2018年9月3日(星期一), 孖寶正式升級成為小學雞, 展開漫長又艱苦的小學生涯喇! 我從來都唔覺得返學係開心的事, 我都唔敢同孖寶講, 返學好開心! 其實我由細到大都好憎返學讀書, 唔好問我個Degree同2個Master係點讀返黎! 我一直係度枉費緊自己的人生, 迫自己做自己唔鍾意做的事, 就係讀書&返工!
入正題, 孖寶開學, 爸爸請咗3日假, 支持佢地, 媽媽D假太少, 只有病咗先至可以唔駛返工! 我地安排孖寶搭校車返學&放學, 安全D! 早上7:27上校車, 由屋企行去校車站都要10分鐘, 計埋刷牙洗面, 食早餐, 換衫的時間, 孖寶要6:30起身。孖寶都算醒瞓, 哥哥鼻敏感+鼻塞, 晚晚都瞓得唔好, 成晚醒, 細佬通常臨天光去完廁所就瞓唔返, 所以佢兩個未夠6:30已經醒咗, 細佬通常都自動自覺去刷牙, 哥哥就鍾意入黎我地房, 同爸爸纒綿一陣先去刷牙!
細佬每朝都好肚餓, 食早餐好快, 哥哥就... 已經好俾心機... 希望盡快食完! 佢地以前食完早餐, 例牌去玩一陣Lego, 夠鐘先至換衫返幼稚園, 但由於小學要返早1個鐘(學校早上8點正打鐘閂門), 所以食完早餐已經冇時間玩, 仲要換衫(升上小一, 我叫工人姐姐唔好幫佢地換衫, 要佢地自己著衫, 扣鈕, 著褲, Zip好件衫, 著襪, 著鞋, 孭書包), 佢地自己著, 要多2倍時間, 7:15之前一定要搞掂晒, 出門口。
由於開學頭3日家長可以陪上課室, 孖寶搭校車, 送咗孖寶上校車之後, 我就同老公揸車去學校門口, 等佢地架校車黎, 孖寶落車, 見到我地, 當然好開心啦! 然後就送佢兩個上課室, 我同老公輪流陪佢地一陣, 學生返到課室, 未上堂之前, 可以去圖書角拎圖書睇, 可能係第一日正式返學, 哥哥同細佬都有D緊張, 細佬未至於喊, 但面容繃緊, 哥哥就扯住爸爸隻手, 唔係好想佢離開。早上8點正, 音樂響起(唔係打鐘), 夠鐘上堂喇! 家長要由後樓梯離開。
我同老公去咗附近茶餐廳食早餐, 老公車我去地鐵站, 我要返工! 老公就返屋企! 孖寶早上11點放, 老公去校巴站接孖寶, 又買麥當當俾孖寶做午餐, 爸爸好錫孖寶啊! 爸爸話孖寶放學好雀躍, 應該都幾開心 (咁就好喇!)
開學第二日, 爸媽仍然好似第一日咁, 揸車去學校門口會合孖寶, 然後陪佢地上課室。我陪哥哥入班房, 見到佢個班主任, 陳老師(肥婆一名, 黑口黑面, 同家長講野, 都唔太有善! 對住學生, 睇怕都唔會好有愛心!), 只覺得哥哥好不幸, 入到呢班... 真係好擔心哥哥, 希望你承受到啦! 至於細佬, 佢個班主任, 張老師, 超級nice, 滿面笑容, 對家長同學生都好親切有禮, 都好既, 我地起碼少一個擔心先啦! 中午係學校食飯, 1:40放學, 爸媽都有去校巴站接孖寶。細佬話今日個飯盒好正, D雞肉唔鞋, 好林, D汁好好味, 仲有節瓜 (我睇返個餐牌, 原來係食甜薯肉片飯囉! wakaka...)
開學第三日, 爸媽都冇再去學校門口會合孖寶, 送咗孖寶上校車, 孖寶要自己落車, 自己行2層樓上課室(當日係要帶10幾本書返學校俾老師, 書包超重, 爸爸驚孖寶辛苦, 已經教咗佢地, 上到1樓, 搵個位企係度, 抖一陣先至再上2樓)。中午係學校食飯, 1:40放學, 爸爸、嫲嫲&工人姐姐三個去接孖寶(好大陣象!) 爸爸話孖寶放學好開心! 到咗夜晚8:15, 差不多係講故事時間, 哥哥突然同我地講, 佢今日俾老師好大聲咁鬧佢, 仲罰佢企出黎黑板, 佢話佢只係係走廊行得快咗D, 老師話佢跑咗, 要罰企, 然後不停喊, 喊得好淒涼, 喊咗超過30分鐘(媽媽既心痛又擔心), 爸爸趕緊抱抱處理, 但哥哥好唔開心+好嬲, 越講越想打老師, 我地當然話唔得呀! 同埋教佢盡量乖D, 聽老師講, 佢叫你做乜就做乜囉!
開學第四日, 哥哥換衫返學時又爆喊, 佢又話個老師好惡, 點解成日要學生聽佢講野? 點解老師講就得? 佢講就唔得? 睇黎哥哥真係未去到小學個Level, 佢仍然停留係幼稚園個Level, 佢唔明上堂唔可以出聲, 老師話一, 你唔可以話二, 佢繼續咁"BB"落去, 佢只會俾老師罰死! 爸爸話可能要申請調班, 或者問吓其他同班同學的家長, 個班主任係唔係好惡, 可能要向學校反映一下。但係, 我覺得呢個正正係一個機會, 俾然然知道, 呢個世界唔係全部好人, 係有衰人既! 將來返工, 都可能遇到個衰老闆, 唔通辭職咩?! 我地做父母, 要教佢點樣面對困難/挑戰/不如意的事, 唔係幫/教佢逃避! 佢地往後的人生仲有好多艱難要面對, 我地要好好裝備好自己的孩子, 讓佢地有勇氣、能力同堅強的意志, 去面對/克服困難! 然然, 你要加油呀! 爸爸媽媽會係你身邊一直支持你架!
至於細佬, 佢真係冇乜野, 因為佢個班主任真係好好人! 加上細佬係一個好守規舉的小朋友(佢話師講野, 佢緊係唔會出聲啦!), 細佬個人好謹慎, 係陌生的環境, 佢唔會輕舉罔動, 只係會乖乖坐定定唔出聲!
備註:
哥哥的感覺同對聲音比較敏感, 大聲D同佢講野, 就話你鬧佢, 佢唔鍾意你, 你掂吓佢, 佢都話你打佢! 所以, 我好有理由相信, 哥哥哭訴老師好惡鬧佢, 罰佢企咗好耐, 企到放學, 係有誇大成份!
沒有留言:
張貼留言