學校假期由12月24號開始, 12月23號係Last Day, 學校舉行咗12月份生日會同聖誕聯歡會, 孖寶係12月的主角, 媽媽為佢地準備咗生日袋, 送俾班入面的同學仔, 本來揀好件靚衫俾佢地當日著, 點知佢地又話要著警察同消防員制服, 算啦! 最緊要佢地開心!
由於媽媽公司好忙, 請唔到假(半日都冇可能), 於是老公就變成偉大的爸爸, 佢請咗3日假(12月28-30號), 展開一連10日同孖寶的搏鬥生活, 媽媽形容爸爸此舉簡直同ISIS果D死士冇分別, 實在要向爸爸致敬!
其實聖誕節有4日的公眾假期, 媽媽都可以同爸爸一齊並肩作戰!
12月24號 (Day 1) - 陰天
天陰陰, 加上都凍凍地, 媽媽決定今日都係留係室內活動, 早上10:20同孖寶去九展揸電動車, $45一節(10分鐘), 孖寶玩咗兩節(20分鐘), 盛惠$180, 仲要冇泊車優惠, 爸爸泊街邊, 提心吊膽, 好在冇俾人抄牌!
之後轉個場, 去咗觀塘海濱個橋底玩平衡車, 又凍又大風, 仲好似落雨添, 媽媽仲唔小心整親細佬個咀唇仔, 流血, 細佬嬲爆媽媽! 好快就走咗! 由於第一日放假, 仲有3日要捱, 所以唔可以去咁盡, 下晝就留係屋企, 媽媽落咗樓下商場行街, 爸爸砌Billy書櫃(佢最近愛上砌Lego, 介話已經有target, 起碼要買10盒, 每盒約HKD1000, 仲特登買個Billy櫃, 話要擺滿佢, 我睇怕佢唔夠位擺) 晚上煮西餐, 食聖誕蛋糕, 好平淡就過咗Day 1喇!
12月25號 (Day 2) - 少少晴天
今早返教會的聖誕福音崇拜, 叫埋姑媽, D詩歌揀得好好, 幾乎首首都好好聽, 喊點一向低的媽媽最後又忍唔住, 好似缺堤咁! 完咗之後, 一齊去姑媽屋企食嘢, 傾計, 玩貓, 食聖誕蛋糕, 搞到3pm走, 返到屋企拿拿林叫孖寶午睡, 因為夜晚7點要去公公屋企做冬, 食完飯, 孖寶又係公公屋企同表哥玩到唔捨走(一方面又話唔鍾意同表哥玩)! Day 2完結!
12月26號 (Day 3) - 晴天, 中午氣溫24C
天文台預測今日天晴, 所以媽媽特別留到今日先至進行室外活動, 就係去數碼港的冬日嘉年華, 爸爸一早上網買咗套票, 原價$200, 團購$160, 買咗2套, 盛惠$320 (爸爸為咗孖寶, 原來可以好豪架!) 早上11:30左右去到數碼港, 首先視察吓現場環境, 由於時間尚早, 唔算太多人, 好多遊戲只係排5-10分鐘就有得玩, so good! 套票包4個$50遊戲, 孖寶玩咗1次Excavator(畢膠波), 1次跳彈床同埋2次揸船仔, 兩個玩到流晒汗, 面仔紅卜卜, 媽媽同爸爸就晒到痴肺!
之後見到有間舖頭仔可以揸Tayo電動車($40可玩10分鐘), 平過九展喎!
玩到1:20走人, 之後諗住去赤柱食飯, 但假日超多人, 又封路, 又等唔到錶位, 都係走人! 老公提意出返鰂魚涌公司附近間餐廳食午餐, 下晝2:30終於去到, 好肚餓! 食飽飽就返屋企lu... 晚上有工人煮飯食, Day 3完結!
12月26號 (Day 4) - 晴天
一朝早帶孖寶去單車公園玩平衡車, 之後揸車出九龍灣Megabox食lunch, 再去行IKEA, 買咗塊直身鏡$369, 老公話送俾我, 等我買D靚衫返黎, 可以照鏡。之後, 見孖寶唔想午睡, 於是去九龍灣探剛生咗BB的朋友, 由於塊直身鏡太長(160cm), 要拆Car Seat先至入到車箱, 媽媽抱住細佬坐前面, 哥哥堅持要第一個坐, 結果由上車喊到落車, 再喊到上朋友屋企, 探朋友BB期間, 兩兄弟又玩玩吓鬧交, 結果喊住咁走, 真係唔好意思! 打搞晒! 那那林揸車返屋企, 今次到媽媽抱住哥哥坐前面... 回家, 食飯, 瞓覺! Day 4完結!
媽媽一連四日的假期都完結lu... 之後3日, 就交俾爸爸同孖寶搏鬥喇! 辛苦晒爸爸!
沒有留言:
張貼留言