自訂英文名計劃

話說最近呢10幾年, D父母好興係小朋友的出世紙上加上英文名, 唔係中文拼音, 而係仔就叫Hayden, 女就叫Charlotte, 呢款英文名。不過, 爸媽想留返自訂英文名的權利俾孖寶, 所以冇幫佢地係出世紙上加上英文名!

3年前, 孖寶兄弟讀K1, 學校要求每位小朋友都有一個英文名, 方便教Phonics的老師叫名。當年, 孖寶兄弟仲係BBs, 佢地好like睇Thomas卡通, 卡通片入面每架火車仔都有名, 於是爸媽提意佢地揀一個火車名做自己個名, 哥哥, 你叫Gordon啦! 有個哥字! 但哥哥唔like! 細佬仔鍾意紅色, 有架紅色火車仔叫James, 細佬堅持要叫James (err...呢個名, 好似好少後生仔用喎! 是但啦! 你鍾意啦!) 其實媽媽都想好似其他媽媽咁, 幫孖寶改返個聖經人物名(好似勁D咁!) 不過, 太多人叫Issac(情況同你係街邊大嗌"希希"一樣), 所以媽媽提意, 哥哥你叫Caleb好唔好呀? 哥哥竟然話OK! 幼稚園呢3年, Phonics老師都係咁樣叫佢地既!

不過, 其實, 係呢3年裏面, 孖寶已經改咗幾次英文名喇!

佢地好快已經唔鍾意Thomas, 另結新歡, 係韓國一套好受歡迎的卡通片, 有4個識得變身的主角, 佢地分別係警車Poli, 消防車Roy, 救護車Amber, 直升機Helly。孖寶當正自己係其中兩個主角, 哥哥聲稱自己係Poli, 細佬係Roy, 佢地仲幫爸爸媽媽assign埋英文名, 媽媽叫Amber, 爸爸係Helly(err... 是但啦!)

去年暑假, 爸媽帶孖寶去戲院睇咗一套卡通片 - Ninjigo, 有6個分別用唔同顏色做代表的主角, 綠色係綠忍者Lloyd, 藍色係雷(閃電)忍者Jay, 紅色係火忍者Kai, 仲有水忍者、冰忍者同地忍者。孖寶又當正自己係其中兩個主角, 哥哥鍾意藍色, 佢自稱係Jay, 細佬鍾意紅色, 所以佢係Kai, 你會無啦啦見到枱面上本寫字簿上面有一個你未見過的英文名, 都唔知係邊個小朋友漏低咗本簿係我地屋企, 又或者個玩具上面無啦啦貼咗個J字, 或者K字, 都唔知係邊個既! 如果你仲用返佢地上一次的英文名叫佢地, 佢地係會好嚴肅咁更正你!

最近, 孖寶又改名, 因為佢地又有新寵, 佢地無啦啦鍾意咗Minecraft, 但其實佢地未打過Minecraft的遊戲機, 只係嫲嫲買咗2盒Minecraft Lego俾佢地(嫲嫲話係孖寶自己揀的!), 今次唔係分顏色, 唔知佢地點分, 總之就係哥哥叫Alex, 細佬叫Steve, 但媽媽真係唔識分, 我只係覺得兩個主角係一樣樣既, 個頭方既, 眼耳口鼻起晒格咁囉!

唔知佢地幾時又改名呢? 咁搞法, 我地屋企D物品上面, 會出現越黎越多小朋友的名 : Caleb, James, Poli, Roy, Jay, Kai , Alex, Steve......