話說每個女孩子的童年願望都總希望擁有一間公仔屋, 媽媽細個屋企窮, 莫講話公仔屋, 連玩具都唔多件, 就算入咗大學, 可以自己出黎幫人補習賺錢, 但因為家規深嚴, 俾屋企人知道咁貴買個玩具返黎, 一定俾人鬧死, 加上屋企細, 18歲成人之後仲要同個細佬同一間房(連換衫都要係張床拉埋個布簾, 同籠屋居民冇分別), 所以冇可能買咗間公仔屋返黎而又有位收埋同唔俾人發現!
記得第一間公仔屋, 係男朋友仔(即而家的老公)送俾我, 唔知點解佢知我鍾意, 可能次次行街見到, 我都雙眼閃閃發光, 睇好耐都唔捨得走掛! 唔記得邊年生日, 佢送咗個森林家族花店俾我, 真係好開心!
結婚之後幾年, 我愛上咗整小小廚(迷你黏土食品), 因為其實佢同森林家族一樣, 俾到我玩公仔屋果種開心感覺, 加上自己整(又整得靚), 所以特別有滿足感!
可惜有咗孖寶之後, 已經冇晒時間、興趣同心機整小小廚。舊年11月同老公去行反斗城, 又見到我的森林家族呀! 仲要做緊特價, 兩層森林大宅City House with Lights Gift Set做緊$899呀! 原價過千架! 諗咗好耐買唔買, 但老公知我工作同湊仔好辛苦, 加上佢成日都鼓勵我要有返自己的興趣, 於是就係老公的鼓勵之下, 買咗喇!
個盒好大!
不過, 玩公仔屋真係好敗家, 因為間屋買返黎得幾件傢俬, 成何體統呀? 行過千色店, 見到有廚櫃, 雪櫃, 洗衣機, 浴室套裝, 又忍唔住買晒返黎喇!
廚房設備齊全, 只欠砂煲罌罉!
香港買的浴室套裝, 造工精細!
後來老公又幫我淘咗張書枱, 餐枱, 餐車, 天花燈, 但講真, 淘寶貨色真係同行貨好大分別, 張書枱個櫃桶唔fit的... 又唔係平好多, 以後都唔去淘寶買!
書枱下格櫃桶唔Fit!
設備齊全的City House 大宅成形喇!
今年6月去沖繩, 例必同佢地去行當地的反斗城, 俾我發現原來HK賣緊HKD225的傢俱套裝, 只係賣1980円咋(約HKD140), 即刻買咗套花園套裝, 另外買咗個煮食用具套裝! YEAH!
煮食用具套裝加花園套裝的效果!
今年10月去大阪, 係京都AEON MALL竟然俾我遇到森林家族專門店呀! 即時二話不說衝入去, Starter House做緊特價1999円呀! 即係HKD140咋, 香港賣緊$299(就算特價都要$239), 唔買實在對唔住自己, 於是就買咗, 仲買埋兩個BB公仔同埋一套BB房傢俱套裝! YEAH!
Starter House 備有少量傢俱,
另加兩個BB同BB房套裝的效果!
上星期, 老公上網買細佬仔份生日禮物, 順便問我有冇野買, 我隨口UP咗, 話想買森林家族架藍色七人車同菜園套裝, 但都有同老公講, 如果你買到其他日用品, 湊夠錢免費送貨就唔駛買喇! 點知......由於老公實在太錫我, 我一話想買, 佢就諗都唔諗, 就買咗俾我! 於是, 我又無啦啦多咗2件森林家族玩具喇! HOHO......
七人車後面兩排座位可以拆除,
擺放Starter House的廚房同餐枱配件!
早幾日, 媽媽又落去樓下千色店睇森林家族, 因為做緊85折(之前反斗城都有做85折, 媽媽想買個蛋糕店$499有85折), 點知俾人買咗), 落到去千色店, 惟一一個蛋糕店又係俾人買咗 (錯過咗2次機會, 媽媽超想喊)! 再睇吓其他, 見到有個超級市場Supermarket Gift Set, 出面好少見呢套, 嘩! 淨係睇個盒已經覺得好精彩啊! OVER 100 pieces! 再睇吓個價錢, 嘩! 仲精彩! $899! 嘩! 咁咪同買間屋一樣價錢囉! 但係間屋大件好多喎, 製作物料都用多D啦! 諗黎諗去, 買唔買好呢? 最後, 為咗補償返錯失咗2次買蛋糕店的機會, 氹返自己開心, 買就買啦! $899有85折, 即係$764啦! 豪一次啦! 於是一手納起盒超級市場, 拎去Cashier度俾錢, 個Cashier一喐, 多謝你$599丫! 我即時心諗, 我有冇聽錯?! 再睇睇個收銀機, 真係$599喎, 拿拿林簽咭走人! (我驚佢話打錯價錢呀!) 即刻急急腳返上樓, 再拎張單出黎睇, 真係喎! 冇錯喎! 寫住超級市場禮品套裝, 原價$899, 減$300, 特價$599! YEAH! 好在決定買啫! 我諗係日本買都冇咁平!
Supermarket可以同Starter House合體,
變成樓上住宅, 樓下係商舖
Gift Set 附送的玩具車仔檔
Gift Set 附送的窩夫店
星期二放工後又去行千色店, 個蛋糕店竟然又出現返呀! 買唔買好呢?! 不過再買真係好敗家啊！同埋我驚老公鬧我痴線!
老公實在太錫我喇! 佢冇鬧我痴線, 佢仲好鼓勵我買, 我話冇位擺, 佢仲幫我執過個玻璃櫃, 佢仲話如果唔夠位擺, 不如買多個櫃擺係睡房! (心心眼 + 錫錫 emoji x N個）
後記：
星期六中午, 一家四口去完樓下食海南雞飯(細佬的favourite), 爸爸提意去千色店睇吓媽媽個森林家族, 兩個都話好! (尤其細佬仔, 佢特別投入, 覺得好似佢有份, 因為上次去日本買森林家族, 都係媽媽同細佬仔一齊相量買咩)
未行到去千色店, 哥哥已經飯氣攻心睡著咗, 要爸爸抱, 至於媽媽, 又係拖住細佬仔一支箭咁衝咗入去, 個蛋糕店仲係度呀! 爸爸問媽媽仲有咩店的時候, 媽媽隨口答話仲有個Seaside Restaurant 囉! 細佬睇到個餐廳話好鍾意......
媽媽: 你鍾意餐廳抑或蛋糕店呀?
細佬: 餐廳! (好肯定的語氣)
媽媽: 但你唔覺得蛋糕店好靚咩? D蛋糕好靚喎!
細佬: 我唔鍾意食蛋糕!
媽媽: um......! ok! 咁買餐廳架喇!
爸爸: 買餐廳啦! 睇落去都覺得餐廳好玩D啦! 你已經有級超市場嘛, 蛋糕店性質一樣, 餐廳就唔同, 可以有唔同玩法嘛!
結果, 媽媽第三次同蛋糕店講bye bye! 買咗個Seaside Restaurant ($550 x 85折 = $467.5) YEAH!
沒有留言:
張貼留言