一家去打流感針

2016.12.4（星期日）

參加咗屋苑的流感疫苗接種計劃（孖寶免費，爸爸媽媽每人各$155），今日下午2:30落去打針，根據過往經驗，孖寶打針一定會喊，細佬仲要鬧醫生曳曳，打死醫生，所以爸爸預先同佢地講，打針唔喊有3張貼紙。

落到會所，原來要攞籌，等叫號碼，於是同孖寶去兒童遊戲室玩咗20分鐘，好快就到我地一家喇！姑娘話俾孖寶打針先，恐防佢地睇到爸爸媽媽打針，會驚咗。姑娘叫哥哥打先，由爸爸抱住（爸爸夠大力，萬一佢掙扎都捉得實佢），其他的工作人員都好醒目，拎咗一籃朱古力去佢面前，叫佢揀，引開佢注意，姑娘亦手起針落，佢都feel到自己手臂俾針吉緊，正當大家以為佢會爆喊，佢竟然冇，只係...嘩！真係好鬼痛！嘩！

大家都覺得哥哥好叻，4歲咋，打針唔喊！

然後輪到細佬，都係由爸爸抱住，又係叫佢㨂朱古力，分散佢注意力，由於哥哥冇喊，細佬應該係死忍唔喊，只係大叫：好痛呀！曳曳！（工作人員仲遞個咪俾佢對住黎嗌），又問佢叫咩名，幾多歲，我諗係大廳等緊的人都應該覺得好好笑！

之後就輪到爸爸媽媽，我覺得姑娘手勢好好喎，吉落去唔覺痛，只係擠藥果下feel到痛痛地。

離開會所期間，哥哥終於忍唔住爆喊：好痛啊！嗚嗚！爸爸惟有抱抱佢，安慰一番，其實媽媽覺得孖寶真係好叻！4歲人仔，打針咁痛都忍得住冇喊，爸爸媽媽以你地為傲！叻仔！