去年6月第一個星期六, 我地帶咗孖寶去科學館, 順便買咗一家四口的博物館全年通行証(盛惠$100), 去完科學館玩, 就出事喇! 孖寶感染咗不知名病毒, 發咗5日高燒, 病咗2星期先至好返, 睇醫生睇咗$3,000。之後, 停咗好耐, 都唔敢再去科學館。
由於買咗全年通行証, 唔去返夠本好蝕底, 於是就去吓其他博物館, 孖寶最感興趣的博物館排名如下:
1. 海事博物館 (但原來佢唔係隸屬康文署, 係海事處, 所以有博物館全年通行証都係要俾錢der~ 不過成人有半價優惠。)
2. 海防博物館 (好多露天地方, 夏天去會熱死, 或者細佬俾蚊針死)
3. 科學館 (係通行証到期之前去咗1次, 但仍然猶有餘悸)
4. 歷史博物館 (因為孖寶跟學校去過1次, 佢地好想再同爸媽去多一次)
5. 文化博物館 (好細個的時候, 去過2次)
至於裝修咗9世的太空館, 係今年4月尾重開, 重開初期好多人, 所以我地唔去住, 等到9月1日(星期六), 我地就帶孖寶去參觀一吓。持有博物館全年通行証可以免費入場, 但要預先上網book參觀時間, 憑QR Code入場。
孖寶第一次參觀太空館(之前黎過睇天象節目, 講深海生物, 佢兩個冇興趣, 不停話咁耐既, 幾時走得! 好想走!), 佢地對太空一向都好有興趣, 不過, 係門口doo QR Code期間, 細佬突然埋怨冇野睇, 搞乜野搞咁耐架? 但當佢見到門口有個好大的火星 (其實係太陽), 佢就突然間話, 好想快D入去睇!
展覽廳唔算大, 但內容都算豐富, 不過, 好多關於物理的知識, 孖寶都唔太明白(媽媽唔係理科, 當然都唔明啦!), 其中孖寶最有興趣係用乾冰跌落水去模仿天體氣化的過程。展覽廳盡頭有少量的電腦互動遊戲, 不過唔係好啱孖寶玩, 仲有球體投射短片, 講解宇宙大爆炸(哥哥冇興趣, 只有我同細佬睇)。我同細佬講, 有人話呢個世界係大爆炸爆出黎, 唔係天父創造, 咁你信邊個? 細佬話: 我都係信天父! (<-- 感謝主!)
展覽廳仲有上層, 但地方唔大, 同埋D展覽都雞雞地, 老公直頭話D展覽失禮死人! 我地之前去過2個係日本的航天科學博物館, 感覺人家很專業的! 起碼人家件太空衣真係堅既, 但香港呢個只係一個紙牌...... 仲要擺正係門口......
參觀完太空館, 孖寶意猶未盡, 想去埋海事博物館, OK! 搭船過中環, 海事博物館就係中環8號碼頭, 今次已經係第3次去。原來逄星期六、日下午2點, 會有真船長黎到模擬駕駛室, 教小朋友揸船, 我地全家都好雀躍, 因為之前黎咗2次, 都唔知有呢個活動, 仲以為個駕駛室係假既, 裝飾用!
今次有3個家庭可以入駕駛室(因為限人數, 要買飛時登記, 先至有飛可以參加揸船體驗), 船長講解一下面前的儀器錶板, 同埋揸船要注意的事項。第一個小朋友體驗完, 細佬即刻舉手話想揸 (反而哥哥冇乜反應, 佢話讓細佬, Good Boy!)。個駕駛室原來真係用黎俾船長考牌用, 個模擬畫面超真實, 感覺自己真係企係架船上面, 有D腳步浮浮的感覺。細佬揸完就輪到哥哥, 哥哥一向唔守規舉, 所以玩遊戲都係, 佢好大力咁扭個軚盤, 想撞船! 不過, 俾真船長阻止佢!
玩完揸船, 已經值回票價, 落返一層去參觀一吓其他野(其實之前已經參觀咗2次, 都係果D野), 走lu!
備註:
其實孖寶仲有一個地方都好鍾意去參觀, 就係濕地公園...... 入面個兒童遊戲室, 佢地每年都要去一次!
沒有留言:
張貼留言