日本), 湊住小朋友去好多地方都唔方便
5.  最簡單反而係最開心