媽媽由開頭（孖寶初生時）覺得時間過得好慢，到而家（孖寶4歲）覺得時間過得好快，媽媽開始唔捨得佢地大得咁快（爸爸唔認同，佢認為孖寶越大越好，可以同佢地傾計，溝通到，不過爸爸冇諗過，孖寶再大d就識得駁咀，到時激死你，同埋佢地再大d就唔再稀罕同你去街，到時你會好冇癮）
由於今年12月3號係星期六，所以可以係正日幫孖寶搞生日會，生日會前一星期，爸爸媽媽已經帶咗孖寶落反斗城揀禮物，佢地最近愛上玩細細粒的LEGO(5-12), 舊年買咗一大盒LEGO DUPLO 幼兒系列已經冇人吼lu...
孖寶近況Update:
哥哥
身高95cm, 體重29.6 lbs
體格／體質
哥哥仍然係好瘦（因為佢唔鍾意食野(零食除外），早餐叫佢食咗隻蛋同飲埋杯奶，好似迫佢服毒咁），由於佢細細佬成個碼, 出街好多人以為佢係細佬。哥哥最近晚上鼻塞的情況有好轉（冇再半夜鼻塞抖唔到氣，醒咗爆喊）, 爸爸已經冇幫佢睡前噴鼻眼適, 但仍然要每晚洗鼻（只係上星期有少少傷風, 有一晚唔記得洗鼻, 佢鼻塞瞓唔到, 喊!（可能鼻塞情況有改善, 所以鼻鼾聲都少咗。哥哥仍然係好需要瞓覺, 如果太早起身（7:30前）的話, 佢到中午就會眼瞓到食唔到飯；如果冇午睡，佢食晚飯時就會釣魚！
思維／語言能力
哥哥仍然有時會九唔搭八，問佢A，佢會答你X（唔係問A答B, 而係完全講咗另一D out-of-context的野), 真係唔知好嬲定好笑! 可能佢個腦諗咁其他野，總之哥哥的思維模式係好難捉摸！有次見到佢塊面抓損咗，好心關心吓佢，問佢點樣整親架？痛唔痛呀？佢好大聲咁惡我：喂！我唔鍾意你！我嬲你！唉！真係好心著雷劈！
情緒
哥哥最近的情緒控制能力比之前高咗，以前係會因為雞毛蒜皮的事，甚至無緣無故，突然發顛、爆喊、瞓係地上、雙腳亂踢、大叫抱我（N次），而家有時好少少，識得表達：我而家好嬲呀！我好唔開心！不過，佢仍然有更多時候都係爆喊，最近仲識得大嗌！但我同爸爸已經冇再用打鬧的方法，而係跟兒童心理學家咁講，熄咗佢個Amygdala（杏仁核）先（即係connect to 佢個情緒，亦即係校長教果招，不停咁形容佢而家個心情），因為佢個Amygdala著咗燈，佢就失去理性同講道理的能力，要等佢個Amygdala熄咗燈，再同佢講道理先至有用。經過我同爸爸的努力，好似有D起色，佢似乎明明地，同埋最重要係－－佢快咗收聲唔喊！
學習能力／專注力
哥哥的學習能力其實唔差，不過可能佢個人唔專心，所以學習新知識上比較差。至於佢一向專注力弱的問題，而家似乎有方法加強佢的專注力－－就係砌LEGO, 佢勁鍾意睇住個說明書，續個steps跟住黎砌，未見過佢咁專心做一樣野（之前試過穿珠仔同砌puzzle都係中途放棄）每次叫佢攞D功課出黎做，佢好似聽唔到你講野咁，就算拎晒D功課擺係枱面，佢都會話：我好攰，我想抖吓先！（唉！激死！）
與家人關係
哥哥好鍾意媽媽，爆喊一定要媽媽抱佢，可能媽媽比較溫柔，好少鬧爆佢！哥哥都好鍾意爸爸（唔鬧佢果時），因為爸爸有貼紙，又同佢地玩騎膊馬，又帶佢地去單車公園，又買好多玩具俾佢地，爸爸仲有機打添！哥哥其實都好鍾意細佬，老師問佢好朋友係邊個，佢大聲話：係消防員囉！（大約幾個月前，哥哥唔再叫細佬做細佬，而係叫消防員，細佬就會叫哥哥做警察！）孖寶生日會當日，表哥搶咗細佬個氣球，哥哥即時幫拖，佢兩個一人一邊扯住表哥件衫，要表哥俾返個氣球細佬。雖然打人係唔啱，但媽媽見到佢兩個咁手足情深，好感動啊！哥哥，你要繼續保護細佬呀!
性格／喜好
哥哥天生性格外向, 好鍾意玩, 喜歡跑跑跳跳的動態戶外活動, 爸爸媽媽提意出街, 佢通常都好雀躍! 哥哥心地好善良, 對人友善充滿愛, 好鍾意同人相處, 好喜歡同人有身體接觸, 所以好鍾意爸爸媽媽抱佢, 又好鍾意攬住你, 然後同你講: 我好鍾意你呀! 佢都好鍾意拖住細佬或者攬攬細佬 (但細佬推開佢)。哥哥鍾意冒險同尋求刺激, 所以佢做咗D犯則嘢的時候, 會瘋狂咁笑, 又會挑戰你的底線, 叫佢唔好做, 佢就偏去做! 哥哥係一個大情大性的人, 所以好易笑, 亦好易發顛/爆喊!
細佬
身高96cm, 體重32 lbs
體格／體質
細佬比起哥哥算叫做有D肉地，但都係比同年紀的小朋友細粒！自從今年5月爸爸買咗2架平衡車俾佢地之後，佢地就愛上咗玩平衡車，我覺得細佬體能、平衡力、反應都有進步，不過，落樓梯仍然係有D腳震震同埋一定要扶住個扶手囉！細佬比較捱得眼瞓，冇午睡都可以捱到10點先至瞓。另外，細佬比較鍾意食野，同埋肯自己食，通常都食得晒D飯, 有時食完都話未夠飽，要食零食併盤！
情緒
雖然細佬的情緒一向都比哥哥穏定，但其實佢都會有鬧情緒的時候－－每逢星期一朝早起身返學，佢都會鬧情緒，好唔開心，唔鍾意任何人掂佢，因為佢唔想爸爸媽媽返工。另外，佢有時都會無啦啦鬧情緒，唔知咩事，但佢鬧情緒都唔會好似哥哥咁瞓係地下、大嗌，佢只係個人好忟憎，郁身郁勢，雙腳係咁磨張sofa, 你想抱佢但佢會縮黎縮去避開你，同佢講乜安慰說話都冇用，但其實佢又仲有少許理性，有時會叫：媽媽，你過黎！你做乜唔過黎？你做乜唔理我？我叫咗你好耐你都唔理我！（之類的說話）。我同爸爸講，原來咁樣先至係最難搞，佢個Amygdala又唔係完全著晒燈，著咗少少，原來係最難熄咗佢！因為當你同佢講：我知你好唔開心，好嬲，好忟憎，佢會話：你講呢D唔啱！我唔係呀！（然後繼續發顛！）
學習能力／專注力
細佬的學習能力同專注力好強，連老師都話係學習上從來冇擔心過細佬！細佬記性超好，所以對佢學習上係好大的優勢！細佬做事好認真（包括畫畫，油顏色，做功課，甚至打機），佢又好有責任心，會主動拎D功課出黎做，好鍾意做假期作業，成日想做晒佢，要爸爸媽媽勸阻佢！細佬好鍾意寫字，媽媽最近整咗本格仔簿俾佢寫字。
與家人關係
細佬有時會唔鍾意爸爸（因為爸爸會同佢玩到顛晒，爸爸太顛同太肉緊，嚇怕咗細佬）不過，其實佢應該都係鍾意爸爸媽媽，因為佢真係好唔捨得爸爸媽媽返工，佢好想我地可以日日都陪住佢！佢成日都話唔鍾意哥哥，不過，佢又好鍾意同哥哥玩，出街哥哥顧住自己玩唔理佢，佢會嬲嬲豬！）有一朝早哥哥為咗刷完牙有貼紙奬，係咁話自己係第一個刷牙先（其實佢刷第二），細佬為咗安慰佢，同佢講，冇所謂啦！其實第二都好叻！
性格／喜好
細佬性格天生內向, 喜歡靜態的活動(做手工, 練寫字, 穿珠仔, 砌Lego), 唔鍾意出街, 情願留係屋企。細佬唔太鍾意同人接觸(爸爸媽媽除外), 對其他小朋友(同埋Nick Nick)都有少少敵意。細佬唔會冒險, 冇把握的事唔會做, 所以亦都好守規舉, 叫佢唔可以做的嘢, 佢就真係唔做, 甚至會鬧其他唔守規舉的小朋友, 細佬份人好均真, 係佢就係佢, 人地D嘢佢唔會貪, 亦因為咁, 當人地拎咗屬於佢D嘢的時候, 細佬會好嬲! 細佬同哥哥剛好相反, 佢係一個好抑壓自己情緒的人, 打機輸咗明明好唔開心, 但因為爸爸講咗一句: 唔緊要, 我地最緊要學識輸! 細佬於是違背良心咁講: 我鍾意輸! 其實媽媽見到佢扁晒咀囉! 唉......
沒有留言:
張貼留言