觀課日

3月17日(星期四)

尋日, 學校安排咗家長觀課日, 俾家長可以瞭解多D自己個小朋友係學校究竟係點既, 我覺得呢個安排唔錯, 因為我都好想八掛一下佢地返到學校係點既, hoho...

由於孖寶兄弟唔同班, 我唔可以同一時間睇到佢兩個上堂, 於是爸爸都要請埋假, 一齊黎睇, 我地被安排睇「主題活動」同埋「音樂唱遊」兩個環節, 首先係我睇哥哥, 爸爸睇細佬, 之後就調轉!

今個月的主題係玩具王國, 主題活動係扮買玩具, 哥哥見到成班姨姨(包括我)走入課室, 我見到佢兩隻眼仔係度搵緊我, 佢見到我好開心, 然後我可以坐係佢隔離陪佢一齊上堂, 佢雙手撓住我臂彎, 頭仔挨落黎我手臂, 細聲叫: 媽媽! (嗲到我以為自己生咗個女) 然後老師叫小朋友舉手答問題同出黎扮買玩具, 哥哥如我所料, 遊緊雲, 個個小朋友都舉手, 大叫: 我我我! 佢就好似發緊夢咁, 我問佢: 你想唔想出去玩呀? 老師話要舉手喎! 佢都有舉, 不過, 所有小朋友已經放低晒手, 因為老師已經揀咗一個小朋友出咗去喇! 唉!

老師見我係度, 就叫咗哥哥拖住媽媽出去, 扮買玩具, 哥哥一手拎起自己之前拎咗返學校的玩具跑車, 好在佢都識得走去收銀機前面扮俾錢, 但老師問佢要講咩, 佢就好細聲咁講: 我要呢架...車... 橙色...車! 細聲到我係佢隔離都差D聽唔到!

一個鐘後就輪到睇細佬上音樂唱遊, 我同老公去學校附近食個late lunch先!

細佬見到媽媽, 都有望一望我, 但冇表現特別興奮, 反而好拘謹咁! 老師帶大家唱歌做動作, 細佬都有跟住做動作, 細細聲口up up咁, 之後老師拎咗個彩虹傘出黎, 大部份小朋友都好雀躍, 玩到好開心, 我偷偷地望吓細佬, 佢咀角微微撓起, 但好似唔敢笑咁, 我問佢做咩唔笑呀? 佢冇答我... 之後我問返佢做咩唔敢玩呀? 佢話驚老師鬧, 佢返學似乎好大壓力, 因為我地接佢放學時, 佢一踏出學校門口, 就不停唱歌, 未停過, 頭先唔見佢唱得咁大聲喎...!

我冇睇到細佬上主題活動同哥哥上音樂唱遊, 聽爸爸講, 細佬上主題活動都好專心上堂, 留心聽老師講野, 但就坐埋一邊唔出聲, 唔似得其他同學咁, 大聲係個位度講個答案出黎, 當老師叫佢出黎答問題, 佢都肯行出黎, 但把聲就突然變咗好沙聲囉!  至於哥哥上唱遊堂, 爸爸話哥哥玩得好開心, 好投入, 我都估到, 哥哥好鍾意玩, 好天真, 好開朗, 好樂觀, 爸爸話哥哥想問同學仔換塊藍色地墊俾佢, 哥哥會肯主動問人, 雖然最後個同學都唔肯換俾佢, 但佢冇發脾氣, 只係行開咗, 真係唔明點解佢返到屋企就變咗扭計王囉!

觀完課之後, 更加覺得民生唔適合我兩個仔, 細佬性格比較怕羞、被動、拘謹, 佢需要老師更多的鼓勵, 佢班主任李老師都留意到, 所以會刻意叫佢出黎答問題或者角色扮演, 至於哥哥, 佢坐唔定, 上堂又遊雲 (好多時仲釣魚添!), 但有得唱歌, 有活動玩就精神, 佢會好投入咁玩, 唔會顧忌D咩, 呢間學校話明唔著重成績的, 啱晒哥哥!

觀完課之後, 諗緊係唔係應該安排哥哥同細佬一班, 希望哥哥的開朗性格可以感染埋細佬!