孖寶升小一

上星期係開學周, 學校未算正式上課, 孖寶每日係學校食完飯就放學, 冇功課做, 返屋企就玩!

不過, 今個星期開始, 學校正式上課, 孖寶每日要上9節的課堂, 每節30分鐘, 有2次小息, 午膳+大息有1小時, 平日3:10放學, 逄星期三提早1個鐘2:10放學。中、英、數每日都有, 另外就係常識、音樂、普通話、體育、視藝、電腦。

今個星期開始有功課, 細佬班唔算多功課, 但哥哥班好多功課, 其實學校安排咗最後一節課堂(第10節)做功課輔導, 佢地係有時間係學校做功課, 加上而家D功課唔算深, 如果快, 其實真係可以係學校做晒大部份的功課。其實由K3下學期, 我地已經教孖寶, 放學返屋企, 食完飯後, 就要自動自覺拎D功出黎做, 細佬一向有責任心, 好緊張自己D野, 所以呢幾日, 細佬都可以係我地放工返黎之前, 做晒功課, 仲執埋書包(細佬真係好似我細個, 我讀書從來唔駛阿媽理我, 我阿媽仲同佢D friend炫耀, 係呀! 我個女自動自覺拎D書出黎溫習架, 佢測驗考驗我冇理過佢架! 仲記得年年考第一的我, 小四的時候, 有一次考咗第4, 喊到豬頭咁, 仲要老師安慰返我, 下次考返第一咪得囉!)。至於哥哥, 可能佢真係唔明白發生緊咩事, 加上佢性格一向係闊佬懶理, 佢自稱冇功課做/唔知有咩功課做, 放學返黎一直玩, 到我地放工返黎睇手冊, 嘩! 原來好多功課, 仲未做! 大鑊!

據我觀察, 細佬已經開始適應小學的生活, 可能佢遇到的都係和藹可親的老師(但其實佢個體育老師係訓導主任, 平時好惡), 加上細佬係一個好守規舉, 好有責任心, 好謹慎的小朋友, 呢D傳統學校坐定定聽書的模式, 難唔到細佬仔!

至於哥哥, 我唔可以話係佢的問題, 就算係性格問題, 其實都唔關佢事, 佢冇得選擇咩性格, 係天生既! 我覺得只係傳統學校坐定定聽書的模式唔適合哥哥, 加上哥哥的心智發展冇細佬咁成熟, 佢未去到小學個Level, 所以哥哥需要更多的時間去適應, 但我相信哥哥的能力, 佢唔係蠢人, 佢只係需要更多的鼓勵、肯定同讚賞!

孖寶今個星期返學的情況如下:

2018.09.10(星期一)

上星期四&五晚, 我地問哥哥仲有冇俾老師罰, 佢話冇喇! 因為個老師病咗! GEGEGE......

今朝早, 細佬食早餐時開始發忟憎+爆喊 (之前讀幼稚園時, 每逄星期一朝早就係咁), 總之, 咩事都唔啱佢心意, 咩事都可以令佢唔開心, 無論點安慰佢都冇用, 應該就係我地所謂的Monday Blue, 逄星期一朝早返工都會心情惡劣、想殺人咁款! 反而哥哥今朝好乖, 好快食完早餐, 好快換晒衫, 著埋鞋, 抵讚!

2018.09.11(星期二)

臨瞓前, 發現哥哥下唇正中間紅咗, 佢話上體育堂時, 有同學「襲擊」佢, 從後推咗佢落地下, 佢話佢已經同老師講咗! (媽媽希望唔係校園欺凌事件啦!)

2018.09.12(星期三)

哥哥話佢今日又俾老師罰企, 唔係班主任, 係另一個老師, 問佢做咗D乜野俾老師罰, 佢話佢都唔知! 唔記得喇! (err... 其實哥哥係唔係要讀返K3呢?!)

2018.09.13(星期四)

今日輪到細佬俾老師鬧+罰, 事緣放學排隊搭校巴, 細佬睇到哥哥排得比較前, 於是大叫: 阿哥, 一陣上車幫我霸住個位先! 結果, 緊係俾老師捉咗出黎罰啦!

希望孖寶可以慢慢適應小一的生活, 哥哥、細佬, 你地要加油呀!