戒片(3)

話說自從去年9月入讀幼稚園之後, 孖寶兄弟就被老師要求戒片, 唔可以著學習褲/尿片返學, 改為著底褲, 經過半年努力, 孖寶兄弟日間基本上唔駛著片 (午睡除外)。

不過, 由於有時要搭長途車, e.g. 由將軍澳揸車入大埔, 或者目的地唔係咁容易搵到廁所, e.g. 郊外, 所以爸爸媽媽都要求佢地著學習褲, 其實孖寶兄弟已經多次要求著底褲出街, 唔想著學習褲, 所以有時落平台玩或者落商場食飯都會試吓俾佢著底褲, 但就提心吊膽, 好驚佢地急尿去唔切廁所。

3月19號, 幼稚園係大埔運動場舉行運動會, 孖寶兄弟要求唔著學習褲, 要著底褲, 可能佢地知道會見到老師, 驚俾老師發現佢地仲著尿片。爸爸好擔心 (驚佢地賴尿整濕架車, 好大鑊!), 媽媽就覺得 why not俾佢地試吓? 難得佢地主動話唔著片, 求之不得啦! 至於會賴濕的問題, 帶多2條底褲+面褲以防萬一囉! 爸爸, 你架車又唔係名車, 濕咪濕囉...

於是, 孖寶兄弟第一次冇著片坐咁長途車, 兩個都好叻, 冇事喎! 去到運動場, 叫佢地去廁所, 都肯去, 全個上午都冇賴到, Good!

臨走時, 哥哥話想去poo poo, 吓? 搵D咁野搞? 運動場個廁所有幾"乾淨", 大家都清楚, 仲要去poo poo, 即係要坐係個廁所板上面, 仲要冇兒童廁所板, 媽媽惟有拎晒成包家用紙巾, 幫佢舖咗個廁所板先, 然後扶住佢, 佢竟然真係有poo poo, 而媽媽亦成功幫佢清潔到pat pat, 但真係有D狼狽!

雖然孖寶兄弟回程(13:30)都係車入面瞓著咗, 但冇賴尿喎!

第二日, 輪到細佬係單車公園入面個公廁poo poo, 媽媽心諗又黎? 係呀! 細佬個肚唔舒服! 吓? 咁大鑊? 忍唔忍到呀? 媽媽仲要用紙巾舖住個廁所板先喎! 你頂住呀! 細佬! 好在細佬都好叻, 忍得到, 等媽媽搞掂咗先至去, 真係肚屙呀! 忍唔到就大鑊喇!

經過呢2日, 媽媽正式宣佈, 孖寶兄弟戒片(日間)成功喇!

似乎6月去沖繩都可以唔駛著學習褲上飛機喎! 仲諗住去日本抬幾箱尿片返黎, 而家要諗吓買其他野, 唔好嘥咗D行李寄艙費!