聖誕燈飾2016

我同老公其實一直都冇睇聖誕燈飾的習慣, 自從拍拖有一年係平安夜傻更更咁出過尖沙咀, 結果實施人流管制, 係廣東道想調頭走都走唔到, 被迫好似喪屍咁跟住D人流, 行咗好耐好耐, 然後搭巴士, 塞咗好耐好耐, 最後唔知幾點先至返到屋企, 從此就決定一世都唔會再出尖沙咀睇燈飾!

但自從孖寶出世之後, 心態無啦啦變咗, 好想帶佢地一齊出去睇燈飾, 因為我同老公都有相似的童年回憶, 就係當年阿爸帶我地出尖沙咀睇燈飾, 好興奮, 好難忘!

除咗2012年孖寶出世果年, 因為要坐月, 所以足不出戶, 由2013年起, 我地每年都出去睇燈飾, 但其實, 都冇咩好睇, 只係想影張相放係facebook, 話俾人知, 我都黎過咁囉!

2013年, 孖寶剛1歲, 推住架30 lbs的孖B車, 去尖沙咀海運大廈, 仲要係星期日下午, 簡直係向難度挑戰!

2014年, 孖寶2歲, 仍然要推住架30 lbs的孖B車, 去尖沙咀海運大廈, 不過, 細佬已經冇上年咁扭計, 叫做有D改善, 但仍然係幾辛苦!

2015年, 孖寶3歲, 由於前2年帶住孖寶都好辛苦, 老公同我決定撇低孖寶, 兩公婆夜晚11點靜雞雞出去睇燈飾, 拍吓拖仔!

2016年, 孖寶4歲, 已經超過半年唔需要帶士的車出街, 孖寶亦唔似以前咁成日扭抱(瞓著咗除外), 所以又諗吓帶佢地出去睇燈飾, 仲要破天荒, 星期日夜晚出去睇。出到去簡直係超級多人, 細佬見到咁多人已經呆晒, 冇晒表情, 哥哥還好, 佢鍾意搞搞震, 搞人地D聖誕裝飾......

坐船過中環, 孖寶見到個摩天輪都嚷著要玩, 但由於已經7:15 (要趕住8點返到屋企食飯)同埋真係好很貴(成人$100, 3歲以上小童好似要$90, 一家四口盛惠$400, 仲要同強國大媽迫埋同一個車箱), 於是係爸爸的游說之下, 孖寶願意放棄玩摩天輪, 搭船返尖沙咀, 再去海運攞車, 唔知點解, 搞到9點先至返到屋企食飯, 臨瞓前孖寶勁扭計, 好似報復我同爸爸帶咗佢地出去睇燈飾咁! 唉... 記住下年唔好再帶孖寶!