孖寶兄弟三歲零兩個喇!

今日係孖寶兄弟三歲零兩個月, 又黎update一下佢地的發展情況!

哥哥 (體重 27.2 lbs, 身高 89cm):

哥哥最近呢個星期的情緒好咗, 少咗扭計, 佢平時會因為好小的事而發顛, 喪喊, 其實全個一月份都係咁, 只係今個星期好咗少少! 我同爸爸亦曾經無數次因為哥哥的情緒問題, 搞到自己都發埋顛!

哥哥對身邊的人(包括陌生人)仍然係充滿愛(毫無戒心), 例如佢會同停車場對面車位個叔叔玩give me five, 落留下平台會接受一個7歲的哥哥邀請, 一齊踢足球(但佢唔識踢)。由於佢實在太鍾意同人相處, 全校的校工姨姨都好鍾意佢, 成日都要攬住佢, 而佢亦都氹到D姨姨好開心。

哥哥的自理能力都不斷提升, 識得自己著襪, 著鞋, 媽媽同佢沖涼, 佢都想自己除衫, 唔駛媽媽幫手, 沖完涼搽body lotion, 哥哥都想自己搽, 叫媽媽 jit D 俾佢, 喊的時候會大叫tissue... tissue... 自己抺眼淚, 唔俾媽媽抺

哥哥仍然係冇乜危險意識, 去到公園鍾意爬高爬低, 企係滑梯上面行上去, 又亂衝亂撞, 佢仲好獨立, 自己鍾意去邊就去邊, 尤其玩滑板車時, 完全唔理爸爸媽媽

哥哥的邏輯思維都有進步, 媽媽每晚講故事的時候, 都會刻意問一D需要思考的問題, 哥哥的答案都幾有邏輯! 另外, 媽媽最近買咗幾本訓練專注力同觀察力的遊戲書, 需要小朋友係好混亂的圖畫中搵返指定的物件, 哥哥好快搵到, 連媽媽都覺得佢好勁!

哥哥仍然係好錫細佬, 佢有野食一定分俾細佬, 有野玩一定叫埋細佬, 出街會主動拖住細佬, 成日同細傾計, 會走埋細佬面前, 彎腰望住細佬。不過, 哥哥成日做埋D曳野, 搞到細佬跟住一齊曳, 但最後受傷的通常就係哥哥, 繼上次係沖繩酒店玩門, 哥哥夾親手指, 今次係廚房玩洗衣機門, 哥哥又俾洗衣機門撞到下唇流血, 唉!

哥哥呢排好痴媽媽, 唔係咁鍾意爸爸(可能因為爸爸試過嬲到浸佢個頭落水度), 就算媽媽鬧咗佢, 佢喊晒咁話媽媽曳曳, 但轉頭都係要媽媽抱, 沖涼, 陪瞓, 陪玩一定要媽媽, 半夜扎醒爆喊都係要媽媽抱, 爸爸想抱佢, 佢就話爸爸曳曳, 打死爸爸 (爸爸嬲到車巴佢)

細佬 (體重 28.8lbs, 身高 90cm):

細佬的邏輯思維同語言發展已經超越一個三歲的小朋友 (我個人認為), 講野係非常之有邏輯, 例如: 尋日細佬同哥哥一齊睇電視, 見到電視有個小朋友玩緊Thomas火車, 哥哥第一時間話: 「媽媽, 我想你買呢個俾我!」 至於細佬, 佢話: 「我覺得呢個幾好玩, 我地冇呢個! 」好明顯, 佢係更深層次的思想, 佢係講緊媽媽, 我想你買呢個俾我的原因!  上星期日去參觀火車博物館, 細佬一直都好擔心火車會郁(展品黎, 唔會郁架!), 而佢係條路軌度執石仔會好危險(佢自己心諗), 當爸爸大叫: 火車黎喇! 佢嚇到跑開, 差D仆咗落去路軌D石仔堆度 (嚇死媽媽, 好想車巴佢老豆), 但係佢竟然有呢個邏輯 (火車行路軌 --> 我係路軌度玩 --> 火車郁 --> 我好危險 --> 逃離路軌), 然後產生呢個危險意識, 勁!

細佬仍然係好小心謹慎行事, 落樓梯仍然係腳震震, 用右腳一級一級咁落 (哥哥已經識用左右腳), 細佬落公園玩, 都會好小心咁行埋個滑梯度, 如果已經有好多小朋友(尤其好大個果D), 佢會選擇離開唔玩, 玩玩吓滑板車想去睇其他野, 佢都會顧住自己架車而唔係掉低架車唔理! 不過, 只要佢痴住哥哥, 就會變得瘋狂, 危險意識大降!

細佬情緒管理好好, 每次喊唔會超過30秒, 叫佢收聲佢可以即時收到聲, 同佢講道理, 叫佢講對唔住, 佢完全冇問題! 老師反而話細佬係學校比較壓抑, 情緒太緊張, 老師同佢傾吓計, 佢都渾身唔自然咁, 唔得釋放!

細佬仍然係好鍾意打哥哥, 好順手, 問佢點解打哥哥, 佢總會有好多解釋, e.g. 哥哥阻住我嘛! 我想玩呢個嘛! 哥哥攞咗我果個嘛!  真係俾佢吹脹! 不過, 叫佢同哥哥講對唔住, 攬返哥哥, 佢都肯!  另一方面, 其實細佬又好依附哥哥, 尤其係學校, 老師話細佬成日走過去哥哥班房搵哥哥, 有哥哥係身邊, 細佬就會好釋放!

細佬好鍾意睇書, 佢會主動拎D書, 揭開黎睇, 又會指住封面D字黎讀, 細佬認字都好叻, 識得認「一」「天」「的」「我」「媽」字。細佬記憶力亦都好強, 一本故事書, 媽媽只係講過一次 (仲要只係為咗交閱讀報告好求其咁講咗一次), 但佢都記得個故事係講唔同顏色的飲料。尋晚食飯時候, 細佬話上次哥哥入醫院(舊年5月撞斷咗門牙), 佢同爸爸去買包包俾哥哥食, 9個月前的事都記得, 又話小朋友只有短暫記憶?!

細佬呢排like咗爸爸, 佢之前成日話唔鍾意爸爸, 但呢排又成日痴住爸爸, 半夜扎醒爆喊叫爸爸, 媽媽甩難了! hoho!

兩兄弟多咗好多互動:

1. 哥哥經常邀請細佬同佢一齊玩, e.g. 細佬, 你同我一齊玩, 好唔好呀? 細佬, 呢個俾你丫!

2. 佢地有時會同對方傾計 e.g. 問對方鍾意咩色

3. 哥哥有時會主動攬住細佬, 尋晚細佬上咗sofa冇除拖鞋, 佢幫細佬除拖鞋

4. 兩個一齊睇同一本書, 一人坐一邊

5. 細佬有又會讓哥哥, e.g. 哥哥爆喊話要沖涼先, 細佬話: 我唔沖喇! 俾哥哥沖先!