自家製焦糖風味爆谷

孖寶好鍾意食爆谷, 其實爸媽都好鍾意, 不過, 係戲院買爆谷真係好貴好唔抵, 而超級市場的一桶桶爆谷, 亦唔係經常有得賣, 一直都好想自製爆谷, 但搵唔到整爆谷用的粟米乾 (我家姐姐話佢以前係中東打工, 有一包包已預製的爆谷, 放入微波爐叮幾十秒就食得, 我都聽過, 但我係香港搵唔到囉!)

上星期的起心肝, 去樓下超市搵吓有冇整爆谷用的粟米乾, 竟然俾我搵到! 其實自家製爆谷, 一D都唔難, 亦唔需要買家用爆谷機或咩特別設備, 只要有一隻易潔平底鑊就OK!

材料:

整爆谷用的粟米乾 50g
砂糖(用黃糖會更好) 40g
清水 20ml
牛油少許

製作方法:

1.  用牛油起鑊

2.  倒入粟米乾, 炒勻, 讓每粒粟米都沾到牛油

3.  蓋上鑊蓋,粟米粒會開始爆開, 然後就一發不可收拾, 呢個時候, 要不停搖動隻鑊

4.  到差不多冇爆, 熄火, 等一陣, 因為仲可能有零星爆發 (仲有1/4未爆開係正常, 唔好諗住等佢爆晒, 因為再等落去, 就會過火, 有燒焦味)

5.  打開蓋, 將爆谷倒入碗中備用

6.  開始煮焦糖, 用返隻鑊(唔駛洗, 用廚房紙抺乾淨就OK), 直接倒入砂糖, 加水 (千期唔好搵野攪動佢! 唔係D糖溶咗又會變返一粒粒), 可以前後搖動個鑊

7.  等D糖溶晒, 變成糖漿, 繼續煮, 2-3分鐘後, D糖漿就會變成金黃色, 小心睇住, 變成心目中理想的焦糖色, 就可以熄火(鍾意食牛油味的話, 可以係呢個時候落牛油, 唔鍾意可以skip呢個步驟)

8.  將頭先D爆谷倒返入去個鑊, 快速撈勻 (D焦糖好快凝固, 要快!)

9.  攤平, 搣返開痴到一舊舊果D爆谷, 完成!