第三個星期返學!

兩個都冇喊! 叻叻!

仲以為細佬要1個月適應期, 加上今個星期開始返足3個鐘, 點知今個星期一返學已經冇喊, 換衫, 孭書包, 出門口, 行返學校, 都冇扭計!  其實上星期五學校開生日會, 佢地可以著便服返學 (可能唔駛著校服, 心情特別好), 已經冇扭計! 細佬仲問阿嫲, 我地而家去邊呀? (問咗2次), 笑死阿嫲!

星期一
老師話細佬排隊放學時賴屎, 姨姨幫佢換咗條底褲 (因為冇後備尿片, 係哥哥袋衫入面搵到條底褲, 著住先)

星期二
哥哥今日返學, 老師係課室門口迎接佢, 佢仲衝入去課室入面, 好開心! 細佬都係笑住口咁走入課室, 校長都讚佢地兩個進步咗好多!

星期三
放學後哥哥的班主任打黎, 佢話哥哥條片好濕, 好重, 學校幫佢換咗條底褲, 老師問我有冇幫佢戒片, 我話試過好多方法都失敗, 佢地冇咗條片就發顛, 又唔肯用potty屙, 唔知仲可以點做?  老師提意試吓買D厚身D有包圍感的底褲俾佢地, 等佢地多D安全感!

後記:
自從佢地開始返學, 爸爸媽媽就改咗個schedule, 希望佢地夜晚可以早D瞓 (以前11:30pm瞓), 而家可能下晝要返學冇得午睡, 有幾晚都可以10:30pm瞓, 最開心的應該係媽媽, 因為終於唔駛同佢地搏鬥到咁夜 (媽媽一向係早瞓的人),

爸爸應承佢地, 如果返學唔喊喊, 就送滑板車俾佢地, 所以星期一晚爸爸放工即刻去觀塘集運攞貨, 兩個見到滑板車都好開心(哥哥指定要藍色, 細佬指定要紅色), 不過就仲未識玩。

原本以為佢地係細B, 返學都係戇居居, 唔夠人地大B咁醒目, 但其實佢地都學到D野架! 尋晚媽媽教佢地揸筆油顏色, 教極細佬都唔識, 但哥哥突然講咗句: 剔剔手! 然後好專業同好純熟咁樣揸住支筆俾媽媽睇, 勁!  細佬都學到野, 佢指住本聖經故事書, 同媽媽講: 生咗主耶穌出黎! 佢每逢望住個天, 就會話主耶穌係上面!