復活節假期 2016 (Day 3)

Day 3 - 27.3.2016

是日主日, 返教會! 大家終於第一次見識到孖寶哥的"喊功"的厲害, 詳細原因不用多說, 都係因為好小的事, 媽媽見到所有老師都呆晒, 惟有即場抱走哥哥, 但由於係教會, 媽媽要保持儀態同形象, 惟有又係講(明知冇用): 你喊啦! 喊出黎舒服D架! 媽媽知你好嬲! 好唔開心! 你喊啦! (N次) 擾嚷咗大概10分鐘(媽媽差D想搭lift落街俾佢喊, 費是嘈住人啦! 始終教會係要安靜既!) 好在哥哥都收到聲, 趁佢收咗聲, 媽媽就同佢講咗一番肺話(道理), 唔知佢明唔明, 聽唔聽得入耳, Anyway, 已經好刻制, 我講我!

返完教會, 返屋企食飯, 因為星期日, 又係復活節假期, 出面食野好多人, 爸爸話買外賣返黎食最爽, 咁樣先至可以用盡我地樓下就係大型商場的便利! 食完飯, 媽媽提議去海灘玩沙, 爸爸(有嚴重程度的潔癖)即時O咀, 阿媽, 你唔係講真呀嘛?! 係呀! 玩堆沙咋喎, 今日天氣咁好, 又唔係叫你落水, 媽媽當然知道爸爸個心諗咩啦 -- 搞到成身都係沙, 成車都係沙, 成個相機都係沙, 好大鑊! 媽媽話: 沙啫! (又唔係屎, 爸爸, 我鼓勵你要克服自己的心理障礙!)

於是媽媽二話不說即刻係床下底拎咗2個膠剷出黎, 執埋孖寶兄弟條抺腳布, 出發!

去到海灘, 比尋日旺角(單車公園)好少少, 起碼仲有車位, 同埋個沙灘上仲有空位可以搭個帳篷, 孖寶哥係屬於大海的, 佢一去到沙灘已經急不及待話要除鞋玩, 至於孖寶弟就係屬於屋企的 (簡稱宅男), 媽媽幫佢除咗鞋襪, 佢堅持要著鞋(但可以唔著襪), 幸好爸爸用咗5分鐘游說佢, 佢終於都肯唔著鞋踩落D沙度, 哥哥一開始已經想投奔怒海, 所以當媽媽話不如我地一齊去海邊裝D水, 佢超級興奮, 當佢隻腳仔第一次接觸到冰冷的海水後, 佢就一發不可收拾, 踩踩踩, 彈彈彈, 媽媽企係佢身邊, 濕晒, 爸爸! 我唔想照顧呢個狂人, 不如我同你交換, 我負責睇住細佬, 細佬一個人靜靜的係沙灘上面遠離岸邊玩'畢'沙, 重複又重複咁張D沙畢入個膠筒入面 (註: 係面無表情!) 另一邊, 狂人多次嘗試趁大浪時沖落水, 嚇到爸爸即刻'的'起佢走返上岸, 但係岸邊充滿著狂人天真無邪的笑聲, 媽媽的目的亦都達到了, hoho!

爸爸鼓勵細佬一齊落去踩水, 細佬比起舊年8月時大膽咗好多, 試咗幾次, 連細佬都開始唔驚, 夠膽去"沖浪", 睇到佢兩兄弟摺起晒褲腳衫袖, 係海灘上面走黎走去, 一邊玩一邊笑, 晒到塊面仔紅卜卜, 快樂其實可以好簡單, 簡單就快樂!

不過, 臨走時真係好狼狽, 孖寶兄弟成腳都係沙, 孖寶哥仲要玩到底面褲都濕晒, 媽媽一個人帶住佢2個去沖腳, 加上搗蛋哥, 跟本就係沖完等於冇沖, 惟有用濕毛巾盡量抺走細佬雙腳D沙, 至於搗蛋哥, 媽媽只好索性幫佢除咗條面褲, 由得佢著住條濕透的底褲走人, 老公都好辛苦, 要一個人收返埋個痴晒沙的帳篷同埋其他物品, 我諗佢應該一邊收, 一邊講緊粗口(鬧我), hoho!

兩兄弟放晒電, 一上車就瞓晒覺!

晚上姑媽上黎探孖寶兄弟, 一齊打邊爐!

Day 3 完結